matti ke mutabik khushkhabri 21:1-46
21 jab woh yarooshalem ke kareeb aa gaye aur jaitoon pahad par baitfage gaanv pahunche, tab yeeshu ne do chelon ko yah kehkar bheja,+
2 “jo gaanv tumhein nazar aa raha hai usmein jaao. vahaan jaate hi tumhein ek gadhi aur uska bachcha bandha hua milega. unhein kholkar mere paas le aao.
3 aur agar koi tumse kuch kahe to kehna, ‘prabhu ko inki zaroorat hai.’ tab woh unhein fauran bhej dega.”
4 yah isliye hua taaki yah vachan poora ho jo bhavishyavakta se kehalvaya gaya tha:
5 “siyyon ki beti se kaho, ‘dekh! tera raja tere paas aa raha hai,+ woh komal swabhav ka hai+ aur ek gadhe par, haan, bojh dhonevali gadhi ke bachche par savaar hai.’”+
6 tab woh chele nikaal pade aur jaisa yeeshu ne unse kaha tha, unhonne vaisa hi kiya.+
7 woh us gadhi aur uske bachche ko le aaye aur unhonne in par apne odhne daale aur woh un par* baith gaya.+
8 tab bheed mein se zyadatar logon ne apne kapde raaste mein bichhaye+ jabki doosre log pedon se daaliyaan kaatkar raaste mein bichhane lage.
9 bheed ke jo log uske aage-aage chal rahe the aur jo uske peechhe-peechhe aa rahe the, woh pukar rahe the, “hum binti karte hain, daavid ke vanshaj ko bacha le!+ dhanya hai woh jo yahova* ke naam se aata hai!+ swarg mein rehnevale, hum binti karte hain, ise bacha le!”+
10 jab woh yarooshalem pahuncha, to poore shehar mein tahalka mach gaya aur sab kehne lage, “yah kaun hai?”
11 bheed ke log kehte rahe, “yah bhavishyavakta yeeshu hai,+ galeel ke naasrat ka rehnevala!”
12 fir yeeshu mandir mein gaya aur jo log mandir ke andar bikri aur khareedari kar rahe the, un sabko usne khaded diya aur paisa badalnevale saudagaron ki mezen aur kabootar bechnevalon ki chaukiyaan ulat di.+
13 aur usne unse kaha, “likha hai, ‘mera ghar prarthna ka ghar kehlayega,’+ magar tum ise luteron ka adda* bana rahe ho.”+
14 fir mandir mein uske paas andhe aur langde aaye aur usne unhein theek kiya.
15 jab pradhan yaajkon aur shaastriyon ne use aashcharya ke kaam karte dekha aur mandir mein ladkon ko yah pukarte suna, “hum binti karte hain, daavid ke vanshaj ko bacha le!”+ to unhein bahot gussa aaya.+
16 unhonne usse kaha, “kya tu sun raha hai, ye kya kah rahe hain?” yeeshu ne unse kaha, “haan, kya tumne kabhi nahin padha, ‘nanhe-munnon aur doodh-peete bachchon ke munh se toone taareef karvayi hai’?”+
17 aur woh unhein chhodkar yarooshalem se baahar baitniyah chala gaya aur usne vahin raat bitayi.+
18 tadke subah jab woh yarooshalem ki taraf laut raha tha to use bhookh lagi.+
19 aur raaste ke kinare jab ek anjeer ke ped par uski nazar padi to woh uske paas gaya, magar pattiyon ko chhod usmein kuch nahin paaya.+ tab usne ped se kaha, “ab se fir kabhi tujhmein fal na lagein.”+ aur anjeer ka woh ped usi ghadi sookh gaya.
20 jab chelon ne ise dekha, to woh taajjub karte huye kehne lage, “yah anjeer ka ped fauran kaise sookh gaya?”+
21 yeeshu ne kaha, “main tumse sach kehta hoon, agar tummein vishvas ho aur tum shak na karo, to tum na sirf woh karoge jo mainne is anjeer ke ped ke saath kiya, balki agar tum is pahad se kahoge, ‘yahaan se ukhaadakar samundar mein jaa gir,’ to aisa ho jaayega.+
22 aur tum vishvas ke saath prarthna mein jo kuch maangoge, woh tumhein mil jaayega.”+
23 jab woh mandir mein jaakaar sikha raha tha, tab pradhan yaajak aur logon ke mukhiya uske paas aaye aur unhonne kaha, “tu ye sab kis adhikar se karta hai? aur kisne tujhe yah adhikar diya hai?”+
24 yeeshu ne unse kaha, “main bhi tumse ek baat poochhta hoon. agar tum uska javab doge, to main bhi tumhein bataunga ki main ye sab kis adhikar se karta hoon:
25 jo baptisma yuhanna ne diya, woh kiski taraf se tha? swarg ki taraf se ya insanon ki taraf se?” woh ek-doosre se kehne lage, “agar hum kahein, ‘swarg ki taraf se,’ to woh hamse kahega, ‘fir kyon tumne uska yakeen nahin kiya?’+
26 lekin agar hum kahein, ‘insanon ki taraf se,’ to pata nahin yah bheed hamare saath kya karegi, kyonki ye sab yuhanna ko ek bhavishyavakta maante hain.”
