Mọwẹ, Biblu na kunnudenu he dutomẹji lẹ dọ Jiwheyẹwhe tin nugbo. E na tuli mí nado wleawuna yise to Jiwheyẹwhe mẹ, bo ma nọ kẹalọyi nuhe sinsẹ̀n lẹ nọ dọ poun blo, amọ́ nado nọ yí “huhlọn nulẹnpọn tọn” po “nugopipe apọ̀nmẹ tọn” mítọn po zan (Lomunu lẹ 12:1; 1 Johanu 5:20, nudọnamẹ odò tọn) Gbadopọnna nuyijlẹdonugo sinai do Biblu ji he bọdego ehelẹ:

•   Aliho he mẹ nulẹ to tito ji to wẹkẹ lọ mẹ te, po ogbẹ̀ he tin to e mẹ po dohia dọ Mẹdatọ de tin. Biblu dọ dọ: “Na nugbo tọn, ohọ̀ lẹpo wẹ nọ yin gbigbá gbọn mẹde dali, ṣigba mẹhe basi nulẹpo wẹ Jiwheyẹwhe.” (Heblu lẹ 3:4) Mahopọnna dọ nuyijlẹdonugo enẹ bọawu taun, weyọnẹntọ susu wẹ mọdọ e dohuhlọn taun. a

•   Jọwamọnu wẹ ojlo lọ nado mọnukunnujẹ ogbẹ̀ po lẹndai etọn po mẹ yin na gbẹtọvi lẹ, yèdọ huvẹ wunmẹ de he sọgan gbọṣi aimẹ eyin mí tlẹ sudo nuhudo agbasa tọn mítọn lẹ tọn. Ojlo enẹ wẹ nue Biblu ylọ dọ “nuhudo gbigbọmẹ tọn lẹ,” ehe bẹ ojlo lọ nado yọ́n Jiwheyẹwhe bo sẹ̀n ẹn hẹn. (Matiu 5:3; Osọhia 4:11) Nuhudo gbigbọmẹ tọn enẹ ma nọ na mí nujikudo lọ dọ Jiwheyẹwhe tin kẹdẹ gba, e sọ nọ dohia mí dọ Mẹdatọ owanyinọ de he jlo dọ mí ni hẹn pekọ wá na nuhudo enẹ wẹ e yin.—Matiu 4:4.

•   Dọdai he họnwun Biblu tọn lẹ yin kinkan owhe kanweko susu lẹ jẹnukọn, bosọ nọ mọ hẹndi po gbesisọ po. Aliho he mẹ dọdai lọ lẹ mọ hẹndi po gbesisọ po te gọna nudọnamẹ gigọ́ he yé bẹhẹn lẹ dohia dọ nuyọnẹntọ he yiaga taun hugan gbẹtọvi lẹ de dè wẹ dọdai enẹlẹ wá sọn.—2 Pita 1:21.

•   Biblu-kantọ lẹ tindo nuyọnẹn lẹnnunuyọnẹn tọn he zẹ̀ mẹhe nọgbẹ̀ to ojlẹ yetọn mẹ lẹ tọn go. Di apajlẹ, to hohowhenu, mẹsusu wẹ yise dọ kanlin delẹ wẹ hẹn aigba dote, taidi ajinaku, hànvẹẹ, kavi oyìnsú de. To vogbingbọn mẹ, Biblu dọ dọ Jiwheyẹwhe “plá aigba do agbágbá.” (Jobu 26:7) Mọdopolọ, Biblu basi zẹẹmẹ awusọhia aigba tọn taidi nuhe to “loboto,” kavi “globu” de. (Isaia 40:22, Biblu Wiwe lọ—Gun Alada) Mẹsusu wẹ yise dọ nue zọ́n bọ Biblu-kantọ lẹ do basi zẹẹmẹ he sọgbe hẹ lẹnpọn dagbe do mọ wẹ yindọ Jiwheyẹwhe dè wẹ yé mọ nudọnamẹ lọ lẹ yí sọn.

•   Biblu na gblọndo kanbiọ he gẹdẹ susu tọn, bọ eyin mẹde ma mọ gblọndo dagbe na kanbiọ enẹlẹ e sọgan yise dọ Jiwheyẹwhe de ma tin. Di apajlẹ: Eyin Jiwheyẹwhe yin owanyinọ bosọ yin huhlọnnọ, naegbọn yajiji po danuwiwa po do gọ́ gbẹ̀mẹ? Naegbọn sinsẹ̀n do nọ saba nọgodona nuylankan wiwà kakati nido yin nudagbe?—Titu 1:16.