“Yẹn sọ mọ olọn yọyọ de po aigba yọyọ de po; na olọn hoho lọ po aigba hoho lọ po ko juwayi, ohù masọ tin ba.”—Osọhia 21:1, Lẹdogbedevomẹ Aihọn Yọyọ Tọn.

 “Yẹn sọ mọ olọn yọyọ de, po aigba yọyọ de po: na olọn tintan po, aigba tintan po ko juwayi; ohù ma sọ tin ba.”—Osọhia 21:1, Biblu Wiwe lọ—Gun Alada.

 Wefọ ehe zan hogbe yẹhiadonu tọn lẹ nado dohia dọ Ahọluduta Jiwheyẹwhe tọn he to olọn mẹ na diọtẹnna gandudu gbẹtọvi tọn lẹpo. Ahọluduta lọ na de mẹylankan lẹ sẹ̀ bo na dugán do pipli gbẹtọvi lẹ tọn de he jlo na nọ aṣẹpipa etọn glọ ji.

 “Ohia lẹ” kavi yẹhiadonu lẹ wẹ owe Osọhia tọn bẹhẹn. (Osọhia 1:1) Enẹwutu, e sọgbe nado dọ dọ yẹhiadonu-liho wẹ olọn po aigba po yin nùdego te to wefọ lọ mẹ, e ma yin to aliho tlọlọ tọn mẹ. Podọ wefọ devo lẹ sọ donù “olọn yọyọ lẹ” po “aigba yọyọ” po go to yẹhiadonu-liho ga. (Isaia 65:17; 66:22; 2 Pita 3:13) Dogbigbapọnna wefọ ehe po devo lẹ po, na gọalọna mí nado mọnukunnujẹ zẹẹmẹ hogbe ehelẹ tọn mẹ.

 “Olọn yọyọ de.” To whedelẹnu, Biblu nọ zan hogbe lọ “olọn” nado dlẹnalọdo aṣẹpipa kavi gandudu lẹ. (Isaia 14:12-14; Daniẹli 4:25, 26) Enẹwutu, owe alọdlẹndonu tọn de dọ dọ to dọdai-liho, “olọn nọ dlẹnalọdo aṣẹpipa kavi gandudu he to anadenanu lẹ.” a Ayihaawe ma tin dọ Ahọluduta Jiwheyẹwhe tọn wẹ “olọn yọyọ” he to Osọhia 21:1 mẹ to alọdlẹndo. Gandudu olọn mẹ tọn ehe, he sọ nọ yin yiylọdọ “Ahọluduta olọn tọn” to whedelẹnu, yin nùdego to owe Osọhia tọn blebu mẹ, podọ to owe Biblu tọn devo lẹ mẹ ga. (Matiu 4:17; Owalọ lẹ 19:8; 2 Timoti 4:18; Osọhia 1:9; 5:10; 11:15; 12:10) Ahọluduta Jiwheyẹwhe tọn he Jesu yin Ahọlu etọn na wá diọtẹnna “olọn hoho lọ,” enẹ wẹ gandudu he gbẹtọvi mapenọ lẹ ko zedai lẹpo.—Daniẹli 2:44; Luku 1:31-33; Osọhia 19:11-18.

 “Aigba yọyọ de.” Biblu dohia dọ aigba mítọn ehe ma na yin vivasudo kavi yin tẹndiọna gbede. (Salmu lẹ 104:5; Yẹwhehodọtọ 1:4) Bọ etẹwẹ aigba yẹhiadonu tọn lọ nọtena lo? Biblu nọ saba zan hogbe lọ “aigba” nado dlẹnalọdo gbẹtọvi lẹ. (Jenẹsisi 11:1; 1 Otànnugbo lẹ 16:31; Salmu lẹ 66:4; 96:1) Enẹwutu, “aigba yọyọ de” dona ko to alọdlẹndo pipli gbẹtọvi lẹ tọn de he jlo na nọ gandudu Jiwheyẹwhe tọn he to olọn mẹ glọ. Hogbe lọ “aigba hoho” to alọdlẹndo pipli gbẹtọvi lẹ tọn he jẹagọdo Ahọluduta Jiwheyẹwhe tọn lẹpo, podọ yé na juwayi.

 “Ohù masọ tin ba.” Sọgbe hẹ adà Osọhia 21:1 tọn he go mí donù wayi lẹ, “ohù” lọ lọsu yin yiyizan to yẹhiadonu-liho. Na ohù nọ saba to adán ji bo nọ wujẹgbonu wutu, ohù he go wefọ lọ donù nọtena gbẹtọvi he nọ fọ́n hunyanhunyan dote bo ma jlo na setonuna Jiwheyẹwhe lẹ. (Isaia 17:12, 13; 57:20; Osọhia 17:1, 15) Yelọsu ma na tin ba. Salmu lẹ 37:10 dọ dọ: “Na whenu pẹẹde dogọ, mẹylankan lẹ ma na tin ba; hiẹ na pọ́n fie yé nọ nọ̀ dai, yé ma nasọ to finẹ.”

 Owe Osọhia tọn dọ dọdai gando nue na jọ “to azán Oklunọ tọn gbè” lẹ go. (Osọhia 1:10) Sọgbe hẹ dọdai Biblu tọn, azán enẹ bẹjẹeji to 1914 whenue Jesu lẹzun ahọlu Ahọluduta Jiwheyẹwhe tọn. b Amọ́, e ma na paṣẹ do aigba blebu ji to afọdopolọji. Na nugbo tọn, dọdai devo lẹ dohia dọ ninọmẹ aihọn lọ tọn na ylan deji taun to adà tintan “azán Oklunọ tọn gbè” tọn lẹ mẹ. Adà tintan enẹ wẹ Biblu ylọdọ “Azán godo tọn lẹ.” (2 Timoti 3:1-5, 13; Matiu 24:3, 7; Osọhia 6:1-8; 12:12) Whenue azán he vẹawu taun enẹlẹ na ko wá vivọnu, Ahọluduta Jiwheyẹwhe tọn na de olọn po aigba hoho yẹhiadonu tọn lọ po sẹ̀ bo na hẹn ogbẹ̀ yọyọ he gọ́ na jijọho po pọninọ po wá. “Aigba yọyọ” lọ—enẹ wẹ tòvi Ahọluduta lọ tọn lẹ—na duvivi gbẹninọ tọn bo nasọ nọ jogún-jogún to agbasa mẹ.—Osọhia 21:3, 4.

 Pọ́n video kleun ehe nado mọ nue to owe Osọhia tọn mẹ lẹ.