Sang Oktubre 25, 2021, nagdesisyon ang Pavlovo City Court of the Nizhny Novgorod Region nga guilty sanday Brother Oreshkov, Brother Rakovskiy, kag Brother Vavilov. Ang kada isa sa ila ginsentensiahan sing tatlo ka tuig nga suspended prison.

Aleksey Oreshkov

• Natawo: 1971 (Pavlovo, Nizhny Novgorod Region)

• Biograpiya: Sang bata sia, nanamian sia mag-table tennis. Naggradweyt sia sa isa ka university nga nagatudlo sing music kag nangin major niya ang pagtokar sing mga wind instrument. Retirado na sia subong. Tinuig na niya nga ginaatipan ang iya tigulang na nga iloy. Nabawtismuhan sia bilang isa sa mga Saksi ni Jehova sang 2011

Aleksandr Rakovskiy

• Natawo: 1980 (Pavlovo, Nizhny Novgorod Region)

• Biograpiya: Sang pamatan-on sia, nagagitara sia kag miembro sia sang isa ka musical group. Nagtrabaho sia bilang isa ka Internet technology specialist. Napangasawa niya si Tatyana sang 2005. Sang nabal-an nila ang parte sa paglaum nga ginasugid sang Biblia sa palaabuton, nagtuon sila sing Biblia upod sa mga Saksi ni Jehova. Nabawtismuhan sia sang 2009. May duha sila ka bata, isa ka lalaki kag isa ka babayi

Aleksandr Vavilov

• Natawo: 1967 (Kropotkin, Krasnodar Region)

• Biograpiya: Sang pamatan-on sia, nanamian sia magdalagan, maglangoy, mag-ski, kag mag-paint sang mga portrait. Nangin soldado sia. Nag-training man sia para mangin boksingero. Sang ulihi, nagdesisyon sia nga indi na mag-entra sa mapintas nga sport kag nangin barbero sia. Nag-study sila sa Biblia sang iya asawa nga si Yelena upod sa mga Saksi ni Jehova. Nagpakasal sila sang 1994 kag nabawtismuhan sang 1995. Nanamian gid sila maglagawlagaw para ma-enjoy ang palibot

Sang Hulyo 16 kag 17, 2019, ginhalughog sang mga agent sang Federal Security Service (FSB) ang mga balay sang mga Saksi ni Jehova sa Nizhny Novgorod Region. Pagkatapos sini nga raid, gin-interogar nila si Aleksey Oreshkov kag si Aleksandr Vavilov kag dayon gindala sa pretrial detention. Gin-detain si Aleksey sing 211 ka adlaw kag gin-house arrest sing 31 ka adlaw. Gin-detain naman si Aleksandr sing 241 ka adlaw.

Sang gin-detain si Aleksey, nagsiling sia nga mas masunson na sia nga nagapangamuyo kag mas hanuot ini. Pagbugtaw niya kada aga, nagapangamuyo sia nga buligan sia nga mangin positibo bisan pa sa mga kabudlayan niya kada adlaw. Nagapangamuyo man sia nga buligan sia nga mangin matutom kag para indi niya mapabay-an ang iya relasyon kay Jehova kag padayon nga pamensaron ang iya Pulong. Nagsiling pa sia: “Mas naglawig kag nangin hanuot pa gid ang akon pangamuyo kon gab-i. Ginatinguhaan ko nga sambiton ang ngalan sang tanan nga brother nga madumduman ko. Ginapangamuyo ko man ang mga staff sa detention center, ang akon kaupod sa prisuhan, ang mga imbestigador, ang akon pamilya, ang kongregasyon, kag ang organisasyon.”

Si Aleksandr Vavilov nagsiling: “Nangin suod pa gid ako kay Jehova. Pareho sa isa ka manugbantay, pamatyag ko daw ginadapit ako ni Jehova kag ginatuytuyan. Nabatyagan ko man nga daw ginakugos niya ako paagi sa pagpaumpaw sa akon. Sa kada adlaw nga ginaatipan niya ako, mas nangin maathag sa akon nga wala niya ako ginapabay-an.”

Sang Septiembre 21, 2020, gin-akusahan man si Aleksandr Rakovskiy kag ginlakip ang iya kaso sa kaso nanday Brother Oreshkov kag Brother Vavilov. Ginkasuhan sila nga tatlo nga nagapakigbahin sa mga miting kag mga hilikuton sang mga Saksi ni Jehova. Ginadumilian sila subong nga magbiyahe sa iban nga lugar.

Si Aleksandr Rakovskiy nagsiling nga ang nakabulig sa iya nga makabatas amo ang pagpamalandong sa mga tagna sa Biblia, ilabi na ang tagna parte sa hari sang aminhan. Nagsiling sia: “Nakabulig ini sa akon nga indi gawa pagpamensaron ang mga negatibo nga panghunahuna. Nakabulig man ini sa akon nga pamensaron ang iban pa nga mga tagna parte sa paghingabot kag kon paano ini nagakatuman. Nagpromisa si Jehova nga buligan niya kita kon hingabuton kita kag amo ini pirme ang ginapamensar ko.”

Nagasalig kita nga padayon nga mangin malipayon ang aton tatlo ka brother kay sigurado nga ang ila mabakod nga pagtuo makabulig gid sa ila nga mabatas ini nga kabudlayan.—Filipos 1:29.