Ua hoʻohui ke Akua i nā mamo a ʻAberahama i hoʻokahi lāhui a ua hāʻawi iā lākou i nā kānāwai. Ua kapa inoa ʻo ia i kēia lāhui, ʻo “ʻIseraʻela”, a hāʻawi na lākou ke kuleana e mālama i ka hoʻomana ʻoiaʻiʻo a me kāna ʻōlelo. (Halelū 147:​19, 20) I pōmaikaʻi ko nā ʻāina a pau ma muli o ʻIseraʻela.​—E heluhelu iā Kinohi 22:18.

Ua koho ke Akua i ka poʻe ʻIseraʻela e lilo i mau hōʻike nona. Ma ka nānā ʻana i ko lākou mau moʻolelo kahiko, ʻike kākou, pōmaikaʻi ka poʻe ke hahai lākou i nā kānāwai o ke Akua. (Kānāwai Lua 4:6) No laila, ma o ka poʻe ʻIseraʻela, hiki i nā kānaka a pau ke ʻike i ke Akua ʻoiaʻiʻo.​—E heluhelu iā ʻIsaia 43:​10, 12.

Ma hope aku, ua pau ka ʻoluʻolu o ke Akua i ka poʻe ʻIseraʻela, a ua kuapo ʻia kēlā lāhui me ke anaina Kalikiano. (Mataio 21:43; 23:​37, 38) I kēia manawa, ʻo nā Kalikiano ʻoiaʻiʻo ka poʻe hōʻike no Iēhova.​—E heluhelu iā ʻOihana 15:​14, 17.

Ua hoʻonohonoho ʻo Iesū i ka poʻe hahai iā ia, no ka haʻi ʻana i ka nū hou maikaʻi a me ka hoʻohaumāna ʻana i nā lāhui kanaka a pau. (Mataio 10:​7, 11; 24:14; 28:​19, 20) ʻO kēia ka manawa mua loa a Iēhova i hoʻolōkahi ai i nā pāmiliona mai nā lāhui a pau i ka hoʻomana ʻoiaʻiʻo. (Hōʻike ʻana 7:​9, 10) Hoʻonohonoho ʻia nā Kalikiano ʻoiaʻiʻo no ke kōkua ʻana i kekahi i kekahi. A puni ka honua, hui pū lākou ma nā hālāwai, a aʻo lākou i nā mea mai ka Paipala mai.​—E heluhelu iā Hebera 10:​24, 25.

I nā makahiki 1870, ua huli kekahi hui haumāna Paipala e loaʻa hou ka ʻoiaʻiʻo o ka Paipala. Ua hoʻonohonoho ʻo Iesū i ke anaina Kalikiano no ka haʻi ʻeuanelio ʻana, no laila, ua hoʻomaka lākou i kekahi paipai haʻi ʻeuanelio ma ka honua nei a puni. I ka makahiki 1931, ua lawe lākou i ka inoa ʻo Nā Hōʻike a Iēhova.​—E heluhelu iā ʻOihana 1:8; 2:​1, 4; 5:42.

I ke kenekulia mua, ua pōmaikaʻi nā anaina Kalikiano i nā ʻāina like ʻole ma muli o kekahi kino hoʻomalu nāna i ʻike, ʻo Iesū ke Poʻo o ke anaina. (ʻOihana 16:​4, 5) I kēia lā hoʻi, pōmaikaʻi Nā Hōʻike a Iēhova ma muli o kekahi Kino Hoʻomalu o nā lunakahiko mākaukau loa. Alakaʻi lākou i nā keʻena Betela o Nā Hōʻike a Iēhova nāna e unuhi, paʻi, a hoʻolaha i nā palapala aʻo Paipala i loko o nā ʻōlelo he 600 a ʻoi. A no laila, hoʻohana lākou i ka Paipala no ka paipai ʻana a me ke kuhikuhi ʻana i nā anaina he 120,000 a ʻoi a puni ka honua. Ma nā anaina a pau, loaʻa nā kāne mākaukau e lawelawe ana ma ke ʻano he mau lunakahiko. Mālama lākou i nā hipa a ke Akua me ke aloha.​—E heluhelu iā 1 Petero 5:​2, 3.

Hoʻonohonoho ʻia nā Hōʻike a Iēhova no ka haʻi ʻana i ka nū hou maikaʻi a me ke kōkua ʻana i ka poʻe e lilo i mau haumāna na Iesū. E like me ka hana a nā lunaʻōlelo, haʻi ʻeuanelio mākou. (ʻOihana 20:20) Hoʻopaʻa nō hoʻi mākou i ka Paipala me ka poʻe. ʻAʻole Nā Hōʻike a Iēhova he ʻahahui wale nō. He ʻohana mākou, a he Makua aloha ko mākou. (2 Tesalonike 1:3) Hoʻonohonoho ʻia ka poʻe o Iēhova no ka hōʻoluʻolu ʻana i ke Akua a me ke kōkua ʻana iā haʻi, no laila, ʻo lākou ka ʻohana hauʻoli loa o ka honua.​—E heluhelu iā Halelū 33:12; ʻOihana 20:35.