Sang Pebrero 6, 2020, sa prisuhan sang Penal Colony No. 1 sa Orenburg, Russia, ginkastigo sang mga guardia paagi sa ila mga batuta ang aton lima ka brother nga sanday Aleksey Budenchuk, Gennadiy German, Roman Gridasov, Feliks Makhammadiyev, kag Aleksey Miretskiy. Gindala sa ospital si Brother Makhammadiyev bangod nabali ang iya gusok, kag nasamaran ang iya baga kag kidney. Pagkatapos kastiguhon sanday Brother Budenchuk, Brother German, Brother Gridasov, kag Brother Miretskiy, ginbartolina sila bangod sa indi makatarunganon kag sayop nga panumbungon. Isa sa akusasyon sa ila amo ang pagpanigarilyo. Indi ini mapatihan bangod wala nagapanigarilyo ang mga Saksi ni Jehova.

Subong sang nareport na, sang Septiembre 19, 2019, ginsentensiahan ni Judge Dmitry Larin sang Leninsky District Court sang Saratov nga guilty ang lima ka brother, upod ang isa pa ka brother nga si Konstantin Bazhenov. Sarisari ang sentensia sa ila halin sa duha asta tatlo ka tuig kag tunga. Sang Disiembre 20, 2019, ginbasura sang Saratov Regional Court ang ila pag-apelar. Pagligad sang pila ka semana, ining anom ka brother gindala na sa prisuhan. Si Brother Bazhenov gindala sa Penal Colony No. 3 sa Ulyanovsk Region, gani wala sia nadala sa mga gin-torture sa Penal Colony No. 1.

Pag-abot gid sang mga brother sa Penal Colony No. 1 sang Pebrero 6, 2020, ginkastigo sila dayon. Ginpatan-aw lang sila sa doktor pagkaaga kay si Brother Makhammadiyev todo na ang hilanat, kag may dugo na sa iya ihi. Sang ulihi, nagtawag gid man sang ambulansia ang warden pagkatapos nila ginpuersa si Brother Makhammadiyev nga magpirma sang dokumento nga nagasiling nga “nadanlog sia sa banyo kag natumba.” Naospital si Brother Makhammadiyev kag gin-operahan. Ginbutangan sang tubo ang iya baga para suyupon ang nagtipon nga tubig. Nakita man sa iya mga test nga si Brother Makhammadiyev nagutman kay ginkumpiskar sang prisuhan ang pagkaon nga kinahanglan niya bangod sang iya balatian nga celiac disease.

Nagakabalaka gid kita para sa aton mga brother sa Russia nga nagabatas sang indi makatarunganon kag mapintas nga pagtrato sa ila. Pero nagasalig kita nga padayon sila nga buligan ni Jehova samtang matutom sila nga nagabatas.—Filipos 1:27, 28.