27 isliye unhonne yeeshu ko javab diya, “hum nahin jaante.” tab usne kaha, “to main bhi tumhein nahin bataunga ki main kis adhikar se yah sab karta hoon.
28 tum kya sochte ho? ek aadmi ke do bete the. usne pehale ke paas jaakaar kaha, ‘beta jaa, aaj angooron ke baag mein kaam kar.’
29 tab us ladke ne kaha, ‘main nahin jaaunga,’ magar baad mein use pachhtava hua aur woh gaya.
30 fir doosre bete ke paas jaakaar pita ne vahi baat kahi. bete ne pita se kaha, ‘theek hai, main jaaunga.’ magar woh nahin gaya.
31 in donon mein se kisne apne pita ki marzee poori ki?” unhonne kaha, “pehale ne.” yeeshu ne unse kaha, “main tumse sach kehta hoon ki kar-vasoolnevale aur veshyayen tumse pehale parmeshvar ke raaj mein jaa rahe hain.
32 kyonki yuhanna neki ki raah dikhata hua tumhare paas aaya, fir bhi tumne us par yakeen nahin kiya. lekin kar-vasoolnevalon aur veshyaon ne us par yakeen kiya.+ aur yah sab dekhne ke baad bhi tumhein pachhtava nahin hua aur tumne us par yakeen nahin kiya.
33 ek aur misal suno: ek zamindar ne angooron ka ek baag lagaya+ aur uske chaaron taraf baada baandha. usne baag mein angoor raundne ka haud khoda aur ek meenar khadi ki.+ fir use baagbanon ko theke par dekar woh pardes chala gaya.+
34 katai ka mausam aane par usne apne daason ko baagbanon ke paas bheja ki woh fasal mein se uska hissa le aayen.
35 magar baagbanon ne uske daason ko pakad liya aur ek ko unhonne peeta, doosre ka khoon kar diya aur teesre ko pattharon se maar daala.+
36 maalik ne kuch aur daason ko bheja, jo ginti mein pehale se zyada the. lekin baagbanon ne inke saath bhi vaisa hi salook kiya.+
37 aakhir mein usne apne bete ko yah sochkar unke paas bheja, ‘woh mere bete ki zaroor izzat kareinge.’
38 uske bete ko dekhkar baagbanon ne aapas mein kaha, ‘yah to vaaris hai.+ chalo ise maar daalein aur iski virasat le lein!’
39 tab unhonne use pakad liya aur baag ke baahar le jaakaar maar daala.+
40 isliye jab baag ka maalik aayega, to woh un baagbanon ke saath kya karega?”
41 unhonne kaha, “woh dusht hain, isliye woh unka bhayanak tareeke se naash karega aur apne baag ka theka doosre baagbanon ko de dega, jo katai ke baad uska hissa use diya kareinge.”
42 yeeshu ne unse kaha, “kya tumne shastra mein kabhi nahin padha, ‘jis patthar ko raajmistriyon ne thukra diya, vahi kone ka mukhya patthar ban gaya hai.’+ kya tumne yah bhi nahin padha, ‘yah yahova* ki taraf se hua hai aur hamari nazar mein laajavab hai’?+
43 isliye main tumse kehta hoon, parmeshvar ka raaj tumse le liya jaayega aur ek aise raashtra ko de diya jaayega, jo raaj ke yogya fal paida karta hai.
44 jo koi is patthar par girega woh tukde-tukde ho jaayega.+ aur jis kisi par yah patthar girega, use yah choor-choor kar dega.”+
45 jab pradhan yaajkon aur fareesiyon ne uski misalein sunin, to woh samajh gaye ki woh unhin ke baare mein bol raha hai.+
46 haalanki woh use pakadna* chahte the magar bheed se darte the, kyonki log yeeshu ko ek bhavishyavakta maante the.+
