Biblu ma dọho tlọlọ gando alọgigọ nado hù mẹhe to azọ̀n jẹmagbọ de jẹ kavi mẹhe gbleawu sinsinyẹn de go gba. a Amọ́, nue e dọ gando ogbẹ̀ po okú po go gọalọna mí nado yọ́n nue sọgbe. Nugbo wẹ dọ e ma sọgbe nado hùmẹ, amọ́ mí ma to dandannu glọ nado hẹn ogbẹ̀ mẹde tọn dote eyin e ko họnwun dọ mẹlọ na kú janwẹ.

 Biblu dọ dọ Jiwheyẹwhe wẹ Mẹdatọ mítọn, yèdọ “asisa ogbẹ̀ tọn.” (Salmu lẹ 36:9; Owalọ lẹ 17:28) Ogbẹ̀ họakuẹ taun to nukun Jiwheyẹwhe tọn mẹ. Enẹwutu, Jiwheyẹwhe gbẹwanna mẹdevo kavi mẹdetiti hùhù. (Eksọdusi 20:13; 1 Johanu 3:15) Humọ, Biblu dọ dọ mí dona wà nue go mí pé nado basi hihọ́na ogbẹ̀ mítọn po mẹdevo lẹ tọn po. (Deutelonomi 22:8) E họnwun dọ Jiwheyẹwhe jlo dọ mí ni nọ yí nukun nujọnu tọn do pọ́n ogbẹ̀.

Eyin todido masọ tin ba lo?

 Biblu ma kẹalọyi dọ yè ni hù mẹde eyin etlẹ ko họnwun dọ mẹlọ na kú janwẹ. Apajlẹ Ahọlu Sauli Islaeli tọn do ehe hia. To whenue e gbleawu sinsinyẹn to awhàngbenu, e biọ to hihọ́-basinamẹtọ etọn si nado hù i. (1 Samuẹli 31:3, 4) Hihọ́-basinamẹtọ lọ gbẹ́. Amọ́, dawe devo wá dolalo dọ emi gọalọ nado hù Sauli dile e biọ do. Davidi, yèdọ mẹhe tindo linlẹn Jiwheyẹwhe tọn gando whẹho lọ go gblewhẹdo dawe lọ bo ylọ ẹ dọ hùnhọ́dutọ.​—2 Samuẹli 1:6-16.

Be ninọmẹ lẹpo mẹ janwẹ yè dona hẹn ogbẹ̀ dote te ya?

 Biblu ma biọ dọ yè ni hẹn ogbẹ̀ mẹde tọn dote eyin e ko họnwun dọ mẹlọ na kú gba. Kakatimọ, Biblu gọalọna mí nado nọ jlẹkaji. Kẹntọ daho wẹ okú yin na mí, yèdọ kọdetọn ylando he mí dugu etọn tọn. (Lomunu lẹ 5:12; 1 Kọlintinu lẹ 15:26) Nugbo wẹ dọ mí ma nọ jlo nado kú, amọ́ mí ma dona nọ dibuna okú, na Jiwheyẹwhe dopà nado fọ́n mẹhe ko kú lẹ. (Johanu 6:39, 40) Mẹhe tindo sisi na ogbẹ̀ nọ dín nukunpedomẹgo dotowhé tọn dagbe he tin-to-aimẹ lẹ. Amọ́, enẹ ma biọ dọ yè ni dín nukunpedomẹgo he na zọ́n bọ yè na hẹn ogbẹ̀ dote to whenuena e ko họnwun dọ todido de ma tin.

Be ylando he ma tindo jona de wẹ mẹdetiti hùhù yin ya?

 Lala, Biblu ma dọ dọ mẹdetiti hùhù yin ylando he ma tindo jona gba. Dile etlẹ yindọ mẹdetiti hùhù yin ylando sinsinyẹn de, b Jiwheyẹwhe nọ mọnukunnujẹemẹ eyin nudelẹ taidi apọ̀nmẹ-zọ̀n, flumẹjijẹ sinsinyẹn kavi etlẹ yin azọ̀n de he yè dugu etọn zọ́n bọ mẹde hù ede. (Salmu lẹ 103:13, 14) Ewọ nọ miọnhomẹna mẹhe to ayimajai mẹ lẹ gbọn Biblu gblamẹ. Humọ, Biblu dọ dọ “fọnsọnku dodonọ lẹ po mawadodonọ lẹ po tọn de” na tin. (Owalọ lẹ 24:15) Ehe dohia dọ todido fọnsọnku tọn tin na mẹhe ko ṣinuwa sinsinyẹn lẹ, etlẹ yin na mẹhe hù ede.