NOBIEMBRE 17, 2020
RUSSIA
Gin-deny sang Korte sa Russia ang Pag-apelar sang Tatlo ka Saksi
UPDATE | Ginpamatbatan sang Korte sa Russia nga Wala sing Sala ang Tatlo ka Saksi
Sang Enero 18, 2022, ginpaboran sang Kamchatka Territory Court ang ikaduha nga pag-apelar ni Brother Konstantin Bazhenov, sang iya asawa nga si Snezhana, kag ni Sister Vera Zolotova. Ginhilway sila sa tanan nga panumbungon kag ginpadapat ini dayon. Sila nga tatlo may kinamatarong na karon nga magpangayo sing danyos para sa nauna nga mga desisyon sang korte kay indi gid ini makatarunganon. Wala pa mahibaluan kon bala iapelar sang piskal ang desisyon.
Sang Nobiembre 17, 2020, gin-deny sang Kamchatka Territory Court ang pag-apelar sa kaso ni Brother Konstantin Bazhenov kag sang iya asawa nga si Snezhana, kag ni Sister Vera Zolotova. Sugdan na ang orihinal nga sentensia sa ila nga mapriso sing duha ka tuig. Pero indi pa sila pagprisuhon subong. Sila nga tatlo malig-on gihapon kag malipayon.
Sang katapusan sang nauna nga hearing sang Septiembre 25, 2020, may kaisog nga ginsilingan ni Brother Bazhenov ang judge nga wala sia nahadlok nga pamatbatan nga guilty. Nagsiling man sia nga pribilehiyo niya nga mangin bahin sang katumanan sang Juan 15:20, diin gintagna ni Jesus nga pagahingabuton ang iya mga disipulo.
Ginpahanumdom man ni Brother Bazhenov ang korte nga sa Mateo 28:19, 20, ginsugo ni Jesus ang iya mga disipulo nga magbantala. Dayon, nagpamangkot si Brother Bazhenov: “Sin-o ang may kinamatarong nga dumilian ang sugo sang Cristo?” Pagkatapos nagsiling sia: “Indi ko mahimo nga maghipos lang. . . . Padayon ko nga isugid ang maayong balita halin sa Biblia.”