Sọha ovi he do alokan lẹ tọn fọ́n bo to susudeji, a podọ susu to yé mẹ wẹ nọ yì Intẹnẹt ji po e po to whenue yé to yedeṣo to abò yetọn mẹ. Owù tẹlẹ wẹ to e mẹ eyin a dike bọ ovi towe jẹ alokan zan ji. Ale tẹlẹ wẹ to e mẹ, eyin e do alokan? Ojlẹ nẹmu wẹ a na jlo dọ ovi towe ni zan alokan na to gbèdopo?

•  Nuhe a dona yọnẹn

•  Kanbiọ he a dona kanse

•  Kanse dewe eyin a ko wleawufo

 Ale He to E mẹ Lẹ

•   E nọ zọ́n bọ ovi lẹ nọ to hihọ́ glọ bọ ayiha mẹjitọ lẹ tọn nọ vò. Onọ̀ de he nọ yin Bethany bo do ovi awe he to aflanmẹ lẹ dọ dọ, “Aihọn owùnọ de mẹ wẹ mí te, enẹwutu nujọnu wẹ eyin dọ ovi lẹ ni do nue yé nado nọ ylọ mẹjitọ yetọn lẹ.”

   Onọ̀ de he nọ yin Catherine yidogọ dọ, “Aplikasiọn delẹ tin bọ a gán zan do yọ́n fihe ovi towe te. Eyin mọto kùn wẹ e te, a gán yọ́n obá he mẹ e to wezunhọ̀n jẹ.”

•   E nọ gọalọ nado wà wehọmẹ-zọ́n lẹ. Onọ̀ de he nọ yin Marie dọ dọ, “E nọ wá jọ bọ mẹplọntọ lẹ nọ sẹ́ azọ́n wehọmẹ tọn do ovi lẹ gbọn Intẹnẹt ji kavi gbọn wekanhlanmẹ alokan tọn ji, podọ ovi lẹ lọsu gán yí aliho dopolọ zan do dọho hẹ mẹplọntọ yetọn lẹ.”

 Owù He to E mẹ Lẹ

•   Ovi lẹ gán nọ zan alokan na gànhiho susu. To azán dopodopo ji, ovi lẹ nọ zan alokan yetọn na gànhiho susu. Nado dọ hójọhó, dile mẹjitọ lẹ nọ zan alokan na whenu susu do, mọ wẹ yé sọ nọ zan whenu susu nado dọ hójọhó hẹ ovi yetọn lẹ do ga. Weyọnẹntọ de dọ dọ, “ninọmẹ whẹndo delẹ tọn taidi dọ mẹhe ma yọ́n yede pọ́n lẹ wẹ pli nkọ bọ yé ma gán gọ̀n ofẹ̀n ma whè do alokan kavi nuyizan mọnkọ lẹ mẹ.” b

•   Yé gán nọ pọ́n yẹdide gblewa tọn lẹ. Sọhayinanú de dohia dọ hugan mado awe jọja aflanmẹ lẹ tọn wẹ nọ pọ́n video kavi yẹdide gblewa tọn lẹ to sunmẹsunmẹ, enẹ ma yin nupaṣamẹ de na e bọawu taun nado yí alokan do dín onú enẹlẹ mọ. Otọ́ de he nọ yin William bo do ovi awe he to aflanmẹ lẹ dọ dọ, “Eyin mẹjitọ lẹ dike bọ ovi yetọn jẹ alokan zan ji, to mayọnẹn mẹ yé gán hùn dotẹnmẹ dote na ovi lọ nado nọ pọ́n video gblewa tọn lẹ to fidepope.”

•   Yé gán pò na alokan kẹdẹ. Mẹsusu ma nọ jlo dọ alokan ni dẹn do yé. Eyin omẹ mọnkọ lẹ ba alokan yetọn pò, yé nọ to budi bo nọ to nuhà, podọ yé tlẹ gán bẹ azọ̀n. Mẹjitọ delẹ doayi e go dọ, eyin ovi yetọn lẹ to alokan zan yé ma nọ símẹ. Onọ̀ de he nọ yin Carmen dọ dọ, “Whedelẹnu, eyin n’jlo na dọhona ovi ṣie, e nọ pọ́n unklọ̀ mi kavi ylangbè na mi, na e ma nọ jlo na jo alokan do wutu.”

