Sang Mayo 27, 2023, gin-release ni Brother Mark Sanderson, miembro sang Nagadumala nga Hubon, ang pinakauna nga kompleto nga New World Translation of the Holy Scriptures sa Russian Sign Language (RSL). May 148 nga nag-attend sing face-to-face sa programa. May 5,000 man ka tawo halin sa 15 ka pungsod nga nagtan-aw sang live stream ukon sang rekording sang programa. Ining bag-o gin-release nga Biblia available na sa jw.org kag sa JW Library Sign Language nga app.

Ang isa ka apa nga utod nagsiling: “Sang gintan-aw ko ang Biblia sa sign language, daw pareho lang nga makita ko ang ginbatyag ni Jesus sang nakita niya nga nagaantos ang mga tawo. Natandog gid sini ang akon tagipusuon!”

Antes gin-release ang Biblia sa RSL, madamo nga Saksi nga apa ang nagagamit sang naimprinta nga Biblia sa Russian. Pero, bangod ang RSL descriptive nga lenguahe, nabudlayan ang pila ka manugbantala nga maintiendihan ang pila ka ekspresyon.

Halimbawa, sa istorya sa 1 Hari 17, ginsilingan sang balo nga taga-Sarepta si manalagna Elias nga mapatay sila nga duha sang iya anak pagkatapos nila kaon. Abi sang pila ka apa nga mga kauturan, ang pagkaon sang balo pan-os na ukon may hilo. Sa RSL nga translation, gin-athag nga amo na ini ang ila katapusan nga pagkaon.

Ang RSL ginagamit sang sarisari nga tawo halin sa lainlain nga pungsod kag kultura. Gani, gindumdom sang mga translator nga sarisari ang paagi sa pag-sign sang mga tawo sa kada lugar. Ang isa ka translator nagsiling: “Ang sign nga posible nagakahulugan nga ‘sala’ sa isa ka rehiyon, nagakahulugan naman nga ‘Dios’ sa lain nga rehiyon. Dugang pa, ang sign para sa ‘disipulo’ sa isa ka lugar, nagakahulugan naman sang ‘pinakaulihi’ ukon ‘pigado’ sa iban nga lugar. Gani bilang translation team, ginagamit namon ang pinakapamilyar nga sign kag mga ekspresyon.”

Nalipay kita upod sa aton mga kauturan nga nagagamit sang RSL kag ginapasalamatan naton si Jehova kay ginhatagan niya sila sining matahom nga regalo.—Hulubaton 10:22.