uske poore shareer par fode nikal aaye the. dard se itna bura haal tha ki woh sir jhukaye zameen par laachar baitha hua tha. woh itna kamzor ho gaya tha ki uske kandhe jhuk gaye aur haathon mein itni taakat bhi na rahi ki woh apne aas-paas bhinbhinati makkhiyon ko bhaga sake. uski haalat aisi ho gayi thi ki woh kuch nahin kar sakta tha. bas raakh par baitha raha aur mitti ke toote bartan ka ek tukda lekar apna shareer khujate huye maatam manane laga. usne apna sabkuch kho diya tha. na daulat rahi, na hi logon ki nazar mein koi izzat. dost, padosi, rishtedar, sabne saath chhod diya. jise dekho woh uska mazak uda raha tha, bachche tak use dutkar rahe the. use laga shaayad uske parmeshvar yahova ne bhi use chhod diya hai. lekin yah uski galatfhami thi.—ayyoob 2:8; 19:18, 22.

ji haan, hum ayyoob ki baat kar rahe hain. parmeshvar ne uske baare mein kaha tha, “uske jaisa dharti par koi nahin.” (ayyoob 1:8) ayyoob ki maut ke sadiyon baad bhi yahova ne use yaad rakha aur kaha ki woh un nek logon mein se ek hai jo yahova ki baat maanne mein badhiya misal the.—yahejkel 14:14, 20.

kya aap bhi zindagi mein badi-badi museebatein jhel rahe hain? agar haan, to ayyoob ki sachchi kahani se aapko bahot dilasa milega. itna hi nahin, aap jaaneinge ki aap kaise yahova ke vafadar reh sakte hain aur nirdosh chaalchalan banaye rakh sakte hain. yahova ke har sevak mein ye gun hone chahiye. yahova ke vafadar rehne ka matlab hai hamesha uski baat maanna, fir chahe hum par jo bhi museebat aaye. aaiye ayyoob se seekhein ki hum yah sab kaise kar sakte hain.

aisa maaloom hota hai ki ayyoob ki kahani moosa ne likhi thi. usne yah kahani ayyoob ki maut ke kuch samay baad likhi thi. parmeshvar ki prerna se moosa ne na sirf yah likha ki ayyoob ke saath kya-kya hua balki yah bhi likha ki swarg mein kya hua tha jiski vajah se ayyoob ko itna kuch sahna pada.

ayyoob naam ki kitab mein sabse pehle hum padhte hain ki ayyoob ek khushhal zindagi ji raha tha. woh ooz desh ka rehnevala tha jo shaayad uttari arab mein tha. ayyoob bahot ameer tha aur samaj mein uski bahot izzat thi. woh ek bhala insan tha. gareebon ki madad karta tha aur deen-dukhiyon ko unka hak dilata tha. uska paarivarik jeevan bhi khushhal tha. uske das bachche the. ayyoob ki sabse badi khaasiyat yah thi ki woh parmeshvar ka dar maannevala insan tha. usne hamesha yahova ki baat maanne ki koshish ki, jaise abraham, ishak, yakub aur yoosuf ne bhi kiya tha. woh sabhi ayyoob ke door ke rishtedar the. unki tarah ayyoob ne bhi apne parivar ke liye yaajak ka kaam kiya. woh apne bachchon ki taraf se niyamit taur par balidan chadhata tha.—ayyoob 1:1-5; 31:16-22.

ab lekhak ayyoob ki zindagi ke baare mein batate-batate achanak swarg mein hui ek ghatna ke baare mein batata hai, jisse ayyoob anjan tha. darasal hua yah ki ek din swarg mein sabhi achhe swargdoot yahova ke saamne haazir huye. tab shaitan bhi aaya jo baagi ban gaya tha. yahova jaanta tha ki shaitan ayyoob se bahot nafrat karta hai. isliye yahova ne shaitan se kaha ki ayyoob kitna vafadar hai. magar javab mein shaitan ne bedhadak hokar kaha, “kya ayyoob yoon hi tera dar maanta hai? kya toone uski, uske ghar ki aur uski sab cheezon ki hifazat ke liye chaaron taraf baada nahin baandha?” shaitan aise logon se nafrat karta hai jo yahova ke vafadar rehte hain. woh isliye ki jab koi poore dil se yahova ki baat maanta hai, to woh saabit karta hai ki shaitan ke dil mein nafrat koot-kootkar bhari hai. shaitan ne daave ke saath kaha ki ayyoob parmeshvar ki baat isliye maanta hai kyonki parmeshvar ne use sabkuch diya hai. usne kaha ki agar ayyoob ka sabkuch lut jaaye, to woh munh par hi yahova ki ninda karega!—ayyoob 1:6-11.

