Tin bandi Bibili n yedi yaala waamu yeni, laa puguni ti buama leni Jeova bi? Li ŋani yin moandi laa buama n yaa baa pugudi. (Pieli Tilieli 2:2) Yi yaa baa bangi Bibili yeni, yi danligu leni Jeova ba pugini, yi go ba fidi ki ba yaa miali n kan gbeni.—Cogi mani Jan 17:3; Juda 21.

Yi yaa baa bangi U Tienu ki pugudi, yi dandanli leni o ba puguni. Laa dandanli ba todi-yi, yin tieni wani n bua yaala. (Ebilunba 11:1, 6) Lani go ba todi-yi, yin lebidi yi yama ki mia sugili, ki go lebidi yi yema ki ba ti ñoadi.—Cogi mani Jesu Tondiba Tuona 3:19.

Yi bua nituaba n bandi yin bangi yaala. Nilo yaa cengi u labaaliŋamu yeni, o bua nitaaba moko n cengi o. Yi yaa baa bangi Bibili yeni, li ba todi yi mo n ta Bibili ki waani nitoaba u labaaliŋamu yeni, ki go waani ba yaala n cedi ke yi daani Jeova.—Cogi mani Loma Yaaba 10:13-15.

Bi niba boncianla cili ki togidi u labaaliŋamu maama bi danlinba leni bi buolu yaaba. Ama yi togidi leni mi yanfuoma. Yin da yuani mani bi jaanma ba. Yin yaa wangi ba U Tienu n niani-ti yaala yeni. Ama yin yen tiadi ke bi diidi yi bontienkaala ki cie ban cengi yi maama.—Cogi mani Timoti Tilieli 2:24, 25.

Bibili bangima ba todi-yi, yi dandanli n puguni. Waamu-waamu yi ba ti yedi Jeova yi jaanma nni, ke yi bua ta yi yula ki teni o. Lani n tie tipo ti jigidi. Yi baa ba ki taani leni yaaba n tiendi U Tienu yanbuama.—Cogi mani Kolinta Yaaba Tilieli 6:18.

Yi yaa baa bangidi U Tienu maama, yi bangima ba puguni. (Ebilunba 5:13-14) Mia mani Jeova siedinba n cua bangi yi Bibili ki puguni leni yaa tili n tie nne Qu’enseigne réellement la Bible ? Yi Bibili bangima yaa baa caa liiga, yi yema baa ba ŋalibalika cianli.—Cogi mani Pisoma 1:1-3; 73:27, 28.

U labaaliŋamu yeni ñani Jeova kani, yua n tie li pamanli daano. Yi yaa taagi leni o niba, yi baa ba o danligu. (Ebilunba 10:24, 25) Yin yaa moandi mani ki tuo Jeova, yene ke yi ba-ti ba yaa miali n kan gbeni. Bonla ki ye ke o ñoadi pundi tin ba tua Jeova danli.—Cogi mani Timoti Tikpiali 1:11; 6:19.