utpatti 19:1-38
19 woh donon swargdoot jab sadom pahunche to tab tak shaam ho chuki thi. loot sadom ke faatak par baitha hua tha. jab usne swargdooton ko dekha, to woh uthkar unse milne gaya aur usne zameen par girkar unhein pranam kiya.+
2 loot ne unse kaha, “saahibo, meharbani karke apne daas ke ghar aao aur hamein tumhare pair dhone ka mauka do. aaj raat mere yahaan ruk jaao aur chaho to subah hote hi chale jaana.” magar unhonne kaha, “nahin, hum shehar ke chauk mein hi raat bita leinge.”
3 lekin loot unhein itna manane laga ki woh uske saath uske ghar chal diye. loot ne unke liye ek daavat taiyar ki. usne bin-khameer ki rotiyaan banayin aur unhonne loot ke ghar khaana khaaya.
4 isse pehale ki woh sote, sadom shehar ke saare aadmi, ladkon se lekar boodhon tak sab loot ke ghar aa dhamke aur unhonne chaaron taraf se uska ghar gher liya.
5 woh chilla-chillakar loot se kehne lage, “kahaan hain woh aadmi jo aaj raat tere ghar aaye the? baahar laa unhein. hamein unke saath sambhog karna hai.”+
6 tab loot ghar se baahar aaya aur usne apne peechhe darvaza band kar diya.
7 usne unse kaha, “mere bhaaiyo, main tumse binti karta hoon, aisa dusht kaam mat karo.
8 dekho, meri do kunvari betiyaan hain. kaho to main unhein tumhare saamne laata hoon, tum unke saath jo chaho kar lo. magar un aadmiyon ko chhod do kyonki woh meri chhat tale* aaye hain.”+
9 tab woh chillaye, “chal hat yahaan se!” aur kehne lage, “iski majal to dekho! yah pardesi bankar hamare yahaan rehne aaya tha aur ab hamara nyayi ban baitha hai. ab teri khair nahin, hum tera unse bhi bura haal kareinge.” fir unhonne loot ko dhar-dabocha aur woh uske ghar ka darvaza todne aage badhe.
10 magar tabhi loot ke ghar aaye aadmiyon ne apna haath badhakar loot ko andar khinch liya aur darvaza band kar diya.
11 aur unhonne ghar ke baahar ikattha sabhi aadmiyon ko andha kar diya. chhote-bade, sab-ke-sab andhe ho gaye aur woh darvaza tatolte-tatolte thak gaye.
12 fir loot ke mehmanon ne usse kaha, “kya yahaan tera koi aur bhi hai? tere bete-betiyaan, daamad jo bhi hain, sabko saath lekar is ilake se nikaal jaa!
13 hum is ilake ko naash karnevale hain, kyonki yahova ke saamne yahaan ke logon ke baare mein shikaytein itni badh gayi hain+ ki yahova ne hamein is shehar ka naash karne bheja hai.”
14 tab loot apne daamadon ke paas gaya jo uski betiyonn se shaadi karnevale the aur unhein samjhane laga, “chalo-chalo, jaldi karo! hamein fauran yahaan se bhaag nikalana hai. yahova is shehar ka naash karnevala hai!” magar uske daamadon ko laga ki woh mazak kar raha hai.+
15 jab bhor hone lagi to swargdooton ne loot se furti karayi aur woh kehne lage, “jaldi kar! apni patni aur donon betiyonn ko lekar fauran yahaan se nikaal jaa, varna tum bhi naash ho jaaoge! is shehar ko jald hi iske paapon ki saza milnevali hai.”+
16 magar jab loot der karne laga to yahova ne us par daya ki+ aur woh aadmi uska aur uski patni aur donon betiyonn ka haath pakadkar shehar ke baahar le gaye.+
17 vahaan pahunchte hi un aadmiyon mein se ek ne kaha, “apni jaan bachakar bhaago yahaan se! tum log peechhe mudkar mat dekhna+ aur is poore ilake+ mein kahin bhi mat rukna! bhaagkar us pahadi pradesh mein chale jaao, varna tum bhi naash ho jaaoge!”