ab ayyoob ke saamne ek badhiya mauka tha. woh shaitan ko jhootha saabit kar sakta tha. yah baat alag hai ki use maaloom nahin tha ki yahova ne use yah mauka diya hai. yahova ne shaitan ko ijazat di ki woh ayyoob se sabkuch chheen le. sirf ayyoob par use haath nahin lagana tha. shaitan ko jaise hi mauka mila, woh ayyoob par toot pada. woh ek hi din mein ayyoob par badi-badi vipattiyaan le aaya. ek-ek karke ayyoob ne saare jaanvar kho diye. pehle bail aur gadhe, fir bhedein aur fir unt. sabkuch achanak ho gaya. uske jaanvaron ki dekhbhal karnevale sevak maar daale gaye. ayyoob ko khabar mili ki uske kuch sevkon aur jaanvaron par “aasman se parmeshvar ki aag” giri aur woh maare gaye. shaayad un par bijli giri thi. jab itne saare sevak ek-saath maare gaye aur saari daulat ek-saath lut gayi, to ayyoob baukhla gaya. magar woh is sadme se ubhra bhi nahin tha ki isse bhi bada haadsa ho gaya. jab uske sabhi bachche apne bade bhaai ke ghar aaye huye the, to achanak ek bhayanak aandhi chali aur woh ghar tahas-nahas ho gaya. ayyoob ke saare bachche ek-saath maare gaye.—ayyoob 1:12-19.

hum kalpana bhi nahin kar sakte ki ayyoob ke dil par kya beeti hogi. usne apne kapde faade, sir mundvaya aur zameen par gir pada. ayyoob ne socha ki parmeshvar ne hi usse sabkuch chheen liya hai. aakhir sabkuch usi ka diya hua tha. shaitan ne bhi badi chaalaki se use ehsas dilaya ki parmeshvar hi us par saari vipattiyaan laaya tha. magar itna kuch khone par bhi ayyoob ne parmeshvar ki ninda nahin ki, jabki shaitan ne kaha tha ki woh aisa karega. ulta ayyoob ne kaha, “yahova ke naam ki badai hoti rahe.”—ayyoob 1:20-22.

ayyoob ki vafadari dekhkar shaitan se raha nahin gaya. ek baar fir jab saare swargdoot yahova ke saamne ikattha huye, to woh bhi aaya. tab yahova ne dobara ayyoob ki taareef ki ki woh shaitan ke hamlon ke baavjood kitna vafadar hai. tab shaitan ne gusse mein aakar kaha, “khaal ke badle khaal. insan apni jaan bachane ke liye apna sabkuch de sakta hai. ab zara apna haath badha aur ayyoob ki haddi aur shareer ko chhoo. fir dekh, woh kaise tere munh par teri ninda karta hai!” shaitan ne socha ki agar ayyoob ko koi badi beemari lag jaaye, to woh zaroor parmeshvar ki ninda karega. magar yahova ko ayyoob par poora bharosa tha ki woh kisi bhi haal mein yahova ko nahin chhodega. yahi vajah hai ki usne shaitan ko ijazat di ki woh use beemar kar de, par uski jaan na le.—ayyoob 2:1-6.

jaise hi shaitan ko ijazat mili, usne ayyoob ko ek dardnak beemari se peedit kar diya. ayyoob ka jo haal hua, woh lekh ki shurooat mein bataya gaya hai. zara sochiye uski patni ko yah sab dekhkar kaisa laga hoga. ek to woh pehle hi apne das bachchon ko khone ka gam seh rahi thi. oopar se ab uske pati ki yah buri haalat ho gayi thi. usse bardasht nahin hua aur woh ayyoob se kehne lagi, “kya tu ab bhi nirdosh bana rahega? parmeshvar ki ninda kar aur mar jaa!” ayyoob jaanta tha ki woh kyon aisa keh rahi hai. usne itna kuch saha tha ki woh apna sudh-budh kho baithi. magar aise mein bhi ayyoob ne parmeshvar ki ninda nahin ki. uske munh se koi galat baat nahin nikli.—ayyoob 2:7-10.

