Sang Enero 27, 2021, ginhiwat sang State Parliament of Baden-Württemberg, sa Germany ang ila tuigan nga pagdumdom sa mga nabiktima sang paggahom sang Nazi sang World War II. Sa sini nga tuig, nagpokus sila sa inagihan sang mga Saksi ni Jehova. Bangod sang COVID-19 nga pandemic, ginhiwat ini nga programa online. Sobra 37,000 ka tawo halin sa Austria, Germany, Netherlands, kag Switzerland ang nagtan-aw sini nga programa. Ginrekord ini nga programa, kag mga 78,000 ka beses pa ini nga gintan-aw liwat.

Si Muhterem Aras, ang presidente sang Baden-Württemberg State Parliament, nagsiling nga “madamo kita sing mabasa nga impormasyon sa mga libro kon paano ginhingabot ang mga Saksi ni Jehova, pero diutay lang nga tawo ang nakahibalo parte sa sini.” Nagsiling pa sia nga ang ginhimo sang mga Saksi ni Jehova sadtong mabudlay nga tion sa kasaysayan “isa gid ka halimbawa sa aton subong para malikawan ang dumot, diskriminasyon, kag ang . . . kapintas.”

Ginbinagbinag ni President Aras sang State Parliament ang istorya ni Anna Denz, isa ka Saksi ni Jehova sa Lörrach, Baden-Württemberg. Napatay ang iya mga ginikanan sa mga concentration camp. Sa ila eskwelahan, nangindi si Anna nga magsiling sing “Heil Hitler.” Nakapalagyo sia pakadto sa Switzerland paagi sa bulig sang iban nga Saksi. Sang ulihi, nagsaylo sila sang iya bana sa United States. “Maisog gid si Anna kay nagpangindi sia,” siling ni President Aras sang State Parliament. “Ang iya pagtuo amo ang nakabulig sa iya nga mangin maisog.”

Ginpaathag sang isa ka historian nga si Dr. Hans Hesse kon paano gindumilian ang hilikuton sang mga Saksi ni Jehova sa Germany sang 1933, duha pa lang ka bulan sugod sang naggahom ang Nazi. Ginpaathag ni Dr. Hesse sa mga nagatan-aw sing programa nga ang aton mga kauturan “nanindugan paagi sa pagpanagtag sang mga leaflet kag padayon nga pagbantala.”

Ginsaysay man niya ang eksperiensia ni Brother Gustaf Stange. Nagpangindi si Brother Gustaf Stange sa pagsoldado bangod sa iya konsiensia. Sang nag-atubang sia sa korte, ginpamangkot sia sang mga piskal: “Kon ang tanan nga tawo indi magsoldado pareho sa imo, ano ayhan ang matabo?” Ang aton brother nagsabat: “Mauntat dayon ang inaway.”

Sa sini nga programa, gin-play man ang musika halin sa kanta nga “Sulong, mga Saksi!” nga isa sa aton mga Kingdom song. Ginpaathag ni Brother Wolfram Slupina, nga nagadumala sang hilikuton sang Public Information Desk sa Central Europe branch, nga ang orihinal nga lyrics sini nga kanta ginkomposo ni Brother Erich Frost sang napriso sia sa concentration camp sa Sachsenhausen sang 1942. Sang gin-interbyu si Brother Frost, madamo na nga tinuig ang nagligad, ginpaathag niya nga ginsulat niya ina nga kanta para palig-unon ang kaupod niya nga mga priso, kay “grabe gid nga pagpamintas ang ila naagyan sa concentration camp kag daw indi na nila ini maagwanta.”

Si Mara kag si Finn Kemper, nga 13 kag 15 anyos, mga Saksi ni Jehova. Gin-interbyu nila si Sister Simone Arnold Liebster, nga nakaeksperiensia sang paghingabot sang Nazi. Sang bata pa si Sister Liebster, grabe gid nga pagpamatok ang iya naeksperiensiahan. Bangod nangindi sia nga mag-entra sa mga Nazi, ginpadala sia sang mga awtoridad sang Nazi sa isa ka reform school. Nagsiling sia nga “daku gid ang iya kalipay” kay nakapabilin sia nga matutom bisan pa sang grabe nga paghingabot sa iya.

Nalipay gid kita nga bangod sini nga programa nasugiran ang madamo nga tawo parte kay Jehova, ang masaligan nga Manugbulig sa tion sang grabe nga paghingabot.—Hebreo 13:6.