Ang Septiembre 1, 2022, amo ang ika-75 nga tuig sugod sang ginhimo ang Tagalog nga edisyon sang The Watchtower. Sang ginsugdan ini, 600 ka gin-mimeograph nga kopya lang kada isyu ang ginhimo. Pero subong, sobra 1.2 ka milyon na ang ginaimprinta kada isyu. Available man ini sa electronic nga pormat sa jw.org.

Ang maayong balita nakalab-ot sa Pilipinas sang mga 1908. Sang may branch na sang 1924, nangin mas organisado ang pagbantala nga hilikuton. Ingles lang nga literatura ang kalabanan nga ginagamit, pero nakita sang mga kauturan nga kinahanglan ini i-translate sa Tagalog.

Pagkatapos sang World War II, sang Hunyo 14, 1947, nag-abot sa Pilipinas ang mga misyonero nga nahanas sa Gilead. Sila amo si Earl Stewart, si Victor White, kag si Lorenzo Alpiche. Ginpasugdan dayon ni Brother Stewart, nga amo ang bag-o gin-asayn nga branch servant sadto, sa kalipikado nga mga kauturan ang pag-translate sang The Watchtower sa Tagalog. Sang Septiembre sina nga tuig, may duha na ka edisyon sang The Watchtower kada bulan nga magamit sang mga kauturan sa pagbantala.

Madamo sa mga translator sadto ang may obra kon adlaw para suportahan ang ila pamilya, gani ginapulawan nila ang pag-translate sang mga publikasyon kada gab-i. Si Brother Hilarion Amores, nga isa sa sini nga mga translator, nagsiling: “May mga tion nga naga-translate kami asta sa alas dos sang kaagahon. Pero malipayon kami kay nagabulig kami para makatigayon ang mga kauturan sang base sa Biblia nga mga publikasyon nga kinahanglan gid nila.”

Subong, may 97,443 ka manugbantala sa 1,126 ka kongregasyon nga nagahambal sang Tagalog sa Pilipinas. Mga 76.5 ka milyon ang nagahambal sang Tagalog sa pungsod kag may sobra 115,000 ka manugbantala nga nagahambal sang Tagalog sa bilog nga kalibutan. Ang Tagalog nga mga publikasyon ginapanagtag sa madamo nga pungsod, kag ginabasa ini sang mga kauturan kag mga interesado nga nagahambal sang Tagalog sa bilog nga kalibutan.

Nagapasalamat gid kita kay Jehova nga paagi sa iya organisasyon, nagaaman sia sing espirituwal nga pagkaon sa minilyon ka tawo sa bilog nga kalibutan sa ila kaugalingon nga lenguahe.—Mateo 24:45, 46.