Sugod sang Hulyo 26 asta 28, 2019, ang mga Saksi ni Jehova sa Azerbaijan naghiwat sang ila tuigan nga kombension sa Darnagul Ceremony House sa Baku, ang kapital nga siudad. Sa sining tuig nga madamo nga internasyonal nga kombension ang ginahiwat, ang rehiyonal nga kombension sa Baku indi man malipatan. Amo ini ang pinakadaku nga pangpubliko nga rehiyonal nga kombension nga ginhiwat sa Azerbaijan. Sa una nga tion, dungan nga nagtambong sa isa ka kombension ang mga kongregasyon nga Azerbaijani kag Russian sa bilog nga pungsod.

Bisan pa mga 1,500 lamang ang manugbantala sa Azerbaijan, ang pinakamadamo nga nagtambong sa kombension nakalab-ot sa 1,938 kag 33 ang nabawtismuhan. Ginhatagan si Brother Mark Sanderson sing espesyal nga pahanugot para makasulod sia sa pungsod kag makapamulongpulong sa kombension. Amo ini ang una nga tion nga nagpamulongpulong sa kombension sa Azerbaijan ang isa ka miembro sang Nagadumala nga Hubon. Ginapasalamatan gid naton ang mga awtoridad sa paghatag nila sini nga pahanugot.

Ang paghiusa sang mga kauturan nangin matahom gid nga panaksi. Natalupangdan sang administrador sang ginhiwatan sang kombension ang paghidait, gugma, kag kaayo sa tunga sang mga Saksi kag nakita niya nga ginahimo gid nila ang ila ginawali.

Naeksperiensiahan gihapon sang mga Saksi ni Jehova ang paglapas sa ila kahilwayan sang relihion sa Azerbaijan, pero amat-amat na sila nga ginahatagan sing kahilwayan sa ila pagsimba. Sang Nobiembre 2018, bug-os na nga ginkilala sang Azerbaijan ang mga Saksi ni Jehova bilang isa ka relihion sa Baku. Bangod sini, mas hilway na ang kauturan naton nga magsimba sa sini nga siudad.

Nagakalipay kita upod sa aton kauturan sa Azerbaijan bangod sa sining positibo nga mga hitabo, lakip na ining indi malipatan nga kombension nga ginhiwat sa sini nga pungsod. Nagapangamuyo kita nga padayon nga pakamaayuhon ni Jehova ang aton mga panikasog nga ‘legal nga makapamatuod sang maayong balita’ sa Azerbaijan kag sa bilog nga kalibutan.—Filipos 1:7.