Asi etọn gbò e do. E vẹvẹna ẹn taun. E dopà nado jo yẹdide gblewa tọn pinpọn do—bosọ doalọte na ojlẹ de. Enẹgodo, e sọ gọ̀ aṣa etọn hoho bẹ bọ asi ẹ sọ gbò e do, e sọ vẹvẹ bo dopà dile e ko nọ wà do.

 Be mọ e te na hiẹ lọsu ya? Eyin mọ wẹ, a dona yọ́n lehe yẹdide fẹnnuwiwa tọn he a nọ pọ́n to awugblena alọwlemẹ towe do gọna nuhe a gán wà nado jo aṣa enẹ do petepete. a

To hosọ ehe mẹ, mí na dọhodo nuhe bọdego lẹ ji:

•  Nuhe a dona yọnẹn

•  Nuhe a sọgan wà

•  Eyin asu towe nọ pọ́n yẹdide gblewa tọn

 Yẹdide gblewa tọn pinpọn gán hẹn alọwle de gbà. E nọ zọ́n bọ alọwlemẹ homevọnọ lọ nọ hẹn awetọ etọn do homẹ bo masọ nọ dejidego paali ba. b

 Asi de he asu etọn nọ pọ́n yẹdide fẹnnuwiwa tọn gán tindo numọtolanmẹ he bọdego lẹ:

•   E gán nọ mọdọ yè zan emi. Asi de he nọ yin Sarah dọ dọ, “E nọ di na mi dọ asu ṣie ko deayọ whlasusu wẹ nkọ.”

•   E gán nọ mọdọ emi ma jẹna ẹn. Asi de dọ dọ na asu emitọn nọ saba pọ́n yẹdide gblewa tọn wutu, emi nọ mọ to emide mẹ dọ “emi ma yọnwhanpẹ bọ winyan emide tọn sọ nọ hù emi.”

•   E ma na nọ dejidego ba. Asi de he nọ yin Helen dọ dọ “N’nọ do ayihaawe gando nuhe wà asu ṣie te lẹpo go.”

•   E na nọ to nuhà mapote. Asi de he nọ yin Catherine dọ dọ, “Nuhiha gando aṣa he do asu ṣie te go wá húagbọ́ mi pete.”

 Lẹnnupọndo ehe ji: Biblu dohia dọ asu de dona yiwanna asi etọn. (Efesunu lẹ 5:25) Be mí gán dọ dọ asu de to mọwà eyin nuyiwa etọn lẹ nọ zọ́n bọ asi etọn nọ do numọtolanmẹ he go mí donù to aga enẹlẹ ya?

 E ma nọ fá yè do nọ jo yẹdide fẹnnuwiwa tọn pinpọn do. Asi de he nọ yin Stacey dọ dọ “Asu ṣie jo siga-nùnù, amasin adínọ po ahàn sinsinyẹn ṣiṣizan po do, amọ́ e ma ko penugo nado jo yẹdide gblewa tọn pinpọn do.”

 Eyin ninọmẹ mọnkọ mẹ wẹ a te, ayinamẹ he bọdego lẹ gán gọalọna we nado jo aṣa enẹ do pete.

•   Yọ́n nuhewutu yẹdide gblewa tọn pinpọn do ylan. Yẹdide fẹnnuwiwa tọn pinpọn gán zọ́n bọ mẹde na gbọn ṣejannabi dali wà nuhe e lẹndọ e na hẹn awuvivi wá na emi. Podọ ehe nọ dekanpona owanyi, jidide po nugbonọ-yinyin po he yin dandan na alọwle de nido yin ayajẹnọ. E sọ nọ do sisi matindo hia Jehovah Jiwheyẹwhe he do alọwle ai.

   Ayinamẹ Biblu tọn: “Mì gbọ alọwle ni tindo gbégbò.”—Heblu lẹ 13:4.

