Hogbe lọ “vivọji” nọ dohia dọ haṣinṣan yọyọ de bẹjẹeji to Jiwheyẹwhe po mẹhe yin vivọji lọ po ṣẹnṣẹn. (Johanu 3:3, 7) Mẹhe yin vivọji lẹ nọ lẹzun sọdodovi Jiwheyẹwhe tọn lẹ. (Lomunu lẹ 8:15, 16; Galatianu lẹ 4:5; 1 Johanu 3:1) Kẹdẹdi mẹhe yin sọdodovi sọgbe hẹ osẹ́n lẹ, ninọmẹ yetọn nọ diọ bọ yé nọ lẹzun hagbẹ whẹndo tọn Jiwheyẹwhe tọn.​—2 Kọlintinu lẹ 6:18.

Naegbọn mẹde nọ yin vivọji?

 Jesu dọmọ: “Adavo mẹde yin vivọji, e ma sọgan mọ Ahọluduta Jiwheyẹwhe tọn.” (Johanu 3:3) Enẹwutu, mẹhe yin vivọji de wẹ sọgan dugán hẹ Klisti to Ahọluduta Jiwheyẹwhe tọn mẹ. Na Ahọluduta enẹ to gandu sọn olọn mẹ wutu, Biblu basi zẹẹmẹ dọ ‘vọji yọyọ’ lọ nọ hùn dotẹnmẹ dote nado mọ ogú he yin “whiwhla do olọn mẹ” de yí. (1 Pita 1:3, 4) Mẹhe yin vivọji lẹ nọ yin hinhẹn kudeji dọ yé na “dugán taidi ahọlu lẹ dopọ” hẹ Klisti.​—2 Timoti 2:12; 2 Kọlintinu lẹ 1:21, 22.

Nawẹ mẹde nọ yin vivọji gbọn?

 To whenue Jesu to hodọdo whẹho enẹ ji, e dọ dọ mẹhe yin vivọji lẹ na yin “jiji gbọn osin po gbigbọ po dali.” (Johanu 3:5) Hogbe enẹlẹ to alọdlẹndo baptẹm osin tọn gọna baptẹm gbigbọ wiwe tọn.​—Owalọ lẹ 1:5; 2:1-4.

 Jesu wẹ omẹ tintan he yin vivọji. E yin bibaptizi to Tọ̀sisa Jọdani mẹ bọ to enẹgodo Jiwheyẹwhe yí gbigbọ wiwe do de e (kavi do baptizi i). Gbọnmọ dali, gbigbọ wiwe vọ́ Jesu ji taidi visunnu Jiwheyẹwhe tọn po todido lọ po nado lẹkọyi olọn mẹ. (Malku 1:​9-​11) Jiwheyẹwhe hẹn todido enẹ di bo fọ́n Jesu sọnku taidi nudida gbigbọnọ de.​—Owalọ lẹ 13:33.

 Mẹdevo he wá yin vivọji lẹ lọsu nọ yin bibaptizi gbọn osin dali whẹpo do mọ gbigbọ wiwe yí. a (Owalọ lẹ 2:38, 41) Enẹgodo, yé nọ yin hinhẹn kudeji dọ yé na nọgbẹ̀ to olọn mẹ bọ Jiwheyẹwhe nọ hẹn todido enẹ di to fọnsọnku yetọn whenu.​—1 Kọlintinu lẹ 15:42-49.

Pọndohlan agọ̀ lẹ gando vivọji go

 Pọndohlan agọ̀: Mẹde sọgan de nado yin vivọji.

 Nugbo lọ: Mẹlẹpo wẹ dotẹnmẹ hundote na nado tindo haṣinṣan hẹ Jiwheyẹwhe bo yin whinwhlẹngán. (1 Timoti 2:3, 4; Jakọbu 4:8) Ṣigba, Jiwheyẹwhe wẹ nọ de mẹhe na yin vivọji, kavi yin dide gbọn gbigbọ wiwe dali lẹ. Sọgbe hẹ nuhe Biblu dọ, nado yin vivọji “ma nọ sinai do ojlo mẹde tọn kavi vivẹnudido etọn ji gba, ṣigba do Jiwheyẹwhe . . . ji.” (Lomunu lẹ 9:16) Hogbe lọ “yin vivọji” sọgan sọ yin lilẹdo “yin jiji sọn aga,” nado dohia dọ mẹhe na yin vivọji lẹ nọ yin dide “sọn aga,” kavi sọn Jiwheyẹwhe dè.​—Johanu 3:3, nudọnamẹ odò tọn.