Yi yaa bangi biibili yeni leni Jeova Siedo, li baa fidi ke yi yen liidi bogini yiba ke o daa cua. Yi yaa bua gbadi taanli kuli maama fuuli, yaala ŋani ki cie tie, yin bogini yiba. Moandi-​mani laa boginma n da mibidi.

Lingi-​mani o kaanu leni yaa yogunu n dagidi yipo. Ole yogunu ke yi baa fidi bangi leni mi yanduama? Li tie ku tiŋaagu panpangu bi ku yenjuogu yaa yogunu ke bi niba gua, ke o lanbu ki ye? Ba-​mani li lenli mi bangima po. Baa li yaa sua ke laa lenli ki fu, yin da ŋan bonli bakuli n jidi la. Lingi-​mani yaa kaanu n tie suoo ke fuugu ki ye, ki gbindi yi radio, yi tele leni yi kankalafo. Jaani-​mani Jeova, ki di yuandi cili yi bangima. Li baa todi yi yama n duani ki U Tienu maama bangima n kua yi pali nni.​—⁠Filipi Yaaba 4:​6, 7.

Lingi-​mani buali kuli lebidima ki bogini yin baa lebidi-​o maanma. Cogi-​mani cagili kuli mayulicianli. Diidi-​mani laa cagili mayulibila n tuugi leni li mayulicianli yeni maanma. Diidi-​mani foto leni cagili kuli juodima buali yeni, ki le li cagili yantiacianma n tie yaaba. Li baa todi yin gbadi cagili kuli maama fuuli. Lani kuli yaa gbeni cogi-mani a cagibila yeni kuli ki lingi bi buali lebidima. Cogi-mani velse yaala n ye li niinni. Yi baa le ke laa velsenba wangi ke a cagibila yeni kuli maama tie moamoani. (Jesu Tondiba Tuona 17:⁠11) Yi yaa la a cagibila yeni lebidima, diani-mani yaa mabila n ba todi-​yi, yin tiadi laa lebidima. Lanwani yi yaa gedi li taanli po, yi ba fidi yugidi yi nu ki lebidi i buali yeni.

Yi yaa yen liidi bogini yin ba le yaala ti taana po, li baa todi-​yi, yin bangi biibili nni li “bonpanla”. Li baa pugini yin den peli ki bani yaala.​—⁠Matie 13:⁠51,52.

• Lede ke ti ba bogini tiba ti taana po?

• Ti baa tieni lede ki tiadi yaa buali lebidima ke bi baa buali-​ti li taanli po?