Ginpagua sang mga Saksi ni Jehova ang Bag-ong Kalibutan nga Badbad sang Balaan nga Kasulatan sa Kikongo sa isa ka special meeting sa Angola sang Nobiembre 24, 2019.

Ang tanan nga kongregasyon sa Angola nga nagahambal sang Kikongo gin-agda sa sini nga miting. Si Brother Matthew Steggel, nga miembro sang Komite sang Sanga sa Angola, ang nagpagua sini nga Biblia. Ini nga okasyon ginhiwat sa Assembly Hall sa Viana, Angola kag gintambungan sang 2,053.

Pito ka tuig nga ginpangabudlayan sang translation team ini nga proyekto. Sang wala pa ang Bag-ong Kalibutan nga Badbad sa Kikongo, ginagamit sang mga kauturan ang Bag-ong Kalibutan nga Badbad sa Portuguese ukon ang iban nga translation sang Biblia sa Kikongo nga mabudlay pangitaon kag mahal kaayo.

Sang ginpagua ang Bag-ong Kalibutan nga Badbad sa Kikongo, madamo nga manugbantala ang subong pa lang nakabaton sang Biblia sa ila namat-an nga lenguahe. Ang isa sa mga translator nagsiling: “Makabulig gid ining bag-o nga translation sa aton mga kauturan nga mas maintiendihan ang Biblia kag matudlo ang kamatuoran sa iban sing mas maathag.”

May 1,524 ka manugbantala sa Kikongo nga mga kongregasyon sa Angola. Ginabulubanta nga duha ka milyon sa pungsod ang nagahambal sang Kikongo.

Sigurado kita nga ang Bag-ong Kalibutan nga Badbad sa Kikongo magabulig gid sa katawhan ni Jehova nga tumanon ang iya Pulong sing bug-os tagipusuon.—Salmo 119:34.