matti ke mutabik khushkhabri 19:1-30
19 jab yeeshu ye baatein kah chuka, to woh galeel se nikaal pada aur yardan ke paar yahoodiya ki sarhadon ke paas aaya.+
2 bheed-ki-bheed uske peechhe aa gayi aur usne vahaan logon ko theek kiya.
3 tab fareesi yeeshu ki pareeksha lene ke liye uske paas aaye. unhonne usse poochha, “kya kaanoon ke hisab se yah sahi hai ki ek aadmi apni patni ko kisi bhi vajah se talak de sakta hai?”+
4 yeeshu ne unhein javab diya, “kya tumne nahin padha ki jisne unki srishti ki thi, usne shurooat se hi unhein nar aur naari banaya tha+
5 aur kaha tha, ‘is vajah se aadmi apne maata-pita ko chhod dega aur apni patni se juda rahega aur woh donon ek tan honge’?+
6 to woh ab do nahin rahe balki ek tan hain. isliye jise parmeshvar ne ek bandhan mein baandha hai,* use koi insan alag na kare.”+
7 tab fareesiyon ne usse kaha, “to fir moosa ne yah kyon kaha ki ek aadmi talaknama likhkar apni patni ko talak de sakta hai?”+
8 yeeshu ne unse kaha, “moosa ne tumhare dilon ki kathorta ki vajah se tumhein apni patniyon ko talak dene ki ijazat di,+ magar shurooat se aisa nahin tha.+
9 main tumse kehta hoon ki jo koi naajayaz yaun-sambandh* ke alava kisi aur vajah se apni patni ko talak deta hai aur kisi doosri se shaadi karta hai, woh vyabhichar* karne ka doshi hai.”+
10 chelon ne usse kaha, “agar ek pati ka apni patni ke saath aisa rishta hai, to shaadi na karna hi achha hai.”
11 usne unse kaha, “main jo kah raha hoon use har koi nahin kar sakta, sirf woh kar sakte hain jinke paas yah tohfa hai.+
12 kyonki kuch log aise hain jo janm se napunsak hain. kuch aise hain jinhein logon ne napunsak bana diya hai aur kuch aise bhi hain jinhonne swarg ke raaj ke liye khud ko napunsak bana liya hai. jo koi raaj ke liye avivahit reh sakta hai, woh rahe.”+
13 fir log chhote bachchon ko yeeshu ke paas laaye taaki woh un par haath rakhe aur unke liye prarthna kare. magar chelon ne unhein daanta.+
14 lekin yeeshu ne kaha, “bachchon ko mere paas aane do, unhein rokne ki koshish mat karo, kyonki swarg ka raaj aison hi ka hai.”+
15 aur usne un par haath rakhe, fir woh vahaan se chala gaya.
16 aur dekho! ek aadmi uske paas aaya aur kehne laga, “guru, hamesha ki zindagi paane ke liye main kaun-saa achha kaam karoon?”+
17 yeeshu ne usse kaha, “tu mujhse kyon poochhta hai ki achha kaam kya hai? sirf ek hi hai jo achha hai.+ lekin agar tu zindagi paana chahta hai, to aagyayen maanta reh.”+
18 us aadmi ne poochha, “kaun-si aagyayen?” yeeshu ne kaha, “yahi ki tum khoon na karna,+ tum vyabhichar na karna,+ tum chori na karna,+ tum jhoothi gavahi na dena,+
19 apne pita aur apni maa ka aadar karna+ aur apne padosi se vaise hi pyar karna jaise tum khud se karte ho.”+
20 us naujavan ne yeeshu se kaha, “main ye saari baatein maanta aaya hoon. bata ki mujhmein aur kya kami hai?”
21 yeeshu ne usse kaha, “agar tu chahta hai ki tujhmein koi kami na ho,* to jaa aur apna sabkuch bechkar kangalon ko de de, kyonki tujhe swarg mein khazana milega+ aur aakaar mera chela ban jaa.”+
22 jab us naujavan ne yah baat suni, to woh dukhi hokar chala gaya kyonki uske paas bahot dhan-sampatti thi.+
23 tab yeeshu ne apne chelon se kaha, “main tumse sach kehta hoon ki ek ameer aadmi ke liye swarg ke raaj mein daakhil hona bahot mushkil hoga.+
24 main tumse fir kehta hoon, parmeshvar ke raaj mein ek ameer aadmi ke daakhil hone se, ek unt ka sui ke chhed se nikaal jaana zyada aasan hai.”+
25 yah sunkar chelon ko bada taajjub hua aur woh kehne lage, “to bhala kaun uddhaar paa sakta hai?”+
26 yeeshu ne seedhe unki taraf dekhkar kaha, “insanon ke liye yah naamumkin hai magar parmeshvar ke liye sabkuch mumkin hai.”+
27 tab patras ne usse kaha, “dekh! hum to sabkuch chhodkar tere peechhe chal rahe hain, hamein kya milega?”+
28 yeeshu ne unse kaha, “main tumse sach kehta hoon ki jab sabkuch naya banaya jaayega* aur insan ka beta apni mahima ki raajgaddi par baithega, tab tum bhi jo mere peechhe ho liye ho, 12 raajgaddiyon par baithkar israel ke 12 gotron ka nyay karoge.+
29 aur jis kisi ne mere naam ki khaatir gharon ya bhaaiyon ya behenon ya pita ya maa ya bachchon ko chhod diya hai ya zameenein chhod di hain, woh iska 100 guna paayega aur hamesha ki zindagi ka vaaris hoga.+
30 fir bhi bahot-se jo pehale hain woh aakhiri honge aur jo aakhiri hain woh pehale honge.+
kai footnote
^ shaa., “ek juye mein joda hai.”
^ ya “tu paripoorna ho.”
^ ya “nayi srishti ki jaayegi.”
