luka ke mutabik khushkhabri 16:1-31
16 tab yeeshu ne apne chelon se yah bhi kaha, “ek ameer aadmi ke yahaan ek prabandhak* tha, jiski shikayat ki gayi ki woh uske maal ki barbadi kar raha hai.
2 isliye usne prabandhak ko bulaya aur usse kaha, ‘main tere baare mein yah kya sun raha hoon? apne kaam ka hisab de kyonki ab se tu mere ghar ke kaam ki dekhrekh nahin karega.’
3 tab prabandhak man mein kehne laga, ‘ab main kya karoon? maalik mujhe prabandhak ke kaam se hata raha hai. mujhmein itni taakat nahin ki kheton mein mitti khodne ka kaam karoon aur bheekh maangne mein mujhe sharm aati hai.
4 haan! mujhe samajh aa gaya ki mujhe kya karna chahiye taaki jab mujhe prabandhak ke kaam se hata diya jaaye, to log mujhe apne gharon mein sweekar karein.’
5 usne apne maalik ke karzdaron ko ek-ek karke bulaya aur pehalevale se kaha, ‘tujhe mere maalik ko kitna dena hai?’
6 usne kaha, ‘2,200 litre* jaitoon ka tel.’ prabandhak ne kaha, ‘yah le apna kararnama jo toone likha tha aur baithkar fauran 1,100 likh de.’
7 iske baad usne doosre se poochha, ‘bata tujhe kitna dena hai?’ usne kaha, ‘170 quintal* gehoon.’ usne usse kaha, ‘yah le apna kararnama jo toone likha tha aur is par 136* likh de.’
8 us prabandhak ke maalik ne uske beiman hone ke baavjood uski sarahna ki, kyonki usne hoshiyari se kaam liya tha. main tumse yah isliye kah raha hoon, kyonki is zamane* ke log doosron ke saath vyavhar karne mein un logon se zyada hoshiyar hain jo raushni mein chalte hain.+
9 main tumse yah bhi kehta hoon, beimani ki daulat+ se apne liye dost bana lo taaki jab yah daulat na rahe, to ye dost tumhein un jagahon mein le lein jo hamesha bani raheingi.+
10 jo insan thode mein bharose ke laayak hai, woh bahot mein bhi bharose ke laayak hota hai aur jo thode mein beiman hai, woh bahot mein bhi beiman hota hai.
11 isliye agar tum beimani ki daulat ke maamle mein bharosemand saabit nahin hoge, to kaun tumhein sachchi daulat saunpega?
12 aur agar tum doosron ki sampatti ke maamle mein bharosemand saabit nahin hoge, to kaun tumhein woh sampatti dega jo tumhare liye rakhi gayi hai?+
13 koi bhi daas do maalikon ki seva nahin kar sakta. kyonki ya to woh ek se nafrat karega aur doosre se pyar ya woh ek se juda rahega aur doosre ko tuchh samjhega. tum parmeshvar ke daas hone ke saath-saath dhan-daulat ki gulami nahin kar sakte.”+
14 tab fareesi jinhein paison se pyar tha, yeeshu ki ye saari baatein sunkar uski khilli udane lage.+
15 isliye usne unse kaha, “tum insanon ke saamne khud ko bada nek dikhate ho,+ magar parmeshvar tumhare dilon ko jaanta hai.+ kyonki jis baat ko insan bahot bada samajhta hai, woh parmeshvar ki nazar mein ghinauni hai.+
16 darasal kaanoon aur bhavishyavaktaon ki likhi baatein, yuhanna ke samay tak ke liye thi. tab se parmeshvar ke raaj ki khushkhabri sunayi jaa rahi hai aur har kism ka insan usmein daakhil hone ke liye zor laga raha hai.+
17 aakash aur prithvi ka mit jaana aasan hai, lekin kaanoon mein likha ek bhi akshar ya bindu bina poora huye nahin mitega.+
18 har woh aadmi jo apni patni ko talak deta hai aur doosri se shaadi karta hai, woh vyabhichar* karne ka doshi hai. aur jo koi ek talakshuda aurat se shaadi karta hai, woh bhi vyabhichar karne ka doshi hai.+
19 ek ameer aadmi tha jo bainjni aur reshmi kapde pehanta tha aur bade thaat-baat se rehta aur har din aish karta tha.
20 magar laazar naam ka ek bhikhari tha jiska shareer fodon se bhara hua tha. use ameer aadmi ke faatak ke paas chhod diya jaata tha
21 aur woh uski mez se girnevale tukde khaane ke liye tarasta tha. yahaan tak ki kutte aakaar uske fode chaatte the.
22 kuch vakt baad woh bhikhari mar gaya aur swargdoot use abraham ke paas* le gaye.
fir woh ameer aadmi bhi mar gaya aur use gaada gaya.
23 woh ameer aadmi kabraa* mein tadap raha tha. vahaan se usne nazrein uthakar dekha, to use bahot door abraham dikhayi diya, uske paas* laazar bhi tha.
24 tab ameer aadmi ne pukara, ‘pita abraham, mujh par daya kar. laazar ko mere paas bhej ki woh apni ungli ka chhor paani mein dubakar meri jeebh ko thanda kare kyonki main yahaan is dhadhakti aag mein tadap raha hoon.’
25 magar abraham ne kaha, ‘bachche, yaad kar ki toone apni saari zindagi badhiya-badhiya cheezon ka khoob maza liya, magar laazar ne dukh-hi-dukh jhela. lekin ab woh yahaan aaram se hai jabki tu tadap raha hai.
26 iske alava hamare aur tum logon ke beech ek badi khaai banayi gayi hai taaki koi chahte huye bhi yahaan se tumhare paas na jaa sake aur na koi vahaan se is paar hamare yahaan aa sake.’
27 tab usne kaha, ‘agar aisi baat hai, to hey pita main tujhse binti karta hoon ki tu use mere pita ke ghar bhej de
28 taaki woh jaakaar mere paanchon bhaaiyon ko achhi tarah samjhaye aur unhein yahaan aakaar tadapna na pade.’
29 magar abraham ne kaha, ‘unke paas moosa aur bhavishyavaktaon ke vachan hain, woh unki sunein.’+
30 tab usne kaha, ‘nahin pita abraham. agar mare huon mein se koi unke paas jaayega, to woh zaroor pashchatap kareinge.’
31 lekin abraham ne usse kaha, ‘agar woh moosa aur bhavishyavaktaon ki nahin sunte,+ to chahe mare huon mein se koi zinda ho jaaye, to bhi woh uska yakeen nahin kareinge.’”
kai footnote
^ ya “ghar ke kaamon ki dekhrekh karnevala.”
^ shaa., “80 kor.”
^ shaa., “abraham ke seene ke paas.”
^ shaa., “uske seene ke paas.”
