Sa indi madugay, ipahibalo sang Leninskiy District Court of Rostov-on-Don ang desisyon sini sa kaso ni Sister Lyudmila Ponomarenko. a

Lyudmila Ponomarenko

• Natawo: 1950 (Ola, Magadan Region)

• Biograpiya: Antes sia nagretiro, nag-obra sia bilang elektrisyan sa isa ka pabrika. May duha sia ka bata nga babayi kag duha ka apo. Mahilig sia magbasa kag maggansilyo. Ginaatipan niya ang iya bana nga may malubha nga balatian

• Sang nakilala niya ang personal nga ngalan sang Manunuga, nalipay gid sia. Nanamian man sia sang nabal-an niya ang parte sa katuyuan sang Dios para sa duta kag sa mga tawo. Ginbawtismuhan sia bilang isa sa mga Saksi ni Jehova sang 1998

Sang Hunyo 6, 2019, ginpasakaan sing kaso kriminal si Sister Lyudmila Ponomarenko. Ang isa sa mga krimen nga iya kuno nahimo amo ang pag-aman sing lugar para sa relihioso nga miting sang isa ka “extremist” nga organisasyon kag pagsugid sang mensahe sang Biblia sa iban.

Ginapaabot na ni Lyudmila nga hingabuton man sia pareho sa naeksperiensiahan sang iya mga kauturan sa Russia. Nagsiling sia: “Sang ginhingabot nila ang mga kauturan sa Moscow kag pati man ang mga kauturan sa siudad sang Taganrog, kabalo gid ko nga indi na magdugay kag hingabuton man kami tanan.”

May mga protocol nga ginapatuman bangod sa COVID-19, gani wala sing kauturan nga makatambong sa mga hearing para magsuporta kag magpabakod kay Lyudmila. Parte sa sini, sia nagsiling: “Ginakulbaan ako kag grabe gid ang akon kabalaka nga ako lang isa sa mga hearing, gani samtang nagapakadto sa korte, ginakanta ko sing mahinay ang mga Kingdom song kag nagapangamuyo ako kay Jehova. Mabatyagan ko gid nga nagabakod ako. Nagakadula ang akon kabalaka kon nagaatubang na ako sa korte, kag pamatyag ko kadasig lang sang oras.”

Ginsugid man ni Lyudmila ang nangin epekto sini sa iya bana kag duha ka bata nga babayi nga indi mga Saksi ni Jehova. “Indi [nila] maintiendihan kon ngaa ginakasuhan ako. Nagalalain gid sila kay nakita nila nga mas nagluya ang akon panglawas bangod sa sini nga kaso,” siling niya. “Pero sang ulihi, nakita sang akon mga kapamilya nga wala gid sing basihan [ang ginapanghimo sa akon] kag [ang ila pagsuporta] nakabulig gid para padayon ako nga makabatas.”

Wala gid nagluya ang iya pagtuo bisan pa ginahingabot sia. Nagsiling sia: “Nalipay gid ako kay bal-an ko nga indi ako dapat mahadlok sa nagakatabo sa akon subong. Indi man ako dapat mahadlok sa matabo sa palaabuton suno sa gintagna sang Biblia. Subong, ang akon mga pangamuyo kay Jehova mas naglawig pa gid, mahambal ko na sa iya ang tanantanan, kag mas nagbakod pa gid ang akon relasyon sa iya.”

Kabalo kita nga si Sister Ponomarenko padayon nga buligan ni Jehova paagi sa Iya balaan nga espiritu kag mabaton man niya ang pagpakamaayo “sa idalom sang landong sang Labing Gamhanan.”—Salmo 91:1.