Sang Hunyo 28, 2023, ang construction project sa Ramapo sa New York, U.S.A., nakabaton sang importante gid nga approval. Gin-aprubahan sang tanan nga miembro sang Town of Ramapo Planning Board ang site plan sang proyekto. Bisan madamo pa nga detalye ang kinahanglan tapuson, nakabulig ini nga approval nga mapadayon ang proyekto.

Makapainteres nga ang mga residente kag mga opisyal didto wala nagkontra ukon nagsambit sang mga problema sa tion sang Planning Board meeting. Si Brother Keith Cady, nga miembro sang Construction Project Committee (CPC), nagsiling: “Binulan gid ang paghanda namon para mapasa ang aton site plan kag masunod ang tanan nga pagsulundan. Gusto namon nga mangin mahapos para sa ila ang pag-approve sang aton aplikasyon.” Nakita sang board ang amon mga pagtinguha kag gin-aprubahan sang tanan nga miembro sini ang kada resolusyon nga ginpresentar parte sa proyekto. “Ang bilog nga pagbinagbinag kag pagdesisyon wala magsobra sa isa ka oras!” siling ni Brother David Soto, isa pa ka miembro sang CPC. “Ginapasalamatan namon ang Planning Board bangod sa ila nga pagpangabudlay, kapisan, kag kooperasyon. Nalipay kami nga makatrabaho liwat ang planning department sang banwa sa palaabuton.”

Ining pinakabag-o nga approval makabulig para mapadayon ang importante nga mga bahin sang proyekto sa Ramapo. “Kon makuha na ang ginpang-utod nga mga kahoy sa propiedad,” siling ni Brother Cady, “makasugod na ang mga contractor sa mga hilimuon sa site. Tapos sina, puede na makasugod sa pag-obra sa site ang dugang nga mga volunteer sa katapusan nga bahin sa masunod nga tuig. Excited gid ang tanan nga ara sa miting nga mabatian nga ang tanan nga miembro sang board nag-approve nga masugdan na ang obra sa indi madugay.”

Bilang bug-os kalibutan nga organisasyon, nagapasalamat gid kita kay Jehova sa sining bag-o nga approval. Ginapangamuyo naton nga padayon niya nga pakamaayuhon ang tanan nga nagapangabudlay sa sini nga proyekto samtang ‘nagahanda sila sa pagtukod.’—Nehemias 2:18.