ZẸẸMẸ WEFỌ BIBLU TỌN LẸ TỌN
Lomunu lẹ 10:13—“Ylọ Oyín Oklunọ Tọn”
“Mẹdepope he dawhá ylọ oyín Jehovah tọn wẹ na yin whinwhlẹngán.”—Lomunu lẹ 10:13, Lẹdogbedevomẹ Aihọn Yọyọ Tọn.
“Yè na whlẹn mẹdepope he na ylọ oyín Oklunọ tọn gán.”—Lomunu lẹ 10:13, Biblu Wiwe lọ—Gun Alada.
Zẹẹmẹ Lomunu lẹ 10:13 Tọn
Jiwheyẹwhe ma yin mẹnukuntahopọntọ podọ e hùn dotẹnmẹ dote na gbẹtọ lẹpo nado yin whinwhlẹngán bo mọ ogbẹ̀ madopodo, mahopọnna otò he mẹ yé wá sọn, sinmẹ agbasa tọn yetọn kavi otẹn he mẹ yé tin te. Nado duvivi dona enẹ tọn, mí dona ylọ oyín Jehovah tọn, yèdọ yinkọ mẹdetiti tọn Jiwheyẹwhe Ganhunupotọ lọ tọn. a—Salmu lẹ 83:18.
To Biblu mẹ, hodidọ lọ “ylọ oyín Jehovah tọn” bẹ nususu hẹn hugan oyín Jiwheyẹwhe tọn yinyọnẹn gọna yíyí i zan to sinsẹ̀n-bibasi mẹ poun. (Salmu lẹ 116:12-14) Ehe nọ biọ dọ mí ni dejido Jiwheyẹwhe go bo nọ lẹhlan e dè nado mọ alọgọ.—Salmu lẹ 20:7; 99:6.
Oyín Jiwheyẹwhe tọn yin nujọnu na Jesu Klisti. Hodidọ tintan to odẹ̀ apajlẹ tọn etọn mẹ lẹ wẹ: “Otọ́ mítọn he tin to olọn mẹ, na oyín towe ni yin kinklandowiwe,” kavi yin hinhẹn zun wiwe. (Matiu 6:9) Jesu sọ dohia dọ mí dona yọ́n Mẹhe tindo oyín enẹ bo nọ setonuna ẹn bosọ yiwanna ẹn, eyin mí na mọ ogbẹ̀ madopodo.—Johanu 17:3, 6, 26.
Naegbọn mí do kudeji dọ Jehovah wẹ yin “Oklunọ” he yin nùdego to Lomunu lẹ 10:13 mẹ to Biblu Wiwe lọ—Gun Alada mẹ? Na wefọ lọ yin didesọn Joẹli 2:32 mẹ, fie yinkọ Jiwheyẹwhe tọn sọawuhia te to Heblugbe dowhenu tọn mẹ, e ma yin tẹnmẹ-yinkọ lọ “Oklunọ.” b
Nujijọ He Lẹdo Lomunu lẹ 10:13 Lẹ
To Lomunu lẹ weta 10tọ mẹ, mí mọdọ eyin mẹde na tindo haṣinṣan dagbe de hẹ Jiwheyẹwhe, e dona tindo yise to Jesu Klisti mẹ. (Lomunu lẹ 10:9) Hoyidọ he yin didesọn Alẹnu Hoho mẹ susu wẹ nọgodona linlẹn lọ nado tindo yise to Jesu mẹ. Mẹde nọ do yise hia gbọn “gbeyiyi gbangba tọn” dali, ehe bẹ wẹndagbe lilá gando whlẹngán go na mayisenọ lẹ hẹn. Gbọnmọ dali, dotẹnmẹ lọ nọ hundote na mẹdevo lẹ nado wleawuna yise he nọ planmẹ jẹ ogbẹ̀ kọ̀n.—Lomunu lẹ 10:10, 14, 15, 17.
