Ginkondenar sang 15 ka miembro sang United Nations Human Rights Committee (CCPR) ang Kyrgyzstan bangod sa paglapas sini sang panguna nga kinamatarong sang mga Saksi ni Jehova nga himuon ang mga hilikuton sang ila relihion sa tatlo ka rehiyon sang pungsod. Sa pito ka pahina nga desisyon sang CCPR, ginmanduan sini ang Kyrgyzstan nga bayaran sang “nagakaigo nga danyos” ang mga Saksi kag “himuon ang tanan nga kinahanglanon para malikawan nga masulit ini nga paglapas sa palaabuton.” Ikaduha na ini nga tion nga ginkondenar sang CCPR ang Kyrgyzstan bangod sa paglapas sang kinamatarong sang mga Saksi.

Ang una nga grupo sang mga Saksi ni Jehova sa Kyrgyzstan ginrehistro sang 1993, kag ginrehistro sila sa bilog nga pungsod sang 1998. Gani, malawig na nga tinuig nga hilway ang mga Saksi sa paghimo sang ila pagsimba sa halos bilog nga pungsod. Pero, sa sulod sang sobra pulo ka tuig, wala gid ginrehistro sang State Committee on Religious Affairs (SCRA) ang tatlo ka bag-o nga lokal nga organisasyon sang mga Saksi ni Jehova sa southern region sang Osh, Naryn, kag Jalal-Abad. Wala gid sila marehistro bisan pa sulitsulit nga nagaaplay ang mga kauturan didto. Bangod sa ginhimo sang SCRA nalimitehan ang mga hilikuton sang mga kauturan. Limitado ang ila paghimo sang mga hilikuton sang ila relihion, pagdumala sang mga miting kag asembleya, kag indi man sila makapanag-iya kag makagamit sang propiedad para sa ila pagsimba. Gani, nagdesisyon ang CCPR nga may diskriminasyon ang Kyrgyzstan batok sa mga Saksi ni Jehova sa sining tatlo ka rehiyon bangod lamang sa ila relihioso nga pagpati.

Ginapaabot sang CCPR nga “himuon [sang Kyrgyzstan] ang tanan nga kinahanglanon para malikawan nga masulit ini nga paglapas sa palaabuton.” Ginhatagan ang Kyrgyzstan sang 180 ka adlaw para pahibaluon ang CCPR sang ila ginahimo nga panikasog bilang pagsunod sa sini nga desisyon.

Ginabantayan pa kon bala tumanon gid man sang mga awtoridad sang Kyrgyzstan ang desisyon sang CCPR kag tugutan ang aton mga kauturan sa sini nga mga rehiyon nga himuon ang ila relihioso nga mga hilikuton. Ginamonitor gid sang mga human rights expert sa Forum 18 ini nga hitabo kag nagreport sila nga “wala gintuman [sang SCRA] ang pareho man nga desisyon sang UN sang 2019.”

Tumanon man ukon indi sang Kyrgyzstan ang desisyon sang UN, makasalig kita nga nahibaluan ni Jehova ang sitwasyon sang aton mga kauturan sa Kyrgyzstan. (Salmo 37:18) Padayon nga pakamaayuhon sang aton mahigugmaon nga Amay sa langit ang ila pagkamainunungon kag kaisog.—Salmo 37:28.