Sang Marso 31, 2024, si Sister Hermine Schmidt napatay sa edad nga 98. Sia ang nabilin nga Saksi ni Jehova nga nakaeksperiensia nga mapriso sa isa ka concentration camp sang mga Nazi bangod sang iya pagtuo.

Si Hermine natawo sang Nobiembre 13, 1925, sa siudad sang Gdańsk, nga subong bahin na sang Poland. Ang iya ginikanan, nga si Oskar kag Frieda Koschmieder, mga Saksi ni Jehova. Ginbuligan nila sia nga mangin mabakod ang iya pagtuo kag magsalig kay Jehova. Sang 1939, ginsakop sang mga Nazi ang Gdańsk, kag nagsugod ang mapintas nga paghingabot sa mga Saksi ni Jehova. Sa sina nga tion, gindedikar ni Hermine ang iya kabuhi kay Jehova kag nabawtismuhan sia sang Mayo 2, 1942, sa edad nga 16 anyos.

Pagkasunod nga tuig, sang Hunyo 1943, gin-aresto sang mga Nazi kag gin-detain ang 17 anyos nga si Hermine. Gin-aresto sia liwat sang Abril 1944, kag sa sini nga tion gindala sia sa concentration camp sa Stutthof. Sang ginpamensar ni Hermine ang mabudlay nga tion sadto, sia nagsiling: “Kalain gid sang mga natabo. Ginpakahuy-an kami kag nasakitan gid kami. Ginhimo sang Gestapo ang tanan para maluyahan ako. Indi ako isa ka hero. Normal lang ako nga babayi. Pero wala gid ako nagduhaduha kon ano ang dapat ko himuon. Parte ini sa akon pagkamainunungon kag determinasyon nga sundon ang akon konsiensia. Kon sundon mo ang imo konsiensia, makabatyag ka gid sang paghidait, paghidait sa imo kaugalingon kag paghidait upod sa Dios.”

Pagligad sang isa ka tuig, sang Abril 1945, nakalab-ot ang mga soldado sang Russia sa Stutthof camp. Ginpilit nga ginpasakay sang mga German SS guard ang mga priso sa mga barko kag ginbiyaan sila sa dagat imbes nga hilwayon sila sang mga soldado sang Russia. Si Hermine kag ang 370 nga iban pa na-rescue sang ginbutong ang ila barko pakadto sa isla sang Møn sa Denmark sang Mayo 1945. Wala madugay, nakaupod liwat ni Hermine ang iya mga ginikanan.

Sang 1947, napamana ni Hermine si Horst Schmidt. Nangindi si Horst nga magsoldado kag sia ang nagadala sang base sa Biblia nga mga literatura samtang gin-ban ang hilikuton sang mga Saksi ni Jehova. Gin-hearing sia, ginsentensiahan sang kamatayon, kag ginpriso sa Brandenburg-Görden penitentiary. Nahilway ang prisuhan sang Abril 27, 1945, antes sang naiskedyul nga pagpatay sa iya. Nakasal si Horst kag Hermine sing halos 63 ka tuig asta sang napatay si Horst sang 2010.

Malawig nga tinuig nga ginaistorya sang mag-asawa nga Schmidt ang ila eksperiensia. Sa isa ka interbyu sang 1998, ginsugid ni Hermine kon paano sia nangin matutom sa Dios: “Indi gid ini mahapos nga kabuhi, pero amo ini ang pinakamanami. Indi ko gid ini pag-ibaylo sa bisan ano nga butang.”

Nagapasalamat kita sa halimbawa sang pagtuo ni Hermine samtang ara sia sa kabudlayan. Kabay nga ilugon naton ang iya pagtuo paagi sa pagpakita sang kaisog kag kabakod, kag magsalig nga amligan gid pirme ni Jehova ang matutom sa iya.—Salmo 31:23, 24.