•   Kẹalọyi nuṣiwa towe. Ma nọ dín whẹjijọ blo dọ ‘Eyin asi ṣie ko nọ wlebòna mi ganji dai wẹ, n’ma na nọ pọ́n yẹdide gblewa tọn.’ E ma sọgbe nado nọ dowhẹ asi towe, podọ a gán nọ yí enẹ do mọ whẹjijọ de poun nado nọ pọ́n yẹdide fẹnnuwiwa tọn eyin asi towe hẹn we jẹflumẹ.

   Ayinamẹ Biblu tọn: “Mẹdopodopo nọ yin whiwhlepọn dile e yin dindọn yì bo yin omọ̀ do na gbọn ojlo edetiti tọn dali.”—Jakọbu 1:14.

•   Nọ dọhodopọ hẹ alọwlemẹ towe bo nọ dọ nugbo na ẹn. Asu de he nọ yin Kevin dọ dọ: “To pọmẹ hẹ asi ṣie, mí nọ gbeje nuhe n’ko pọ́n to alokan kavi ọdinatẹẹ ṣie ji lẹ pọ́n egbesọegbesọ nado yọnẹn eyin n’gọ̀ nuhe ma sọgbe de pọ́n kavi dapana ẹn. Hodọdopọ whẹwhẹ ehe zọ́n bọ n’masọ nọ ze nude whlá do asi ṣie ba.”

   Ayinamẹ Biblu tọn: “Mí jlo nado nọ yinuwa po ahundopo po to nulẹpo mẹ.”—Heblu lẹ 13:18.

•   Nọ nọ̀ aṣeji. Yè gán gọ̀ aṣa hoho de bẹ etlẹ yin to owhe susu godo whenue yè lẹndọ yè ko dudeji. Kevin, he go mí donù wayi dọ dọ: “N’tẹnpọn nado duto yẹdide gblewa tọn pinpọn ji na owhe ao bo lẹndọ n’ko dogodo aṣa enẹ wẹ sin. Amọ́, adọ̀ aṣa lọ tọn gbẹ́ to finẹ fẹẹ, bo nọ to tepọn ojlẹ he sọgbe lọ nado tọ́nkun.”

   Ayinamẹ Biblu tọn: “Mì gbọ mẹhe lẹndọ emi to ote ni payi, na e nikaa jai.”—1 Kọlintinu lẹ 10:12.

•   Eyin a yin whiwhlepọn nado pọ́n, nọ yiagbọji. Dile etlẹ yindọ a gán nọma penugo nado glọnalina ojlo lọ nado fọ́n, a gán de eyin vlavo a na joawuna ẹn kavi nọavùnte sọta ẹ. Ojlo lọ na yawu wayi, etlẹ yin to ojlẹ kleun de godo eyin a plọn nado nọ de ayiha sọn e ji bo lẹnnupọndo nudevo lẹ ji.

   Ayinamẹ Biblu tọn: “Dopodopo mìtọn ni yọ́n lehe e na nọ deanana agbasa etọn titi do to wiwe-yinyin po gbégbò po mẹ, e ma yin to nukunkẹn po ojlo zogbe zanhẹmẹ tọn po mẹ.”— 1 Tẹsalonikanu lẹ 4:4, 5.

•   Dapana ninọmẹ he gán zọ́n bọ a na gọ̀ yẹdide gblewa tọn pọ́n lẹ. Owe de dọ dọ, “Tlolo he a biọ ninọmẹ he gán whlé we pọ́n de mẹ, e gán taidi dọ a gbò ṣána de wẹ nkọ. Bọ nuhe pò ma hugan yovomi vude poun . . . na miyọ́n lọ nido wle.”—Willpower’s Not Enough.

   Ayinamẹ Biblu tọn: “Na nuylankan de ni ma duto ji e blo.”—Salmu lẹ 119:133.

•   Ma hẹn todido bu blo. E gán biọ ojlẹ susu—etlẹ yin owhe lẹ—whẹpo alọwlemẹ towe nido sọgan wá vọ́ jidedo gowe. Etomọṣo, numimọ he mẹdelẹ tindo dohia dọ enẹ yọnbayi.

   Ayinamẹ Biblu tọn: “Owanyi nọ fahomẹ.”—1 Kọlintinu lẹ 13:4.