Pareho sa nareport na, ang 2022 amo ang ­ika-25 nga tuig nga may opisyal nga website ang mga Saksi ni Jehova. Pero pulo pa lang ka tuig sugod sang Agosto 27, 2012, gin-release ang ginpanami nga jw.org. Ini nga report nga tungaon sa tatlo ka bahin magasugid kon paano nakabulig sa minilyon ka tawo ang ginpanami nga jw.org.

Video: Sa mga kombension sang 2012, ang una nga duha ka bahin sang serye nga Mangin Abyan ni Jehova gin-release sa DVD. Pero amat-amat nga wala na ginagamit ang DVD kag daku ang gasto sa paghimo sini. Sang ang ginpanami nga website nangin available sang summer sang 2012, nangin mas mahapos para sa mga tawo nga matan-aw ang mga video. Gani, sang Enero 2013, ang masunod nga episode sang Mangin Abyan ni Jehova, nga may title nga Mangamuyo Pirme, gin-release sa digital format sa jw.org. Halin sadto, sobra na 40 ka episode ang na-release.

Ang video nga Ngaa Dapat Tun-an ang Biblia? gin-release man sa digital format sang 2013. Ini nga video nangin importante nga galamiton sa ministeryo kag ara sa Teaching Toolbox. Sugod sadto nga release, ang jw.org nangin importante nga bahin sang pagbantala. Halimbawa, sa kampanya para ipanagtag ang tract nga naga-advertise sang jw.org sang Agosto 2014, mga 15 ka milyon ka video ang na-download ukon natan-aw.

Ang isa ka brother nga nakabulig sa pagdesinyo sang jw.org nagsiling: “Makapabakod gid sang pagtuo nga makita kon paano kita ginhanda ni Jehova para sa matabo sa palaabuton. Wala kami sing ideya sadto nga tion nga ang bag-o nga pamaagi sa pag-distribute sang mga video mangin daku gid nga bulig sa ulihi.” Halimbawa, ang JW Broadcasting ginsugdan sang Oktubre 2014, kag sobra 37 ka milyon ka video ang gin-download sina nga bulan. Sang nagsugod ang COVID-19 nga pandemic sang 2020, mas madamo pa gid nga mga video ang na-download ukon natan-aw sa jw.org. Sang 2022, may average nga sobra 260 ka milyon nga video ang gina-download sa jw.org kada bulan.

Digital Publication: Sa nagligad nga mga tinuig, madamo nga tawo ang mas nanamian magbasa online ukon sa ila cell phone imbes sa naimprinta nga balasahon. Paagi sa mas ginpanami nga website sang 2012, mabasa na ang mga magazine online, kag sa masami antes pa mag-abot ang naimprinta nga edisyon. Ang paghimo sang digital nga mga publikasyon para sa website nakabulig para mas mahapos nga ma-introduce ang JW Library nga app sang 2013. Ang app kag ang website pareho nga manami nga mga galamiton nga nakabulig sa mga tawo sa pagbasa kag pagtuon sang digital nga mga publikasyon.

Sang una, ang mga publikasyon nga gina-release sa mga kombension kon summer indi available sa website ukon sa app asta sa Enero pagkadason nga tuig. Pero sang rehiyonal nga kombension sang 2015, nalipay ang mga tumalambong kay nabal-an nila nga puede na dayon ma-download ang digital nga edisyon sang mga gin-release sa kombension. Nalakip sa sini ang libro nga Si Jesus—Ang Dalan, ang Kamatuoran, ang Kabuhi kag ang Magbalik kay Jehova, pati man ang video nga What Is True Love? Pagkadason nga tuig, sang Mayo 2016 nga JW Broadcasting program, gin-release ni Brother Anthony Morris sang Nagadumala nga Hubon ang brosyur nga Sabat sa 10 ka Pamangkot sang mga Pamatan-on kag ginpahibalo niya nga ma-download na ini gilayon. Amo ini ang una nga bes nga may publikasyon nga gin-release sing dungan sa mga kauturan sa bilog nga kalibutan.

Halin sang una, ginagamit gid sang organisasyon ni Jehova ang teknolohiya para ibantala ang maayong balita kag suportahan ang mga kauturan. Nalipay gid kita nga makita kon paano gingamit ang jw.org nga website para mangin available ang “pagkaon sa nagakaigo nga tion.”—Mateo 24:45.

• Video nga gina-download kada bulan

• Adlaw-adlaw nga nagabukas sang website kada bulan

• Pag-release sang Mangamuyo Pirme, Enero 2013

• Pag-release sang JW Library nga app, Oktubre 2013

• Bilog kalibutan nga kampanya sang tract nga nagapakilala sang jw.org, Agosto 2014

• Pag-release sang JW Broadcasting, Oktubre 2014

• Available na online ang mga gin-release sa kombension, Mayo 2015

• Pag-release sa bilog nga kalibutan sang Sabat sa 10 ka Pamangkot sang mga Pamatan-on, Mayo 2016