Gin-torture sang mga pulis sa Chita, Russia, si Brother Vadim Kutsenko, nga isa sa mga Saksi ni Jehova, sang gab-i sang Pebrero 10, 2020. Sulitsulit nga ginkastigo kag ginkuga sang mga pulis si Brother Kutsenko kag ginkuryente sa iya tiyan kag tiil. Ginahimo nila ini samtang ginapuersa nila si Brother Kutsenko nga maghatag sang impormasyon parte sa mga kauturan.

Sina nga aga, ginhalughog sang mga Federal Security Services (FSB) agent ang halos 40 ka balay sang mga Saksi sa Chita, lakip ang balay ni Brother Kutsenko. Sang 11:00 sang gab-i, gin-aresto sang mga pulis si Brother Kutsenko sa balay sang iya ugangan. Ginpusasan sia sang mga pulis, gintabunan ang iya ulo, kag gindala sia sa malapit nga kagulangan para i-torture. Bisan pa gin-torture si Brother Kutsenko, wala sia naghatag sang impormasyon parte sa iban nga mga Saksi. Sang narealisar sang mga pulis nga wala sila sing makuha sa iya, gindala nila sia sa ila opisina para usisaon liwat.

Ginbutang nila si Brother Kutsenko sa temporaryo nga prisuhan upod ang tatlo pa ka mga brother nga gin-aresto man pagkatapos ginhalughog ang ila mga balay sa Chita—sanday Sergey Kirilyuk, Pavel Mamalimov, kag Vladimir Yermolayev.

Pagligad sang duha ka adlaw, ang Ingodskiy District Court nagdesisyon nga prisuhon sing 72 ka oras sanday Brother Kutsenko, Brother Kirilyuk, kag Brother Mamalimov. Ang korte nagdesisyon nga indi pagprisuhon si Brother Yermolayev kundi i-house arrest na lang.

Sang Pebrero 15, ginbuy-an sanday Brother Vadim Kutsenko kag ang duha ka brother bangod wala sing bastante nga ebidensia batok sa ila ang imbestigador. Ginbuy-an sila sang imbestigador nga wala nabista kag wala man sing bisan ano nga pagdumili nga ginpatuman sa ila.

Ginapangamuyo naton nga si Brother Kutsenko kag ang iban pa naton nga kauturan sa Russia padayon nga ‘magpakaisog kag magpakabakod,’ kag magsalig gid nga ginasuportahan sila ni Jehova sa tanan nga pagtilaw nga ila ginaatubang.—Josue 1:7, 9.