ayyoob ki dardnak kahani hum mein se harek ke liye bahot maayne rakhti hai. gaur keejiye ki shaitan ne sirf ayyoob par nahin balki sabhi insanon par dosh lagaya ki woh apne swarth ke liye yahova ki baat maante hain. usne kaha, “insan  apni jaan bachane ke liye apna sabkuch de sakta hai.” shaitan ek tarah se keh raha tha ki koi bhi insan yahova ka vafadar nahin reh sakta. woh aapke  baare mein yahi kehta hai ki aapke dil mein parmeshvar ke liye sachcha pyar nahin hai. apni jaan bachane ke liye aap parmeshvar ke niyam tod deinge. doosre shabdon mein shaitan kehta hai ki aap bhi uski tarah swarthi hain. kya aap shaitan ko galat saabit karna chaheinge? aisa karne ka ek badhiya mauka aapke paas hai. (neetivachan 27:11) aaiye ab dobara ayyoob par gaur karein ki use aur kya-kya sahna pada.

ayyoob ki jaan-pehchanvale teen aadmiyon ne jab uski dukh-takleefon ke baare mein suna, to woh usse milne aaye. woh kaafi door se safar karke aaye the aur use dilasa dena chahte the. bible batati hai ki woh teenon ayyoob ke saathi the. unka naam tha eleepaj, bildad aur sopar. jab unhonne door se ayyoob ko dekha, to woh use pehchan nahin paaye. woh dard se tadap raha tha aur beemari se uski chamdi kaali pad gayi thi. ayyoob ka huliya hi badal gaya tha. ayyoob ko dekhkar unhonne shok manane ka bahot dhong kiya. woh bilakh-bilakhkar rone lage aur unhonne apne sir par dhool daali. fir woh ayyoob ke paas zameen par baith gaye. woh ek hafte tak yoon hi baithe rahe aur usse ek shabd bhi nahin kaha. iska matlab yah nahin ki woh uske dukh mein shareek ho rahe the. unhein dikh raha tha ki ayyoob dard se tadap raha hai. magar unhonne usse baat karke yah jaanne ki koshish nahin ki ki us par kya beet rahi hai.—ayyoob 2:11-13; 30:30.

jab koi kuch nahin bol raha tha to ayyoob ne hi bolna shuroo kiya. dard ki vajah se woh itni kadvahat se bhar gaya ki usne us din ko kosa jab woh paida hua tha. usne kaha ki parmeshvar hi us par yah saari takleefein laaya hai. (ayyoob 3:1, 2, 23) aisa sochne ki vajah se uska dukh aur badh gaya hoga. haalaanki usne parmeshvar ke baare mein aisa socha, fir bhi us par uska vishvas atal raha. magar use dilase ki bahot zaroorat thi. baad mein jab ayyoob ke teenon saathiyon ne bolna shuroo kiya, to unhonne aisa kuch nahin kaha jisse use dilasa mile. ulta unki baatein itni chubhnevali thi ki ayyoob ko laga ki woh chup rehte to hi achha hota.—ayyoob 13:5.

sabse pehle eleepaj ne kuch kaha. woh shaayad baaki donon aadmiyon se aur ayyoob se umra mein bada tha. fir baaki donon aadmiyon ne bhi baat ki. magar unhonne ne bhi eleepaj ki tarah bekar ki baatein kin. unhonne parmeshvar ke baare mein kuch aisi baatein kahin jo aksar log-baag kehte hain. jaise yah ki parmeshvar to bahot mahan hai, woh bure logon ko saza deta hai aur achhe logon ke saath achha karta hai. sunne mein shaayad yah sab hamein sahi lage, magar asal mein unki baaton se ayyoob ka dukh aur badh gaya. eleepaj keh raha tha ki parmeshvar to bhala hai. woh achhe logon ke saath achha karta hai aur bure logon ko hi saza deta hai. iska matlab ayyoob ne zaroor kuch bura kiya hoga aur yahi vajah hai ki use saza mil rahi hai.—ayyoob 4:1, 7, 8; 5:3-6.