18 tab loot ne unse kaha, “hey yahova, main tujhse binti karta hoon, mujhe vahaan jaane ke liye na keh!
19 toone apne sevak par meharbani ki hai. toone mujh par maha-kripa* karke meri jaan bachayi hai.+ magar main us pahadi pradesh mein nahin bhaag sakta kyonki mujhe dar hai ki kahin mere saath kuch bura na ho jaaye aur main apni jaan ganva baithoon.+
20 dekh, yah nagar kitna paas hai aur chhota bhi hai. main vahaan bhaagkar apni jaan bacha sakta hoon. agar tu kahe to kya main vahaan chala jaaun? woh bas ek chhoti-si jagah hai.”
21 tab usne loot se kaha, “theek hai, main is baat mein bhi tera lihaz karta hoon.+ jis nagar ke baare mein toone kaha hai, main use naash nahin karoonga.+
22 tu jaldi se vahaan bhaag jaa! kyonki jab tak tu vahaan na pahunche, main kuch nahin kar sakta.”+ iseeliye us nagar ka naam soar*+ pada.
23 jab loot soar pahuncha tab tak din chadh aaya tha.
24 tab yahova ne sadom aur amora par aag aur gandhak barsana shuroo kiya. haan, un shehron par yahova ki taraf se aasman se aag aur gandhak barsi.+
25 is tarah parmeshvar ne un shehron ko aur us poore ilake ko khaak mein mila diya. vahaan ke sabhi insan aur ped-paudhe naash ho gaye.+
26 loot ki patni, jo uske peechhe-peechhe chal rahi thi, mudkar dekhne lagi isliye woh namak ka khambha ban gayi.+
27 abraham subah-subah uthkar us jagah gaya, jahaan pehale usne yahova ke saamne khade hokar usse baat ki thi.+
28 vahaan se usne neeche sadom, amora aur aas-paas ka poora ilaka dekha. kya hi bhayanak manzar tha! dhuyen ke aise ghane baadal uth rahe the maano dhadhakte bhatthe se dhuaan uth raha ho!+
29 is tarah, jab parmeshvar ne vahaan ke shehron ka naash kiya to usne abraham ki binti ka dhyan rakhte huye loot ko us jagah se door bhej diya, jahaan woh pehale rehta tha.+
30 baad mein loot ne soar chhod diya kyonki woh us nagar mein rehne se darne laga.+ woh apni donon betiyonn ke saath pahadi pradesh chala gaya.+ vahaan woh teenon ek gufa mein rehne lage.
31 loot ki badi beti ne chhoti se kaha, “hamara pita boodha ho gaya hai. aur is ilake mein aisa koi aadmi nahin jisse hum duniya ki reet ke mutabik shaadi karein.
32 isliye aao hum apne pita ko daakh-madira pilayen taaki uske saath soyen aur usi se uska vansh banaye rakhein.”
33 us raat unhonne apne pita ko khoob daakh-madira pilayi. fir badi ladki apne pita ke paas gayi aur uske saath soyi. magar uske pita ko pata nahin chala ki woh kab uske saath soyi aur kab uthkar chali gayi.
34 agle din badi ne chhoti se kaha, “aaj raat bhi hum apne pita ko daakh-madira pilate hain. fir tu jaakaar uske saath sona, jaise kal raat main soyi thi. is tarah hum apne pita se uska vansh banaye rakheinge.”
35 us raat bhi unhonne apne pita ko khoob daakh-madira pilayi. fir chhoti ladki uske paas gayi aur uske saath soyi. loot ko pata nahin chala ki woh kab uske saath soyi aur kab uthkar chali gayi.
36 is tarah loot ki donon betiyaan apne pita se garbhvati huin.
37 badi ladki ne ek bete ko janm diya aur uska naam moab+ rakha. moab se woh log nikle jo aaj moabee kehlate hain.+
38 chhoti ladki ne bhi ek bete ko janm diya aur uska naam ben-ammi rakha. ben-ammi se woh log nikle jo aaj ammoni+ kehlate hain.
