Ang tuig 2022 amo ang ika-100 nga tuig sugod sang nagbantala ang mga Saksi ni Jehova sa Cyprus, nga isa ka isla sa Mediterranean. Sa una nga paglakbay ni apostol Pablo bilang misyonero ginbisitahan niya ini nga isla upod kay Bernabe nga pumuluyo sang Cyprus. Sa modernong panahon, ang maayong balita posible nga nakalab-ot sa Cyprus sang 1922 sang ang isa ka klero nakabaton sang booklet nga Does the Soul Die?

Duha ka tuig sang ulihi, si Cyrus Charalambous, nga isa ka Estudyante sang Biblia nga nagaistar sa United States, nagpauli sa Cyprus. Mapisan sia nga nagbantala kag ginpadal-an niya sang tract nga Where Are the Dead? ang tanan nga banwa kag baryo sa Cyprus.

Nabaton ni Antonis Spetsiotes ang isa sa sining mga tract. Narealisar niya nga ang iya nabasa amo gid ang kamatuoran kag ginsugid niya ini sa iya kaingod nga si Andreas Christou. Dayon, ginsugid man nila nga duha ang ila mga natun-an sa iban.

Ginkontra sila sang Greek Orthodox Church bangod sa ila pagbantala. Gani, si Antonis kag si Andreas ginpahalin bilang mga miembro sang simbahan. Pero wala gid sila mag-untat sa pagbantala. Bangod sini, natukod ang una nga kongregasyon sa Cyprus sa baryo sang Xylophagou sang dekada ’30.

Sang 1947, nag-abot sa Cyprus ang una nga misyonero nga nakaeskwela sa Gilead nga si Antonios Karandinos. Ginbuligan niya ang mga kauturan sa ila pagbantala. Sang 1948, may 50 na ka manugbantala sa isla, kag natukod ang una nga branch office. Sang 1960, naghimo sang legal nga korporasyon ang mga kauturan. Duha ka tuig sang ulihi, ang una nga Kingdom Hall natukod sa Nicosia. Padayon nga nagdamo ang mga Saksi kag sang 1969, gindedikar ang bag-o kag mas daku nga pasilidad sang Bethel.

Pero samtang nagadamo ang mga kauturan nagdugang man ang paghingabot. Sang tungatunga sang dekada ’60, ang pamatan-on nga mga brother nga indi magsoldado ginpriso. Gin-torture sang mga army ang pila sa ila para piliton sila nga magsoldado.

Nagdugang pa gid ang kabudlayan sang mga kauturan sang 1974 sang nag-inaway sa isla. Mga 300 sa aton mga kauturan ang nangin refugee. Kinahanglan biyaan sang pamilya Bethel ang branch facility. Ginbuligan dayon sang mga kauturan sa iban nga pungsod ang mga kauturan sa Cyprus paagi sa pagpadala sang mga relief supply. Ginpadayon sang pila ka kauturan sa ila mga balay ang pila ka kauturan nga nagbakwit.

Sa nagsunod nga mga tinuig, padayon nga nag-uswag ang pagbantala. Dugang pa, sang 2006, naeksperiensiahan sang mga kauturan ang isa sa pinakaimportante nga okasyon. Amo ini ang “Malapit Na ang Kaluwasan” nga Distrito nga Kombension sa Limassol. Sa una nga tion sa sulod sang madamo nga tinuig, ang tanan nga Saksi ni Jehova sa Cyprus nakaupdanay sa isa ka okasyon.

Subong, may 2,866 ka manugbantala sa 41 ka kongregasyon kag 17 ka grupo, sa 14 ka lenguahe sa isla. Sang 2021, may 5,588 nga nag-attend sa Memoryal sang kamatayon sang Cristo.

Nagakalipay kita upod sa aton mga kauturan sa Cyprus. Kabalo kita nga sa bulig ni Jehova magapadayon sila sa amo gihapon nga dalanon.—Filipos 3:16.