mehnatee log kaam karne se peechhe nahin hatte. woh apni zaroortein poori karne ke liye aur doosron ki madad karne ke liye khushi se kaam karte hain, bhale hi logon ki nazar mein woh chhota kaam kyon na ho.

hammein se koi bhi zimmedariyon se bhaag nahin sakta. is duniya mein mehnatee log bahot kam milte hain, isliye agar aap mehnatee honge, to aapko faayda hoga.​—sabhopdeshak 3:13.

“mehnat karne se mujhe man-hi-man bahot santushti milti hai aur khud par garv hota hai. is tarah santushti milne se mujhe kaam karne ka aur bhi man karta hai. kaam karne ki achhi aadat hone se hum ek achha naam bhi kamate hain.”​—reyon.

pavitra shastra ki salah: “mehnat ke har kaam se faayda hota hai.”​—neetivachan 14:23.

neeche di gayi salah maaniye aur kaam ke baare mein sahi nazariya paida keejiye.

kaam achhe se keejiye aur khushi paaiye. chaahe aap ghar ka koi kaam kar rahe hon, school ka homework kar rahe hon ya fir naukri ki jagah koi kaam kar rahe hon, aap jo bhi karein, dil lagakar aur achhe se keejiye. jab aap koi kaam seekh jaate hain, to dekhiye ki aap use aur achhi tarah aur kam samay mein kaise kar sakte hain. aap us kaam mein jitne kushal baneinge, utna hi aapko use karne mein maza aayega.

pavitra shastra ki salah: “kya toone aise aadmi ko dekha hai jo apne kaam mein maahir hai? woh kisi maamooli insan ke saamne nahin, raja-maharajaon ke saamne khada hoga.”​—neetivachan 22:29.

yaad rakhiye ki aapke kaam se doosron ka bhala hota hai. jab aap apni zimmedariyaan achhi tarah poori karte hain, to doosron ko bhi usse faayda hota hai. jaise, agar aap ghar ke kaam mein haath batayen, to parivar ke baaki logon ka bojh halka ho jaayega.

pavitra shastra ki salah: “lene se zyada khushi dene mein hai.”​—preshiton 20:35.

doosron ki ummeed se badhkar keejiye. aapko jitna kaam diya jaata hai, sirf utna hi karne ke bajay, usse badhkar keejiye. is tarah aap zabardasti kisi ke kehne par nahin, balki khushi se aur apni ichha se woh kaam kar rahe honge.​—matti 5:41.

pavitra shastra ki salah: “tu kisi dabav mein aakar nahin balki apni marzee se bhala kaam kare.”​—filemon 14.

santulan banaye rakhiye. mehnatee log kaamchor nahin hote, na hi din-raat machine ki tarah lage rehte hain. woh man lagakar kaam karte hain, lekin aaram karne ke liye bhi samay nikaalte hain.

pavitra shastra ki salah: “thoda-saa aaram karna, bahot zyada kaam karne aur hava ke peechhe bhaagne se kahin achha hai.”​—sabhopdeshak 4:6.