•   Owù devo he to e mẹ lẹ. Alokan ṣiṣizan gán zọ́n bọ mẹde na nọ vannukundomẹ to Intẹnẹt ji kavi dọ ni nọ kàn hogbe gblewa tọn lẹ sẹdo mẹlẹ, podọ mẹlọ tlẹ gán bẹ azọ̀n delẹ na lee e nọ nọ̀ do zan alokan kavi na e ma nọ damlọn ganji wutu. Jọja delẹ nọ zan aplikasiọn wunmẹ de he nọ di aplikasiọn tata de poun bo gán do ohia azọ́nwanu nulinlẹn tọn (calculatrice), podọ yé nọ sẹ̀ nuhe yé ma jlo dọ mẹjitọ yetọn lẹ ni mọ whè do e mẹ.

   Otọ́ de he nọ yin Daniel bo do viyọnnu aflanmẹ de, dọ ẹ dole: “Alokan he sọgan yì Intẹnẹt ji gán zọ́n bọ ovi towe na nọ mọ nue to Intẹnẹt ji lẹpo—vlavo nudagbe kavi nuylankan.”

•   ‘Be ovi ṣie do hudo alokan tọn ya?’

   Biblu dọ dọ: “Zinzintọ nọ lẹnnupọndo afọdide dopodopo ji.” (Howhinwhẹn lẹ 14:15) Hẹn wefọ lọ do ayiha mẹ, bo kanse dewe dọ:

   ‘Be e na yin nuyọnẹnnu dọ ovi ṣie ni do alokan na whẹho hihọ́ tọn kavi na nudevo wutu ya? Be n’ko lẹnnupọndo ale gọna owù he to e mẹ lẹ ji ya? Be ovi ṣie gán zan alokan he ma nọ yì Intẹnẹt ji ya?’

   Otọ́ de he nọ yin Todd dọ dọ, “Alokan he ma nọ yì Intẹnẹt ji lẹ tin bọ a gán họ̀ na ovi towe nado nọ ylọ ẹ bosọ nọ kannu hlan ẹn. E nasọ zọ́n bọ a ma na hẹn akuẹ susu gú.”

•   ‘Be ovi ṣie ko pé ede ji ya?’

   Biblu dọ dọ: “Ahun nuyọnẹntọ tọn nọ plan ẹn gbọn aliho jijlọ ji.” (Yẹwhehodọtọ 10:2) Hẹn wefọ lọ do ayiha mẹ, bo kanse dewe dọ:

   ‘Etẹwẹ dohia dọ n’gán dejido ovi ṣie go? Be e yin mẹde bo nọ voawu nado dọ homẹ na mi ya? Be e nọ dọ nugbo na mi ya, kavi e nọ whlá họntọn etọn lẹ do mi? Be e yọ́n lee e na nọ duto ede ji do, eyin e to Televiziọn pọ́n, to tablẹti kavi ọdinatẹẹ zan ya?’ Onọ̀ de he nọ yin Serena dọ dọ, “Azọ́nwanu dagbe de wẹ alokan yin, amọ́ e sọ bẹ owù hẹn taun. Enẹwutu, lẹnnupọndo agbàn he a gán to zizedo kọ̀ji na ovi towe to mayọnẹn mẹ ji whenue e ma ko do numimọ sọmọ.”

•   ‘Be yẹnlọsu ko wleawufo ya?’

   Biblu dọ dọ: “Plọn ovi do aliho he ewọ dona gbọn ji.” (Howhinwhẹn lẹ 22:6, Odò.) Hẹn wefọ lọ do ayiha mẹ, bo kanse dewe dọ:

   ‘Be n’yọ́n alọ alokan tọn nado plọn ovi ṣie lee e na nọ dapana owù lẹ do ya? Be n’yọ́n nue na zín to alokan lọ ji bọ n’na do yọ́n lee ovi ṣie to alokan lọ zan do ya? Nawẹ n’na gọalọna ovi ṣie nado nọ basi nudide dagbe lẹ to whenue e to alokan zan gbọn?’ Daniel, otọ́ he go mí donù wayi dọ dọ, “N’ko mọ mẹjitọ susu bọ yé nọ na alokan ovi yetọn poun bo ma tlẹ nọ kiya na lee ovi lọ to zinzan ẹn do.”

 Nuagokun lọ die: Nujọnu wẹ e yindọ yè ni plọn ovi lẹ ma nado nọ ṣì alokan zan. Owe de he nọ yin Indistractable dọ dọ, “E na vẹawu taun na ovi susu ma nado nọma whè ofẹ̀n do alokan mẹ whelẹponu, titengbe eyin yé ma to anademẹ mẹjitọ de tọn glọ.”