•  kya mujhe vaakai vazan ghatane ki zaroorat hai?

•  vazan ghatane ka sabse achha tareeka kya hai?

•  kya karna hai?

•  aapke hamumra kya kehte hain?

kuch ladke-ladkiyaan kehte hain ki woh apna vazan ghatana chahte hain. lekin . . .

• unmein se kai javan apni sehat ki kam aur baahari roop ki zyada chinta karte hain. kuch naujavan jald-se-jald duble hone ki tarkeebein apnate hain. jaise, kuch aise hain jo din-bhar kuch nahin khaate aur doosre vazan ghatane ki davaiyaan lete hain. lekin aksar ye tarkeebein naakam ho jaati hain aur kabhi-kabhi unki sehat ko bhi khatra ho jaata hai.

  “kuch ladkiyaan jald-se-jald dubli hone ke liye khud ko bhookha rakhti hain. lekin aksar iska ulta asar hota hai. unki sehat itni bigad jaati hai ki unhein theek hone mein bahot vakt lagta hai.”—hailey.

• bahot-se naujavan bevajah apne vazan ki chinta karte hain. unhein lagta hai ki woh mote hain jabki unka vazan bilkul theek hai. shaayad woh aisa isliye sochte hain kyonki woh apni tulna apne doston se karte hain. ya woh apni tulna un duble-patle logon se karte hain jinhein media mein dikhaya jaata hai kyonki vahaan aksar duble-patle hone ka badhava diya jaata hai.

  “jab main 13 saal ki thi to main chahti thi ki main apne doston ki tarah dikhoon. woh ek lakdi ki tarah bahot duble-patle the. mujhe lagta tha ki agar main unki tarah dubli-patli ho jaaun to woh mujhe zyada pasand kareinge.”—paola.

vahin doosri taraf kuch naujavan aise hain jinhein vaakai vazan ghatane ki zaroorat hai. vishva swasthya sanghathan ki ek report ke mutabik . . .

• poori duniya mein aise kareeb 3 karod 40 laakh bachche aur naujavan hain jinki umra 5-19 ke beech hai. lekin unke kad aur umra ke hisab se unka vazan bahot zyada hai.

• san 1975 mein 5-19 saal ke bachchon mein se sirf 4 pratishat bachchon ka vazan zyada tha. lekin 2016 tak yah ginti badhkar 18 pratishat ho gayi.

• duniya ke kai deshon mein duble log kam, mote log zyada hain.

• un deshon mein bhi motape ki samasya aam hai jahaan logon ki aamdani kam hai. yahaan tak ki kuch parivar aise hain jinke kuch sadasyon ko paushtik khaana nahin milta fir bhi woh mote hain.

aap kya kareinge?

1. ek-ek vakt ka khaana chhod deinge.

2. kasrat kareinge aur santulit aahar leinge.

3. vazan ghatane ki davaiyaan leinge.

sahi javab: doosra tareeka sahi tareeka hai. kasrat keejiye aur santulit aahar leejiye.

agar aap beech-beech mein khaana chhod deinge ya kuch tarah ki cheezen bilkul nahin khaayenge, to shaayad aap kuch hi dinon mein duble ho sakte hain, magar aisa karna sehat ke liye theek nahin rehta. baad mein jab aap pehle ki tarah khaane lageinge, to aapka vazan fir se badh jaayega.

aap vazan ghatane ke liye kuch aisa keejiye ki aapki sehat achhi rahe. isse aap dikhne mein bhi sahi lageinge aur andar se achha mehsoos kareinge. dr. michael bradley ne ek kitab mein likha, “achha hoga ki aap aisi aadatein daalein, jo saari zindagi bani rahein. isse sehat ko bhi koi khatra nahin rehta aur lambe samay tak vazan kaaboo mein rehta hai.” * to agar aapko vazan ghatana hai to yah mat sochiye ki aapko kya khaana hai aur kya nahin khaana hai, balki yah sochiye ki aapko kaun-kaun-si aadatein badalni hain.

bible mein salah di gayi hai ki hum ‘har baat mein sanyam bartein’ yaani hamein khaane-peene mein bhi sanyam baratna hai. (1 timuthiyus 3:11) ismein saaf likha hai ki hum had-se-zyada khaana na khaayen. (neetivachan 23:20; luka 21:34) ye donon salah maaniye aur achhi aadatein badhaiye. iske liye aap neeche diye kaam kar sakte hain:

• jaaniye ki kis tarah ka khaana sehat ke liye achha hota hai.

  khaane-peene ke maamle mein bahot zyada sakhti baratne ki zaroorat nahin hai. lekin kis tarah ka khaana sehat ke liye achha hota hai iski thodi bahot jaankari rakhiye. tab aap santulit aahar le paayenge. apne vazan ko kaaboo mein rakhne ka ek achha tareeka hai, santulit aahar lena.

• barabar kasrat keejiye.

  sochiye ki aap chust-durust rehne ke liye har din kya-kya kar sakte hain. misal ke liye lift ya elevator lene ke bajaye seedhiyaan chadhiye. aadha ghanta video game khelne ke bajaye baahar jaakar tez chaliye.

• meethi ya tali hui cheezon ke bajaye paushtik cheezen khaaiye.

  sophiya naam ki ek ladki kehti hai, “main apne paas fal aur sabziyaan rakhti hoon. bhookh lagne par main yahi khaati hoon isliye doosri cheezen khaane ke liye mera man nahin lalchata.”

• dheere-dheere khaaiye.

  kuch log jaldi-jaldi khaate hain isliye pet bharne ke baad bhi woh khaate rehte hain. dheere-dheere khaane se aap yah galti nahin kareinge. jab aapki plate mein khaana khatm ho jaata hai, to fir se khaana lene se pehle thoda rukiye. shaayad aap paayen ki aapka pet bhar chuka hai aur aap dobara lena na chahein.

• dhyan deejiye ki aap kitni calorie lete hain.

  jab aap khaane ki cheez khareedte hain to packet par dekhiye ki usmein kitni calorie hain. ek zaroori baat: soft drink, fast food aur mithaiyon mein bahot zyada calorie hoti hain. ye sab lene se vazan bahot zyada badh sakta hai.

• har vakt vazan ke baare mein hi mat sochiye.

  solah saal ki sara kehti hai, “ek vakt to aisa tha ki main sirf calorie hi ginti rehti thi. plate mein khaane ki cheezon ke bajaye mujhe calorie ke number hi dikhte the.” vazan ki chinta kiye bagair kabhi-kabhi aap apna manpasand khaana bhi khaaiye.

sujhav: apne doctor ko bataiye ki aap vazan ghatana chahte hain. doctor ko aapki sehat ki jaankari rahegi. isliye woh aapko bata sakta hai ki kaun-si aadatein badhana aapke liye sahi rahega taaki aapka vazan ghat sake.