luka ke mutabik khushkhabri 14:1-35
14 ek aur mauke par yeeshu sabt ke din fareesiyon ke ek sardar ke ghar khaane par gaya aur woh us par nazrein jamaye huye the.
2 vahaan uske saamne ek aadmi tha jo jalodar* ka rogi tha.
3 tab yeeshu ne kaanoon ke jaankaron aur fareesiyon se poochha, “kya sabt ke din beemaron ko theek karna sahi hai?”+
4 magar woh khaamosh rahe. tab yeeshu ne us aadmi ko chhookar theek kar diya aur bhej diya.
5 fir yeeshu ne unse kaha, “agar tummein se kisi ka beta ya bail sabt ke din kuyen mein gir jaaye,+ to kaun hai jo use fauran khinchkar baahar nahin nikaalega?”+
6 woh is saval ka javab nahin de sake.
7 iske baad jab usne dekha ki vahaan aaye mehman baithne ke liye kaise khaas-khaas jagah chun rahe hain,+ to usne unse kaha,*
8 “jab koi tujhe shaadi ki daavat ke liye nyauta de, to jaakaar sabse khaas jagah par mat baithna.+ ho sakta hai kisi aur ko bhi nyauta diya gaya ho jo tujhse bhi bada hai.
9 tab jis mezban ne tum donon ko nyauta diya hai woh aakaar tujhse kahega, ‘is aadmi ko yahaan baithne de.’ aur tujhe sharminda hokar vahaan se uthna padega aur jaakaar sabse neechi jagah baithna padega.
10 isliye jab tujhe nyauta mile, to jaakaar sabse neechi jagah par baithna. jab mezban aayega to tujhse kahega, ‘mere dost, vahaan oopar jaakaar baith.’ tab sab mehmanon ke saamne teri izzat badhegi.+
11 kyonki har koi jo khud ko bada banata hai use chhota kiya jaayega aur jo koi khud ko chhota banata hai use bada kiya jaayega.”+
12 iske baad usne apne mezban se kaha, “jab tu dopahar ya shaam ka khaana kare, to apne doston, bhaaiyon, rishtedaron ya ameer padosiyon ko mat bulana. ho sakta hai ki badle mein woh bhi tujhe kabhi khaane par bulayen aur baat barbar ho jaaye.
13 magar jab tu daavat de, to gareebon, apahijon, langdon aur andhon ko nyauta dena.+
14 tab tujhe khushi milegi kyonki tujhe badle mein dene ke liye unke paas kuch nahin hai. jab nek jan dobara zinda kiye jaayenge, tab tujhe iska inam milega.”+
15 ye baatein sunkar vahaan maujood mehmanon mein se ek ne usse kaha, “sukhi hai woh jo parmeshvar ke raaj mein bhojan karega.”*
16 yeeshu ne usse kaha, “ek aadmi ne shaam ke khaane ki aaleeshan daavat rakhi+ aur bahoton ko nyauta diya.
17 jab daavat shuroo hone ka samay aaya, to usne apne daas se kaha ki jinhein bulaya gaya hai unse jaakaar kah, ‘aa jaao, sabkuch taiyar hai.’
18 magar woh sabhi bahane banane lage.+ pehale ne usse kaha, ‘mainne ek khet khareeda hai, use dekhne ke liye mera jaana zaroori hai. isliye mujhe maaf kar.’
19 doosre ne kaha, ‘mainne paanch jodi bail khareede hain aur main unki jaanch-parakh karne jaa raha hoon. isliye mujhe maaf kar.’+
20 ek aur ne kaha, ‘meri abhi-abhi shaadi hui hai, isliye main nahin aa sakta.’
21 daas ne lautkar yah saari khabar ghar ke maalik ko di. tab maalik bhadak utha aur usne daas se kaha, ‘fauran chaurahon aur shehar ki galiyon mein jaa aur gareebon, apahijon, andhon aur langdon ko yahaan le aa.’
22 thodi der baad daas ne kaha, ‘maalik, jaisa tera hukm tha vaisa hi kiya gaya hai. magar fir bhi jagah khaali hai.’
23 tab maalik ne usse kaha, ‘sadkon aur tang galiyon mein jaa aur vahaan ke logon ko aane ke liye majboor kar taaki mera ghar bhar jaaye.+
24 kyonki main tumse kehta hoon, jin logon ko nyauta diya gaya tha unmein se ek bhi meri daavat nahin chakh sakega.’”+
25 logon ki ek badi bheed yeeshu ke saath-saath chal rahi thi. usne mudkar unse kaha,
26 “agar koi mere paas aata hai aur apne pita, maa, patni, bachchon, bhaaiyon aur behenon, yahaan tak ki apni jaan se nafrat nahin karta,*+ to woh mera chela nahin ban sakta.+
27 jo apna yaatna ka kaath* nahin uthata aur mere peechhe nahin chalta, woh mera chela nahin ban sakta.+
28 misal ke liye, tummein aisa kaun hai jo ek meenar banana chahta ho aur baithkar pehale ismein lagnevale kharch ka hisab na lagaye taaki dekhe ki use poora karne ke liye uske paas kaafi paisa hai ya nahin?
29 nahin to aisa hoga ki woh uski ninv to daalega, magar meenar banane ka kaam poora nahin kar paayega. aur sab dekhnevale uska mazak udayenge
30 aur kaheinge, ‘yah aadmi banane to chala, magar poora nahin kar paaya.’
31 ya kaun-saa raja aisa hai jo yuddh mein jaane se pehale baithkar salah na kare ki woh apni 10,000 ki fauj se us dushman raja ka mukabla kar paayega ya nahin, jo 20,000 ki fauj lekar ladne aa raha hai?
32 agar woh mukabla nahin kar sakta, to doosre raja ke door rehte hi woh apne raajdooton ka dal bhejkar usse sulah karne ki koshish karega.
33 isi tarah, yakeen maano ki tummein se jo koi apni saari sampatti ko alvida nahin kehta* woh mera chela nahin ban sakta.+
34 beshak, namak badhiya hota hai. lekin agar namak apna swad kho de, to use kis cheez se dobara namkeen kiya jaa sakta hai?+
35 woh na to zameen ke liye achha hota hai na khaad mein milane ke liye, balki log use baahar feink dete hain. kaan lagakar suno ki main kya kah raha hoon.”+
kai footnote
^ shareer mein had-se-zyada paani ki vajah se honevali soojan.
^ shaa., “unhein ek misal di.”
^ shaa., “roti khaayega.”
^ ya “kam pyar nahin karta.”
^ ya “nahin tyag deta.”
