Halin sang Hulyo 20 asta Agosto 20, 2023, sobra duha ka milyon ka tawo ang nag-attend sa FIFA Women’s World Cup soccer tournament, nga ginhiwat sa sarisari nga siudad sa bilog nga Australia kag New Zealand. Sa tion sang tournament, mga 1,200 ka kauturan ang nagpartisipar sa espesyal nga pagbantala nga hilikuton sa siam ka siudad sa sining duha ka pungsod. Indi magnubo sa 18 ka tawo ang nangabay sang Bible study.

Ginpalapitan sang duha ka babayi halin sa India ang cart sa Sydney, Australia, kag natalupangdan nila ang sign nga nagatanyag sang libre nga pagtuon sa Biblia. Ginpamangkot nila ang mga sister kon diin sila makadto para makatuon sa Biblia. Nagsabat ang mga sister nga ginahimo ang pagtuon sa Biblia sing indibiduwal kag may ara sang nagatudlo. Nagsiling man ang mga sister sa duha ka babayi nga puede sila makapangabay nga may personal nga magbisita sa ila paagi sa pag-scan sang QR code sa Magkabuhi sing Wala Katapusan! nga brosyur. Ginpil-apan dayon sang duha ka babayi ang online form, kag ginsugdan dayon ang pag-Bible study sa ila.

Ginbuligan sang mag-asawa nga Saksi sa Brisbane, Australia, ang isa ka bataon nga babayi nga nagtalang. Nagsiling ang babayi nga ginapangita niya kon diin ang iya hotel. Nagsugot ang mag-asawa nga Saksi nga buligan sia nga makita ini. Sa sina nga tion, nagsiling ang babayi sa mag-asawa nga halin sia sa Papua New Guinea. Nakibot sia sang nabal-an niya nga ang mag-asawa nagaistar man anay sa Papua New Guinea. Nami gid ang ila pag-istoryahanay kag naghatagay sila sang ila contact number. Nagsiling ang mag-asawa nga ilagaw nila sia sa siudad sina nga adlaw kag gingamit nila ini nga kahigayunan para sugiran sia sang mga kamatuoran sa Biblia. Sang nakabalik na sia sa iya pungsod, ginbaton sang bataon nga babayi ang gintanyag nga Bible study.

Sa Auckland, New Zealand, ang isa ka sister nga si Terina nagpakig-istorya sa duha ka security guard nga nagahambal sang Punjabi sa isa ka parking lot. May isa ka guardia nga gulpi nag-entra sa ila pag-istoryahanay kag gin-istorya niya ang duha ka lalaki sa Punjabi. Nagpamensar ang sister nga basi gin-akigan niya sila kay nag-istorya sila sa iya samtang naga-duty. Nakibot sia kay nagsiling ang lalaki nga gina-interpret niya ang ginahambal sang sister sa duha ka lalaki. Nagsiling pa sia: “Namangkot sila sa akon kon ano ang Biblia. Ginsilingan ko sila nga libro ini halin sa Dios. Insakto man?” Sang nagsiling si Terina nga insakto sia, ginpakita niya sa mga lalaki kon paano mangabay sang Bible study sa ila lenguahe gamit ang jw.org.

Nagpalapit sa isa ka cart sa Brisbane, Australia, ang isa ka lalaki nga taga-Colombia nga si Nicholas kag namangkot parte sa aton mga miting. Nagsiling sia nga ang iya nanay kag ang iya lolo kag lola mga Saksi ni Jehova kag ginapalig-on sia nga mag-attend sa mga miting. Ginpangabay sang mga brother sa cart ang isa ka Saksi halin sa kongregasyon nga nagahambal sang Spanish nga kontakon si Nicholas. Sa sulod sang isa ka oras, ginkontak sang brother nga nagahambal sang Spanish si Nicholas kag naghimo sang plano para maka-attend sia sa “Mangin Mapinasensiahon”! nga Rehiyonal nga Kombension sa sina nga weekend.

Nalipay kita nga ang aton mga kauturan sa Australia kag New Zealand may kahigayunan nga ‘magsiga subong mga suga’ paagi sa pagsugid sang maayong balita sang Ginharian sa sini nga event.—Filipos 2:15.