ayyoob ko unki baatein sahi nahin lagin. usne jata diya ki woh unse sahmat nahin hai. (ayyoob 6:25) magar ayyoob ki baatein sunkar un teenon aadmiyon ko aur bhi yakeen ho gaya ki usne zaroor koi paap kiya hoga aur ab woh use chhipane ki koshish kar raha hai. uske saath jo bhi ho raha hai sahi ho raha hai. eleepaj ne kaha ki ayyoob ne apni maryada laangh di hai, usne dushtta ki hai aur usmein parmeshvar ka dar nahin raha. (ayyoob 15:4, 7-9, 20-24; 22:6-11) sopar ne ayyoob se kaha ki woh bure kaamon ka maza lena chhod de. (ayyoob 11:2, 3, 14; 20:5, 12, 13) aur bildad ne to had kar di. usne aisi baat kahi jo ayyoob ko andar tak chubh gayi hogi. usne kaha ki ayyoob ke beton ne bhi koi paap kiya hoga. woh maut ki saza ke hi laayak the.—ayyoob 8:4, 13.

un teenon aadmiyon ki soch bilkul galat thi. woh keh rahe the ki ayyoob parmeshvar ka vafadar nahin raha. unhonne yah tak keh diya ki koi bhi parmeshvar ka vafadar nahin reh sakta. jab eleepaj ne bolna shuroo kiya, to usne ek ajeebo-gareeb ghatna ka zikra kiya jo uske saath hui thi. usne kaha ki ek saaya uske saamne se guzra tha. woh saaya zaroor koi dusht swargdoot tha. uske behkave mein aakar eleepaj ne parmeshvar ke baare mein ek galat baat kahi. woh aisi baat hai jis par yakeen karne se parmeshvar par se ek insan ka vishvas uth jaayega. eleepaj ne kaha ki “parmeshvar ko apne sevkon par bharosa nahin, woh to apne swargdooton mein bhi galtiyaan nikaalta hai.” uske kehne ka yah matlab tha ki jab swargdoot parmeshvar ko khush nahin kar sakte, to insan kya hai? bildad ne kaha ki ayyoob parmeshvar ke vafadar rehne ki jo bhi koshish kare, parmeshvar ko koi fark nahin padta. insan to ek keede ke barabar hai.—ayyoob 4:12-18; 15:15; 22:2, 3; 25:4-6.

kya aap kabhi aise vyakti se milne gaye jo gehre dukh mein hai? aise vyakti ko dilasa dena aasan nahin hota. ayyoob ke teen saathiyon se hum seekhte hain ki ek dukhi insan se hamein kaisi baatein nahin kehni chahiye. unhonne bahot badi-badi baatein kin jo shaayad sunne mein sahi lagein. lekin sach to yah hai ki unhonne ayyoob se koi hamdardi nahin jatayi. unhonne itni der tak usse baat ki, magar ek baar bhi use naam se nahin pukara. unhonne is baat par bilkul dhyan nahin diya ki woh andar se kitna toot chuka hai. woh uske saath narmi se pesh nahin aaye. * unki galti se hum seekhte hain ki jab hum kisi dukhi insan se milte hain, to hamein bahot pyar se baat karni chahiye aur uski bhaavnaon ka khyal rakhna chahiye. hamein uska hausla badhana chahiye taaki parmeshvar par uska bharosa badhe. use yakeen dilana chahiye ki parmeshvar uske saath koi anyay nahin karega balki uska bhala karega aur us par daya karega. agar ayyoob un teenon saathiyon ki jagah hota, to woh unke saath isi tarah pesh aata. (ayyoob 16:4, 5) ab aaiye dekhein ki jab unhonne ayyoob ki vafadari par saval uthaya, to usne javab mein kya kaha.

jab ayyoob aur uske saathiyon ke beech behas shuroo hui, tab tak ayyoob ka dukh se bura haal tha. usne shuroo mein hi maan liya ki uski kuch baatein “besir-pair ki” hain, kyonki “dukhi insan bahot kuch keh jaata hai.” (ayyoob 6:3, 26) hum samajh sakte hain ki ayyoob ne aisi baatein kyon kahi hongi. uska dukh bardasht se baahar tha. use pata nahin tha ki uske saath yah sab kyon ho raha hai. ek to us par itni saari museebatein achanak aa gayin thi aur fir jo bhi hua woh insan ki samajh se pare tha. isliye ayyoob maan baitha ki yahova hi us par ye saari museebatein le aaya hai. magar vajah kuch aur thi. swarg mein ek aham masla chal raha tha jisse ayyoob anjan tha. is vajah se woh galat soch baitha.

