Sang Abril 7, 2021, nagdesisyon ang Constitutional Court of Colombia pabor sa isa sa mga Saksi ni Jehova parte sa kinamatarong sang isa ka menor de edad nga magdesisyon kon ano nga klase sang pagpabulong ang gusto niya. Sa sini nga kaso, nagpangabay ang pasyente nga magpabulong, pero gusto niya ang paagi sang pagbulong nga wala nagagamit sing dugo. Nagsiling man ang Constitutional Court nga legal ang durable power of attorney (DPA) nga ginpirmahan sang isa ka menor de edad nga makasarang na magdesisyon kag indi buot silingon sini nga ginapabay-an na lang sang mga ginikanan ang ila responsibilidad nga ipabulong ang ila mga bata.

Sang Mayo 27, 2020, si Sister Daniela Caicedo, 16 anyos sadto, na-diagnose nga may B-cell acute lymphoblastic leukemia. Gusto sang mga doktor kag mga nars nga tughungan sia sang dugo samtang gina-chemotherapy sia. Bisan pa maluya katama si Daniela, ginpaathag niya sa ila nga indi sia magpatughong sing dugo bangod sa iya mga ginapatihan base sa Biblia.—Binuhatan 15:29.

Sang Hunyo 24, 2020, ginhatagan sang awtoridad sang Colombian Institute of Family Welfare (ICBF) ang mga doktor kag mga nars nga tughungan sia sing dugo bisan pa nagpangindi sa sini si Daniela. Nagpangabay man ang ICBF nga ipaidalom si Daniela sa psychological evaluation. Sa tion sang evaluation, ginpamatud-an sang aton sister nga hamtong na sia kag may ikasarang sia nga magdesisyon kon ano nga klase sang pagpabulong ang gusto niya. Ginapakita man sang resulta sang evaluation nga nangindi si Daniela nga magpatughong sang dugo, indi bangod ginpilit sia. Kundi, ang iya desisyon nabase sa iya mga ginapatihan.

Ginpangapinan sang judge sang manubo nga korte ang kinamatarong ni Daniela nga magpangindi sa pagpatughong sing dugo, kay man bisan pa menor de edad sia may ikasarang sia nga magdesisyon. Pero ang court of appeals nagdesisyon nga kon magsiling ang doktor nga dapat sia tughungan sing dugo, dapat ini himuon. Bangod sini, nag-apelar si Daniela kag ang iya mga ginikanan sa Constitutional Court para pangapinan ang ila kinamatarong nga magpangindi sa pagpatughong sing dugo.

Sa katapusan nga desisyon sini, ginpangapinan sang Constitutional Court ang kinamatarong ni Daniela. Ginkilala sang korte nga ang kahilwayan sa relihion “nagaamlig sa kaangtanan sang isa ka tawo sa Dios kag sa pagsimba niya sa iya.” Nagsiling pa ini nga ang pagtughong sang dugo kay Daniela bisan indi niya gusto makaguba sang iya paghidait sa Dios, kag nagalapas sang iya mga kinamatarong kag dignidad. Nagdesisyon man ang korte nga may kinamatarong sia sa pagpili sang paagi sang pagbulong nga wala nagagamit sing dugo.

Ginapakita sining importante nga desisyon nga obligasyon sang mga doktor kag mga nars nga respetuhon ang kinamatarong sang isa ka menor de edad nga Saksi nga magpabulong suno sa iya mga ginapatihan. Ang isa sa mga abogado sa sini nga kaso nagsiling: “Ginkilala sang Constitutional Court nga kon dapat respetuhon ang kinamatarong sang isa ka menor de edad nga mabuhi, dapat man respetuhon ang iya kinamatarong nga himuon ang makapalipay sa iya. Bangod sini, para mangin malipayon ang ila kabuhi, dapat respetuhon ang ila mga ginapatihan, bisan pa lain ini sa ginapatihan sang mga judge kag mga doktor.”

Pagkatapos mabatian ang desisyon sang Constitutional Court, si Daniela nagsiling: “Ang rason gid kon ngaa nalipay ako kay napadunggan ang ngalan ni Jehova. Natun-an ko sa sini nga sitwasyon nga bisan ano man nga pagtilaw ang aton maeksperiensiahan, sa bulig ni Jehova puede ini mangin kahigayunan para mapakita naton sa iya kon daw ano naton sia ka palangga.”

Maayoayo na subong ang panglawas ni Daniela, kag padayon pa ang pagbulong sa iya. Maeskwela sia sa PSS sa Agosto 2021. Kabalo kita nga nalipay gid si Jehova nga Dios nga makita ang mga pamatan-on nga nagahimo sang ila bug-os nga masarangan nga mapadunggan sia.—Salmo 148:12, 13.