Hogbe Glẹki tọn na owe Biblu tọn he yin Osọhia, yèdọ A·po·kaʹly·psis (apokalipsi), zẹẹmẹdo “Hunhundonuvo” kavi “Didehia.” Yinkọ ehe do zẹẹmẹ Osọhia tọn hia—e nọ hùn whẹho he yin whiwhla lẹ do nùvo bo nọ de nujijọ he na wá jọ ojlẹ dindẹn to kinkan etọn godo lẹ hia. Susu to dọdai he e dọ lẹ mẹ ma ko mọ hẹndi todin.

Bladopọ nuhe tin to owe Osọhia tọn mẹ lẹ tọn

•   Homẹbibiọ.​—Osọhia 1:​1-9.

•   Wẹndomẹ Jesu tọn lẹ hlan agun ṣinawe lẹ.​—Osọhia 1:10–​3:​22.

•   Numimọ de he do Jiwheyẹwhe hia to ofìn olọn mẹ tọn etọn ji.—Osọhia 4:1-​11.

•   Numimọ debọdo-dego lẹ, he dopodopo deananamẹ jẹ devo kọ̀n:

  •   Hiadonu ṣinawe lẹ.​—Osọhia 5:1–​8:6.

  •   Opẹ̀n ṣinawe lẹ, he atọ̀n he gbọngodo lẹ hẹn dindọn lẹ wá.​—Osọhia 8:7–​14:20.

  •   Agbán ṣinawe lẹ, he dopodopo bẹ azọ̀nylankan de hẹn he nọtena whẹdida Jiwheyẹwhe tọn he na yin kinkọnjẹgbonu do aigba ji.​—Osọhia 15:1–​16:21.

  •   Numimọ lẹ gando vasudo kẹntọ Jiwheyẹwhe tọn lẹ tọn go.​—Osọhia 17:1–​20:10.

  •   Numimọ lẹ gando dona he wá sọn Jiwheyẹwhe dè na olọn po aigba po lẹ go.​—Osọhia 20:11–​22:5.

•   Tadona.​—Osọhia 22:​6-​21.

Afọdide lẹ nado mọnukunnujẹ owe Osọhia tọn mẹ

1.   Zẹẹmẹ etọn gọ́ na pọndohlan dagbe, e ma nọ dobuna mẹhe nọ sẹ̀n Jiwheyẹwhe lẹ gba. Dile etlẹ yindọ mẹsusu nọ pọ́n hogbe lọ “apokalipsi” taidi nugbajẹmẹji daho de, owe Osọhia tọn bẹjẹeji bosọ fó po hodidọ lọ po he dohia dọ mẹhe nọ hia bo nọ mọnukunnujẹemẹ bosọ nọ yí wẹndomẹ etọn lẹ do yizan mẹ lẹ na yin ayajẹnọ.​—Osọhia 1:3; 22:7.

2.   Osọhia yí “ohia lẹ” kavi yẹhiadonu lẹ he ma dona yin nukunnumọjẹemẹ to paa mẹ poun lẹ zan.​—Osọhia 1:1.

3.   Susu mẹhe Osọhia dọho yetọn lẹ tọn gọna susu yẹhiadonu he to e mẹ lẹ tọn ko yin hodọdeji jẹnukọn to Biblu mẹ:

   •   Jehovah​—“Jiwheyẹwhe nugbo lọ to olọn mẹ” podọ Didatọ nulẹpo tọn.​—Deutelonomi 4:39; Salmu lẹ 103:19; Osọhia 4:11; 15:3.

   •   Jesu Klisti​—“Lẹngbọvu Jiwheyẹwhe tọn lọ.”​—Johanu 1:29; Osọhia 5:6; 14:1.

   •   Satani Lẹgba​—kẹntọ Jiwheyẹwhe tọn.​—Jenẹsisi 3:14, 15; Johanu 8:44; Osọhia 12:9.

   •   Babilọni Daho lọ​—taidi Babilọni hohowhenu tọn (Babẹli), he yin kẹntọ Jehovah Jiwheyẹwhe po omẹ etọn lẹ po tọn bosọ yin asisa sinsẹ̀n lalo lẹ tọn.​—Jenẹsisi 11:2-9; Isaia 13:1, 11; Osọhia 17:4-6; 18:4, 20.

   •   “Ohù”​—yèdọ gbẹtọvi ylankan lẹ he jẹagọdo Jiwheyẹwhe.​—Isaia 57:20; Osọhia 13:1; 21:1.

   •   Adà voovo lẹ he sọzẹn hẹ gòhọtúntún hohowhenu tọn he yin yiyizan na sinsẹ̀n-bibasi Jiwheyẹwhe tọn​—ehe bẹ aki alẹnu tọn hẹn, gọna ohù mẹpọ́nnu tọn (basia alọ kiklọ tọn), miyọ́ngbán lẹ, nuyọnwan lẹ mimẹ̀ po agbà avọ́sinsan tọn de po.​—Eksọdusi 25:10, 17, 18; 40:24-32; Osọhia 4:5, 6; 5:8; 8:3; 11:19.

   •   Gbekanlin lẹ​—he nọtena gandudu gbẹtọvi tọn lẹ.​—Daniẹli 7:1-8, 17-26; Osọhia 13:2, 11; 17:3.

   •   Sọha he yin yiyizan to yẹhiadonu-liho lẹ.​—Osọhia 1:20; 8:13; 13:18; 21:16.

4.   Numimọ lọ lẹ gando “azán Oklunọ tọn” lọ go, ehe bẹjẹeji to whenue Ahọluduta Jiwheyẹwhe tọn yin didoai to 1914 bọ Jesu jẹ gandu ji taidi Ahọlu. (Osọhia 1:10) Enẹwutu, mí sọgan donukun dọ hẹndi tangan Osọhia tọn na wá to ojlẹ mítọn mẹ.

5.   Nado mọnukunnujẹ owe Osọhia tọn mẹ, mí tindo nuhudo nudopolọ tọn he na gọalọna mí nado mọnukunnujẹ pipotọ Biblu tọn mẹ, ehe bẹ nuyọnẹn Jiwheyẹwhe tọn po alọgọ sọn mẹhe ko mọnukunnujẹemẹ lẹ dè po hẹn.​—Owalọ lẹ 8:26-39; Jakọbu 1:5.