magar parmeshvar par ayyoob ka vishvas atal tha aur yah uski baaton se saaf pata chalta hai. uski zyadatar baatein sachchi thi, sunne mein manbhavni thi aur unse aaj bhi hamein himmat milti hai. usne srishti ke baare mein baat karte vakt yahova ki taareef ki aur kuch aisi baatein kahin jo yahova ne hi us par zahir ki hongi. misal ke liye usne kaha ki yahova “prithvi ko bina kisi sahare ke latkaye huye hai.” (ayyoob 26:7) yah ek aisi sachchai hai jo vaigyanikon ne ayyoob ke zamane ke sadiyon baad pata ki thi. * ayyoob ne yah bhi kaha ki agar uski maut ho jaaye, to parmeshvar use yaad rakhega, uski kami use khalegi aur vakt aane par woh use zinda kar dega. uska yah vishvas utna hi atal tha jitna ki doosre vafadar stri-purushon ka tha.—ayyoob 14:13-15; ibraniyon 11:17-19, 35.

lekin ayyoob ke teen doston ne vafadari ke baare mein jo kaha, kya us par ayyoob ne yakeen kar liya? bilkul nahin. unhonne kaha tha ki insan parmeshvar ka vafadar rahe ya na rahe, isse parmeshvar ko koi fark nahin padta. magar ayyoob ne kaha ki insan ki vafadari par yahova zaroor dhyan deta hai. usne yahova ke baare mein poore bharose ke saath kaha, “woh jaan jaayega ki mujhmein zara bhi dosh nahin.” (ayyoob 31:6) ayyoob yah bhi jaan gaya ki uske teen dost jhoothi daleelein dekar yah saabit karna chahte the ki woh parmeshvar ka vafadar nahin hai. isliye ayyoob bhi chup nahin raha. woh apni safai mein kaafi der tak bolta raha aur uski baaton mein itna dam tha ki un teenon ki bolti band ho gayi.

ayyoob jaanta tha ki rozmarra zindagi mein uska chaalchalan nirdosh tha. isliye usne apni safai mein bataya ki woh zindagi ke har daayre mein kaise yahova ka vafadar raha. misal ke liye, woh har tarah ki moorti-pooja se door rehta tha, sabki izzat karta tha, zarooratmandon ki madad karta tha, uska charitra saaf tha, woh apni patni ka vafadar tha aur sabse khaas baat yah hai ki woh sirf yahova ki bhakti karta tha jo ekmatra sachcha parmeshvar hai. isliye woh keh saka, “mainne thaan liya hai, main marte dam tak nirdosh bana rahoonga.”—ayyoob 27:5; 31:1, 2, 9-11, 16-18, 26-28.

kya aap bhi ayyoob ki tarah maante hain ki aapko har haal mein yahova ke vafadar rehna chahiye? ayyoob jaanta tha ki yah kehna kaafi nahin hai ki hum vafadar hain, balki hum jis tarah ki zindagi jeete hain, usse dikhna chahiye ki hum vaakai mein vafadar hain. rozmarra zindagi mein hamein vahi karna chahiye jo yahova kehta hai. mushkilein aane par bhi hamein yahova ki aagya maanni chahiye. aisa karne se hum bhi ayyoob ki tarah yahova ko khush kar rahe honge aur uske dushman shaitan ko naakam kar rahe honge. ayyoob ke vishvas ki misal par chalne ka yahi sabse badhiya tareeka hai.

ayyoob ki kahani abhi khatm nahin hui hai. un teen saathiyon ke saamne apni safai dete samay woh ek zaroori baat bhool gaya. usne yahova ke paksh mein baat nahin ki. bas khud ko nirdosh saabit karne mein hi laga raha. ab uski soch sudharne ki zaroorat thi taaki woh maamle ko yahova ki nazar se dekh paaye. use dilase ki bhi zaroorat thi, kyonki woh bahot dukhi tha aur maatam mana raha tha. hum zaroor jaanna chaheinge ki yahova apne is vafadar sevak ke saath kaise pesh aaya jo vishvas ki ek badhiya misal tha. is shriankhala ke ek aur lekh mein bataya jaayega ki aage kya hua.