Hia Lomunu lẹ weta 10, gọna nudọnamẹ odò tọn lẹ po alọdlẹndonu ṣẹnṣẹn tọn lẹ po.
a Yinkọ Jiwheyẹwhe tọn sọawuhia whla 7 000 to alọnuwe Biblu tọn hohowhenu tọn lẹ mẹ. To Heblugbe mẹ, yinkọ Jiwheyẹwhe tọn bẹ wekun ẹnẹ hẹn, ehe yin yinyọnẹn taidi Tetlaglamu. To Gungbe mẹ, yinkọ lọ nọ saba yin yiylọdọ “Jehovah”; amọ́ weyọnẹntọ delẹ yiwanna nado nọ yí “Yahweh” zan.
b E yọnbasi dọ Klistiani he lilẹ́ Biblu do ogbè devo mẹ lẹ nọ yí yinkọ Jiwheyẹwhe tọn zan to whenue yé to hoyidọ sọn “Alẹnu Hoho” he bẹ yinkọ enẹ hẹn mẹ lẹ mẹ. Wezẹhomẹ lọ The Anchor Bible Dictionary dọmọ: “Kunnudenu delẹ tin dọ Tetlaglamu lọ, enẹ wẹ Oyín Jiwheyẹwhe tọn Yahweh, sọawuhia to fie Alẹnu Yọyọ lọ yihodọ sọn Alẹnu Hoho lọ mẹ te delẹ kavi to filọ lẹpo to whenue kandai Alẹnu Yọyọ lọ tọn yin bibasi to tintan whenu.” (Bladopọ 6tọ, weda 392) Nado mọ nudọnamẹ dogọ, pọ́n hosọ lọ “Oyín Jiwheyẹwhe Tọn to Owe-Wiwe Glẹki Tọn lẹ Mẹ” to Nudọnamẹ dogọ A5 mẹ to Owe Wiwe lẹ—Lẹdogbedevomẹ Aihọn Yọyọ Tọn mẹ. Nudọnamẹ Dogọ C2 to Biblu oplọn tọn Lẹdogbedevomẹ Aihọn Yọyọ Tọn Glẹnsigbe tọn mẹ bẹ todohukanji lẹdogbedevomẹ Biblu tọn he yí yinkọ Jiwheyẹwhe tọn zan to Lomunu lẹ 10:13 mẹ hẹn.
A Gán Sọ Pọ́n Hosọ Ehelẹ
GBLỌNDO NA KANBIỌ SINAI DO BIBLU JI LẸ
Be Jiwheyẹwhe Tindo Oyín de Ya?
Oyín Jiwheyẹwhe tọn tin to lẹdogbedevomẹ Biblu tọn susu mẹ. Be a dona nọ yí i zan wẹ ya?
GBLỌNDO NA KANBIỌ SINAI DO BIBLU JI LẸ
Yinkọ Nẹmu Wẹ Jiwheyẹwhe Tindo?
Mẹlẹ gán nọ lẹndọ Jiwheyẹwhe tindo yinkọ lẹ taidi ‘Allah’, ‘El Shaddai,’ ‘Jehovah-Jile’, ‘Alfa po Omega po.’ Be lehe mí nọ ylọ Jiwheyẹwhe dọ yin nujọnu ya?
ZẸẸMẸ WEFỌ BIBLU TỌN LẸ TỌN
Zẹẹmẹ Isaia 42:8 Tọn—“Yẹn wẹ OKLUNỌ”
Yinkọ mẹdetiti tọn tẹwẹ Jiwheyẹwhe de bo na ede?
GBLỌNDO NA KANBIỌ SINAI DO BIBLU JI LẸ
Etẹwẹ Whlẹngán Yin?
Etẹwẹ mí sọgan wà nado mọ whlẹngán? Etẹ mẹ wẹ mí yin whinwhlẹngán sọn?
NUHE BIBLU PLỌN MÍ
Azọ́nwanu Biblu Pinplọn Tọn Lẹ
De azọ́nwanu he a nado plọn Biblu po awuvivi po to aliho debọdo-dego tọn mẹ lẹ.
NUHE BIBLU PLỌN MÍ
Tẹ́n Tito Biblu Pinplọn Tọn Mítọn Pọ́n
A gán plọnnu vọnu hẹ mẹplọntọ de nukun sọ nukun nado mọ ayinamẹ sinai do Biblu ji lẹ yí.
