sahi maatra mein sharab peena paap nahin hai. bible batati hai ki daakh-madira parmeshvar ki taraf se tohfa hai, jo zindagi ko aur khushnuma bana deti hai. (bhajan 104:14, 15; sabhopdeshak 3:13; 9:7) bible yah bhi batati hai ki daakh-madira ko davai ke taur par bhi istemal kiya jaa sakta hai.—1 timuthiyus 5:23.

yeeshu jab dharti par tha, tab usne bhi daakh-madira pi thi. (matti 26:29; luka 7:34) yeeshu ke jaane-maane chamatkaron mein se ek tha ki usne ek shaadi ki daavat mein paani ko daakh-madira mein badal diya.—yuhanna 2:1-10.

had-se-zyada peene ke khatre

ek taraf jahaan bible daakh-madira ke faayadon ke baare mein batati hai, vahin doosri taraf woh had-se-zyada sharab peene ya piyakkadpan ko galat batati hai. isliye jo bhi maseehi sharab peene ka faisla karta hai, woh hamesha aisa apni had mein rehkar karega. (1 timuthiyus 3:8; titus 2:2, 3) bible mein aisi kai vajhein batayi gayi hain ki hamein kyon had-se-zyada sharab nahin peeni chahiye.

• yah hamari sochne-samajhne aur faisle lene ki kaabileeyat ko kamzor kar deti hai. (neetivachan 23:29-35) sharab ke nashe mein dhut ek vyakti, bible ki is aagya ko nahin maan sakta, “apne shareer ko jeevit, pavitra aur parmeshvar ko bhaanevale balidan ke taur par arpit karo. is tarah tum apni sochne-samajhne ki shakti ka istemal karte huye pavitra seva kar sakoge.”—romiyon 12:1.

• had-se-zyada sharab peene se ek vyakti apne hosh-havaas kho baithta hai aur yah uski ‘buddhi ko bhrasht karti hai.’—hoshe 4:11; ifisiyon 5:18.

• isse aap gareebee aur gambheer beemariyon ke shikar ho sakte hain.—neetivachan 23:21, 31, 32.

• had-se-zyada sharab peena aur piyakkad hona, parmeshvar ko nahin bhaata.—neetivachan 23:20; galatiyon 5:19-21.

kitna zyada, had-se-zyada hota hai?

peene ki vajah se jab ek vyakti khud ko ya doosron ko khatre mein daalta hai, to isse pata chalta hai ki usne bahot zyada sharab pi rakhi hai. bible ke mutabik, sharab ke nashe mein dhut vyakti hi piyakkad nahin hota, balki un logon ko bhi piyakkad kaha jaata hai jo sharab peene ke baad, apne hosh-havaas kho dete hain, ladkhadakar chalte hain, berukhi se pesh aate hain ya fir munh se shabd saaf-saaf nahin bol paate. (ayyoob 12:25; bhajan 107:27; neetivachan 23:29, 30, 33) jo log bahot sharab nahin peete, woh bhi ‘had-se-zyada peene ke bhaari bojh se dab’ sakte hain aur ho sakta hai unhein uske bure anjam bhugatne padein.—luka 21:34, 35.

poori tarah parhez

bible batati hai ki kuch maukon par maseehiyon ko sharab se parhez karna chahiye:

• agar aisa karne se doosron ko thokar lag jaaye.—romiyon 14:21.

• agar aisa karna us jagah ke kaanoon ke khilaf ho.—romiyon 13:1.

• agar ek vyakti apne peene par niyantran na rakh paaye. jo log sharab ki ya doosre tarah ke nashe ki lat se joojhte hain, unhein ise sudharne ke liye bade-se-bada kadam uthane ke liye taiyar rehna chahiye.—matti 5:29, 30.