utpatti 29:1-35
29 iske baad yakub vahaan se aage badha aur safar karte-karte poorab ke desh mein pahuncha.
2 vahaan usne maidan mein ek kuaan dekha jiske aas-paas bhedon ke teen jhund baithe the. is kuyen se charvahe aksar apni bhedon ko paani pilaya karte the. kuyen ke munh par ek bada-saa patthar rakha hua tha.
3 jab bhedon ke saare jhund vahaan ikattha ho jaate, to charvahe kuyen ke munh se patthar hatakar unhein paani pilate the. iske baad woh fir se kuyen ka munh patthar se dhak dete the.
4 yakub ne vahaan jo charvahe the unse poochha, “bhaaiyo, tum kahaan ke rehnevale ho?” unhonne kaha, “hum haaran se hain.”+
5 fir usne poochha, “kya tum naahor+ ke pote laaban+ ko jaante ho?” unhonne kaha, “haan, hum jaante hain.”
6 usne kaha, “uske kya haal-chaal hain?” unhonne kaha, “woh bilkul theek hai. woh dekh, uski beti raahel!+ apni bhedein lekar yahin aa rahi hai.”
7 fir yakub ne unse kaha, “tum apni bhedon ko itni jaldi baade mein kyon le jaa rahe ho? abhi to dopahar hi hui hai. tum inhein paani pilakar thodi der aur kyon nahin chara lete?”
8 charvahon ne usse kaha, “jab tak saare jhund nahin aa jaate tab tak hamein kuyen se patthar hatakar apni bhedon ko paani pilane ki ijazat nahin hai. sabke aane ke baad hi patthar hataya jaayega aur hum bhedon ko paani de sakeinge.”
9 yakub un charvahon se baat kar hi raha tha ki tabhi raahel apne pita ki bhedein lekar vahaan aayi. raahel bhedein charaya karti thi.
10 jab yakub ne dekha ki uske maama laaban ki beti raahel bhedein lekar vahaan aayi hai, to woh fauran kuyen ke paas gaya. usne kuyen ke munh se patthar hataya aur apne maama ki bhedon ko paani pilaya.
11 fir yakub ne raahel ko chooma aur zor-zor se rone laga.
12 usne raahel ko bataya ki woh uske pita ka rishtedar* aur ribka ka beta hai. tab raahel daudkar apne pita ke paas gayi aur use yah khabar di.
13 jaise hi laaban+ ne apne bhaanje yakub ke aane ki khabar suni, woh daudkar usse milne gaya. laaban ne yakub ko gale lagaya aur use chooma. fir woh yakub ko apne ghar le aaya. aur yakub ne laaban ko apna saara haal keh sunaya.
14 tab laaban ne usse kaha, “tu mera apna khoon hai.”* isliye yakub uske saath poora ek maheena raha.
15 fir laaban ne yakub se kaha, “bhale hi tu mera rishtedar* hai,+ fir bhi main tujhse muft mein kaam nahin lena chahta. bol, tu kya mazdoori lena chahega?”+
16 laaban ki do betiyaan thi. badi ka naam lia tha aur chhoti ka raahel.+
17 lia ki aankhon mein koi khaas aakaarshan nahin tha, jabki raahel itni khoobsoorat thi ki uska rang-roop dekhte hi banta tha.
18 yakub ko raahel se pyar ho gaya tha, isliye usne laaban se kaha, “main tujhse teri chhoti beti raahel ka haath maangta hoon. main uske liye tere yahaan saat saal kaam karne ko taiyar hoon.”+
19 laaban ne kaha, “mujhe manzoor hai. apni beti ka haath kisi gair ko dene se achha hai ki main tujhe doon. tu mere saath hi reh.”
20 yakub ne raahel ke liye saat saal kaam kiya.+ magar ye saat saal uske liye aise beet gaye maano saat din hon kyonki woh raahel se bahot pyar karta tha.
21 saat saal beetne par yakub ne laaban se kaha, “meri mazdoori ke din poore ho gaye hain, ab ladki mujhe de de taaki main use apni patni banaun.”*
22 tab laaban ne shaadi ki daavat rakhi aur apne yahaan ke sabhi logon ko bulaya.
23 lekin us shaam laaban apni chhoti beti raahel ke bajay badi beti lia ko yakub ke paas le aaya taaki woh use apni patni bana le.
24 laaban ne apni beti lia ki seva ke liye use apni daasi jilpa bhi di.+
25 jab subah hui to yakub ne dekha ki yah to lia hai! usne jaakaar laaban se kaha, “yah toone mere saath kya kiya? kya mainne tere yahaan raahel ke liye kaam nahin kiya tha? fir toone mujhe kyon dhokha diya?”+
26 laaban ne kaha, “hamare yahaan aisa dastoor nahin ki badi se pehale chhoti ki shaadi kara dein.
27 tu yah hafta is ladki ke saath khushiyaan mana le. fir main tujhe doosri ladki bhi de doonga, magar uske liye tujhe saat saal aur kaam karna hoga.”+
28 yakub ne uski baat maan li aur ek hafta lia ke saath khushiyaan manayin. baad mein laaban ne use apni chhoti beti raahel bhi de di.
29 laaban ne raahel ki seva ke liye use apni daasi bilha+ bhi di.
30 yakub ne raahel ke saath bhi sambandh rakhe. woh lia se zyada raahel se pyar karta tha aur usne laaban ke yahaan saat saal aur kaam kiya.+
31 jab yahova ne dekha ki lia ko utna pyar nahin mil raha hai jitna raahel ko,* to usne lia ki kokh khol di+ jabki raahel baanjh rahi.+
32 lia garbhvati hui aur usne ek bete ko janm diya. usne yah kehkar uska naam rooben*+ rakha ki “yahova ne mere man ki tadap dekhi hai,+ ab mera pati zaroor mujhse pyar karne lagega.”
33 lia dobara garbhvati hui aur uska ek beta hua. usne kaha, “yahova ne meri fariyad sun li ki mujhe apne pati ka pyar nahin mil raha isliye usne mujhe ek aur beta diya.” lia ne is ladke ka naam shimon*+ rakha.
34 lia ek baar fir garbhvati hui aur usne ek bete ko janm diya. usne kaha, “ab mere pati ko zaroor mujhse lagav ho jaayega kyonki mainne use teen-teen bete diye hain.” isliye usne teesre bete ka naam levi*+ rakha.
35 lia ka fir se garbh thehra aur uska ek aur ladka hua. usne kaha, “is baar main yahova ki taareef karoongi.” usne apne chauthe bete ka naam yahooda*+ rakha. iske baad lia ke bachche hone band ho gaye.
kai footnote
^ shaa., “bhaai.”
^ shaa., “tu mera haad-maans hai.”
^ shaa., “bhaai.”
^ ya “taaki main uske saath sambandh rakhoon.”
^ shaa., “lia se nafrat ki jaa rahi hai.”
^ matlab “dekh, ek beta!”
^ matlab “sunnaa.”
^ matlab “lagav; jude rehna.”
^ matlab “taareef hui; jiski taareef hoti hai.”
