Sang Hunyo 10, 2023, gin-release ni Brother Geoffrey Jackson, miembro sang Nagadumala nga Hubon, ang The Bible—The Good News According to Matthew sa Romany (Southern Greece) nga lenguahe. Gin-release ini nga libro sang Biblia sa isa ka special meeting nga ginhiwat sa branch office sa Piraeus, Greece. Sobra 29,000 ka tawo ang nagtan-aw sang programa, nga gin-stream sa tanan nga kongregasyon sa Greece kag Cyprus. Pagkatapos sang programa, puede na dayon ma-download ang digital nga pormat sang libro. Ang naimprinta nga mga kopya mangin available sa mga kongregasyon sa masunod nga binulan.

Wala sing opisyal nga pagsulundan sa pagsulat kag paghambal sang lenguahe nga Romany (Southern Greece), gani mabudlay gid ang pag-translate sini. May ara pulo ka translator ang Romany (Southern Greece) translation team sa branch office sa Greece. Nakabaton man sing daku nga bulig ang team halin sa mga kauturan nga remote volunteer.

Sang mabasa sang isa ka sister ang libro sang Mateo sa Romany (Southern Greece) nga lenguahe, sia nagsiling: “Nakilala ko si Jehova paagi sa isa ka Bible study sa Greek nga lenguahe. Bisan pa naintiendihan ko ang akon nabasa kag nabatian, ang pagbasa sang Biblia sa akon namat-an nga lenguahe nakatandog gid sang akon tagipusuon kag nagpalig-on pa gid sa akon nga sundon ang akon natun-an.”

Nagsiling man ang isa ka sister: “Natandog gid ako sa pag-translate sang Mateo 26:38, 39 sa Romany (Southern Greece). Ginsilingan ni Jesus ang iya mga disipulo nga ‘nagakasubo sia sing tuman nga daw mapatay sia.’ Pero nangamuyo sia kay Jehova nga hatagan sia sing kusog para mahimo ang Iya kabubut-on. Nahangpan ko na gid ini nga mga bersikulo kag nagpasalig ini sa akon nga indi sala nga masubuan kon kaisa. Nagpahanumdom man ini sa akon nga mangamuyo gid kay Jehova kag mangayo sing kusog nga maatubang ang mga kabudlayan kag masugid ang akon ginabatyag sa mga kauturan.”

Nagakalipay kita upod sa aton Romany nga mga kauturan samtang nagabenepisyo sila sa sining manami nga regalo nga makapasuod pa gid sa ila kay Jehova.—Santiago 4:8.