Ylando zẹẹmẹdo nuyiwa, numọtolanmẹ kavi linlẹn depope he jẹagọdo nujinọtedo Jiwheyẹwhe tọn lẹ. E nọ dlẹnalọdo osẹ́n Jiwheyẹwhe tọn lẹ gbigbà gbọn nuhe ylan kavi nuhe ma sọgbe to nukun Jiwheyẹwhe tọn mẹ lẹ wiwà dali. (1 Johanu 3:4; 5:17) Biblu sọ dohia dọ ylando sọgan sọ zẹẹmẹdo awugbopo nado wà nude, enẹ wẹ awugbopo nado wà nuhe sọgbe.​—Jakọbu 4:17.

 To ogbè dowhenu tọn he mẹ Biblu yin kinkan te lẹ mẹ, hogbe voovo he yin lilẹdo ylando zẹẹmẹdo “awugbopo nado jẹ nude kọ̀n,” kavi yanwle de kọ̀n. Di apajlẹ, awhànfuntọ Islaeli hohowhenu tọn delẹ yọ́n akòtopẹ́ yìn sọmọ bọ yé sọgan yìn in bọ ‘e ma na gbọ.’ Zẹẹmẹ hogbe ehelẹ tọn to paa mẹ wẹ “e ma na waylando.” (Whẹdatọ 20:16) Enẹwutu, ylando zẹẹmẹdo ma nado jẹ nujinọtedo pipé Jiwheyẹwhe tọn lẹ kọ̀n.

 Jiwheyẹwhe tindo jlọjẹ nado ze nujinọtedo lẹ dai na gbẹtọvi lẹ, na ewọ wẹ Mẹdatọ mítọn. (Osọhia 4:11) Ewọ wẹ mí na dogbè nuyiwa mítọn lẹ tọn na.​—Lomunu lẹ 14:12.

Be e yọnbasi nado dapana ylando mlẹnmlẹn ya?

 Lala. Biblu dọ dọ “mẹlẹpo wẹ ko waylando bo whete do gigo Jiwheyẹwhe tọn go.” (Lomunu lẹ 3:23; 1 Ahọlu lẹ 8:46; Yẹwhehodọtọ 7:20; 1 Johanu 1:8) Naegbọn e do yinmọ?

 Gbẹtọvi tintan lẹ, yèdọ Adam po Evi po ma yin ylandonọ to bẹjẹeji, na yé yin didá taidi mẹpipe to apajlẹ Jiwheyẹwhe tọn mẹ. (Gẹnẹsisi 1:27) Ṣigba, yé vẹtolina Jiwheyẹwhe bo hẹn pipé-yinyin yetọn bu. (Gẹnẹsisi 3:5, 6, 17-19) Whenue yé wà ji ovi lẹ, yé jo ogú ylando po mape po tọn na yé. (Lomunu lẹ 5:12) Dile Ahọlu Davidi Islaeli tọn dọ do, ‘ylanwiwa mẹ wẹ yè ji mi te.’​—Psalm 51:5.

Be ylando delẹ sinyẹn hú devo lẹ wẹ ya?

 Mọwẹ. Di apajlẹ, Biblu dọ dọ sunnu Sodọmi hohowhenu tọn lẹ yin “mẹylankan ylandonọ gbau” bọ ylando yetọn yin “adinu gbau.” (Gẹnẹsisi 13:13; 18:20) Onú atọ̀n delẹ die he nọ do obá he mẹ ylando de sinyẹn jẹ hia.

1.   Obá he mẹ e ylan jẹ. Biblu na mí avase nado dapana ylando sinsinyẹn delẹ taidi fẹnnuwiwa zanhẹmẹ tọn, boṣiọ-sinsẹ̀n, ajo, ahànnumu, alọslonamẹ, mẹhuhu po afinyọnnuwiwa po. (1 Kọlintinu lẹ 6:9-11; Osọhia 21:8) Biblu dohia dọ ehelẹ gbọnvona ylando he yin wiwà to mayọnẹn mẹ kavi matin lẹnpọn lẹ, taidi nado dọho kavi yinuwa to aliho he na gbleawuna mẹdevo lẹ mẹ. (Howhinwhẹn lẹ 12:18; Efesunu lẹ 4:31, 32) Etomọṣo, Biblu na mí tuli ma nado yí nukunpẹvi do pọ́n ylando depope, na yé sọgan hẹn mí nado gbàsẹ́n Jiwheyẹwhe tọn lẹ to aliho he sinyẹn hugan mẹ.​—Matiu 5:27, 28.

2.   Mẹwhinwhàn. To whedelẹnu, mẹde sọgan waylando de na e ma yọ́n nubiọtomẹsi Jiwheyẹwhe tọn lẹ wutu. (Owalọ lẹ 17:30; 1 Timoti 1:13) Dile etlẹ yindọ Biblu ma suwhẹna ylando mọnkọtọn lẹ, e do vogbingbọn hia to ylando enẹlẹ po dehe bẹ osẹ́n Jiwheyẹwhe tọn gbigbà sọn ojlo mẹ wá hẹn lẹ po ṣẹnṣẹn. (Osọha lẹ 15:30, 31) “Ayiha ylankan” wẹ nọ hẹnmẹ nado waylando sọn ojlo mẹ wá.​—Jelemia 16:12.

3.   Lehe e jẹ whẹwhẹ do. Biblu sọ dohia dọ vogbingbọn tin to ylando he yin wiwà whladopo po ylando he yin hinhẹn zun aṣa na ojlẹ dindẹn po ṣẹnṣẹn. (1 Johanu 3:4-8) Mẹhe “nọ hẹn ylando zun aṣa sọn ojlo mẹ wá,” etlẹ yin to whenue yé ko plọn nado wà nuhe sọgbe godo lẹ nọ mọ whẹdida whẹgbledomẹ tọn yí sọn Jiwheyẹwhe dè.​—Heblu lẹ 10:26, 27.

 Mẹhe waylando sinsinyẹn lẹ sọgan nọ tindo numọtolanmẹ flumẹjijẹ tọn na nuṣiwa yetọn lẹ wutu. Di apajlẹ, Ahọlu Davidi wlan dọmọ: “Ylanwiwa ṣie ṣinyọ́n ota na mi; di agbàn pinpẹn, e pẹ̀n hugan mi.” (Psalm 38:4) Ṣigba, Biblu namẹ todido dọmọ: “Mẹylankan ni gbẹ́ aliho etọn dai, mawadodonọ linlẹn etọn: bo gbọ e ni gọ̀ do OKLUNỌ dè, ewọ nasọ wàlẹblanuna ẹn, podọ do Jiwheyẹwhe mítọn dè, e nasọ jona susugege.”​—Isaia 55:7.