Be Lẹgba Tin Nugbonugbo Ya?

MÌ HÒ (video kavi hoyidokanji lọ)

Gblọndo Biblu tọn

Mọwẹ, Lẹgba tin nugbonugbo. Ewọ wẹ “ogán aihọn tọn” lọ, yèdọ nudida gbigbọnọ de he lẹzun mẹylankan bosọ ṣiatẹ sọta Jiwheyẹwhe. (Johanu 14:30; Efesunu lẹ 6:11, 12) Biblu hẹn omẹ nankọ he Lẹgba yin họnwun gbọn yinkọ he yin yiyizan na ẹn ehelẹ po zẹẹmẹ yetọn po dali:

Satani, he zẹẹmẹdo “Agọjẹdomẹtọ.”—Jobu 1:6.
Lẹgba, he zẹẹmẹdo “Mẹhẹngbletọ.”—Osọhia 12:9.
Odàn, he yin yiyizan to Biblu mẹ nado dlẹnalọdo “Mẹklọtọ.”—2 Kọlintinu lẹ 11:3.
Mẹwhlepọntọ.—Matiu 4:3.
Lalonọ.—Johanu 8:44.

Lẹgba ma yin jijọ kavi linlẹn nuylankan wiwà tọn he to mí mẹ de gba

Mẹdelẹ nọ lẹndọ Satani Lẹgba ma yin nudevo zẹ̀ jijọ kavi linlẹn he to ohò mítọn mẹ bo nọ sisẹ́ mí nado wà nuylankan lẹ go. Amọ́, mí hia to Biblu mẹ dọ Jiwheyẹwhe dọhodopọ hẹ Satani. To whenuena e yindọ mẹpipe wẹ Jiwheyẹwhe, e na vẹawu dọ ewọ ni do jijọ kavi linlẹn nuylankan wiwà tọn de, he po e po gán ko to hodọ. (Deutelonomi 32:4; Jobu 2:1-6) Mọdopolọ, Satani whlé Jesu pọ́n, yèdọ mẹhe ma do ylando depope. (Matiu 4:8-10; 1 Johanu 3:5) Kunnudenu Biblu tọn ehelẹ dohia dọ Lẹgba tin nugbonugbo, bo ma yin jijọ kavi linlẹn ylankan he to gbẹtọ mẹ de poun.

Be nupaṣamẹ wẹ e dona yin na mí dọ mẹsusu ma yise dọ Lẹgba yin omẹ jọnun he tin nugbo de ya? Paali, na Biblu dọ dọ Satani nọ kàn ayiha oklọ tọn lẹ nado wà ojlo etọn. (2 Tẹsalonikanu lẹ 2:9, 10) Dopo to wlẹnwin daho hugan he e nọ zan lẹ mẹ wẹ yindọ, e nọ tọ́nnukunna mẹsusu to linlẹn de mẹ, bọ yé ma nọ yise dọ ewọ tin.—2 Kọlintinu lẹ 4:4.

Linlẹn agọ̀ devo lẹ he gando Lẹgba go

Lalo: Yinkọ devo he Lẹgba nọ yin wẹ Lukifẹli.

Nugbo lọ: Hogbe Heblugbe tọn he Biblu delẹ lẹdogbedevomẹ dọ “Lukifẹli” nọ zẹẹmẹdo ’mẹhe to sisẹ́.’ (Isaia 14:12) Lẹdo hodidọ lọ tọn dohia dọ hogbe ehe to alọdlẹndo whẹndo kavi hukan ahọlu Babilọni tọn lẹ tọn, he Jiwheyẹwhe na wá dowinyan na goyiyi yetọn wutu. (Isaia 14:4, 13-20) Hodidọ lọ ’mẹhe to sisẹ́’ yin yiyizan to aliho mẹṣanko tọn mẹ wẹ, nado vlẹ whẹndo gandudu Babilọni tọn kò to aijijẹ etọn godo.

Lalo: Satani to azọ́nwa na Jiwheyẹwhe wẹ taidi “whẹ̀yidọtọ de he nọ dawhẹ.”

Nugbo lọ: Kẹntọ Jiwheyẹwhe tọn wẹ Lẹgba yin, e ma yin devizọnwatọ etọn. Satani Lẹgba nọ diọnukunsọ mẹhe to Jiwheyẹwhe sẹ̀n lẹ bosọ nọ sawhẹ agọ̀ dokọna yé.—1 Pita 5:8; Osọhia 12:10.