Sang Marso 12, 2020, ginkondenar sang sobra 30 ka pungsod sa Europe ang paghingabot kag pag-torture sa aton mga utod sa Russia. Natabo ini sa isa ka miting nga gin-organisar sang Permanent Council sang Organization for Security and Co-operation in Europe (OSCE). Tulumuron sang OSCE nga proteksionan ang mga kinamatarong sang tawo.

Sa isa ka pahayag nga ginbasa sa Permanent Council sang OSCE, ang 27 ka pungsod nga miembro sang European Union (EU) kag 6 ka pungsod nga indi miembro sini, nagsiling: “Ang European Union nagakabalaka gid sa sitwasyon sang mga Saksi ni Jehova sa Russia nga padayon nga ginahingabot sang mga awtoridad. Gina-raid ang ila mga balay, ginapriso bisan wala sing ginpasaka nga kaso, ginaimbestigahan bilang mga kriminal, kag ginasentensiahan nga mapriso sing asta pito ka tuig. Dugang pa, nagakabalaka gid kami sa mga report sining karon lang parte sa pag-torture kag iban pa nga pagmaltrato sa pila ka miembro sang mga Saksi ni Jehova, nga ginhimo sang mga guardia ukon sang mga pulis, samtang ara sila sa prisuhan ukon antes sila gindala sa prisuhan.”

Sa iya speech sa Permanent Council, ang Ambassador sang United Kingdom sa OSCE nga si Neil Bush, nagsiling: “Sang Hulyo 2017, ang Supreme Court sang Russia nag-ugyon sa isa ka desisyon sang korte nga ang mga Saksi ni Jehova ‘mga extremist.’ Bangod sini, ang mahidaiton nga pagsimba sang 175,000 ka citizen sang Russia nangin krimen. Wala man sini ginrespeto ang kinamatarong sa kahilwayan sang relihion nga ginagarantiyahan sang Konstitusyon sang Russia kag sang madamo nga desisyon sang OSCE.” Si Bush nagsiling pa gid nga sugod sang nagdesisyon ang Supreme Court sang Russia, “nasaksihan namon nga nagadamo ang ginapriso, ginaimbestigahan bilang mga kriminal, kag ang ginahingabot nga mga Saksi ni Jehova sa bilog nga Russia. Pareho sa OSCE, nagakabalaka gid kami sa mga report parte sa pag-torture kag pagmaltrato sa mga Saksi ni Jehova.”

Ang isa sa mga insidente nga ginsambit sang mga opisyal sa Europe amo ang pagkastigo sa lima ka Saksi sang Pebrero 6, 2020. Sa Penal Colony No. 1 sa Russia, ginkastigo sang mga guardia sanday Brother Aleksey Budenchuk, Brother Gennadiy German, Brother Roman Gridasov, Brother Feliks Makhammadiyev, kag Brother Aleksey Miretskiy. “Tanan sila nahalitan gid kag may isa [si Feliks Makhammadiyev] nga gindala sa ospital,” suno sa report sang EU Delegation. “Dugang pa, sang Pebrero 10, 2020, ginreport nga si Vadim Kutsenko gin-torture antes sia ginpriso. Sulitsulit sia nga ginkastigo, ginkuga, kag ginkuryente sang mga pulis samtang ginapuersa nila sia nga maghatag sang impormasyon parte sa iban nga mga Saksi ni Jehova.”

Ang EU Delegation nagsiling nga ang “pag-torture kag ang iban pa nga pagmaltrato nalakip sa pinakamakangilil-ad nga paglapas sa kinamatarong sang tawo, integridad sang tawo, kag dignidad sang tawo. Ang pag-torture nagalapas sang kasuguan sa bilog nga kalibutan parte sa kinamatarong sang tawo, partikular na ang International Covenant on Civil and Political Rights, ang European Convention on Human Rights, kag ang UN Convention against Torture and Other Cruel, Inhuman or Degrading Treatment or Punishment. Kag nagsugot ang Russian Federation nga tumanon ini tanan nga kasuguan.”

Dugang pa, suno sa mga lider sa Europe, ang tanan nga ginpanghimo batok sa mga Saksi ni Jehova sa Russia nagalapas sa mga promisa sang Russian Federation sa Permanent Council nga ang aton mga kauturan hilway sa paghimo sang mga hilikuton sang ila relihion sa ila pungsod.

“Sang Abril 20, 2017, gin-ban sang Supreme Court sang Russian Federation ang Administrative Center sang mga Saksi ni Jehova kag ang tanan nga lokal nga korporasyon sini bangod gin-akusar sila nga nagahimo sang ‘extremist nga mga hilikuton.’ Pagkatapos sini, indi lang makaisa nga nabatian namon nga nagsiling ang Russian Delegation sa [mga sesyon sang] Permanent Council nga ang mga Saksi ni Jehova hilway nga makahimo, kag padayon nga makahimo, sang mga hilikuton sang ila relihion kag ginagarantiyahan ang ila kahilwayan sa relihion ukon pagpati. Pero, padayon kami nga makabaton sang madamo nga report parte sa mga Saksi ni Jehova nga gina-raid ang ila mga balay, ginapriso bisan wala sing ginpasaka nga kaso, kag ginaimbestigahan bilang mga kriminal,” siling sang EU Delegation.

Ang mga lider sang EU nagsiling nga “sugod sang gin-ban ang tanan nga lokal nga relihioso nga organisasyon sang mga Saksi ni Jehova sa Russia, ginreport nga 869 ka balay na ang ginhalughog, 26 ang ginpriso bisan wala pa mabista, 23 ang gin-house arrest, 316 ang ginpasakaan sang kaso, kag 29 ang ginpamatbatan nga guilty.”

“Base sa sini nga mga halimbawa, maathag nga kon ginahimo sang mga Saksi ni Jehova ang bisan ano nga hilikuton sang ila relihion, mahimo halughugon ang ila balay, prisuhon sila bisan wala pa mabista, kasuhan bilang kriminal, kag padayon nga prisuhon pagkatapos mapamatbatan. Base sa kadamuon kag sa paagi sang pagpang-raid sa mga balay, lakip ang madamo nga pagpang-raid sa isa ka siudad sa isa lang ka adlaw, mahimo masiling nga isa ini ka organisado nga kampanya para hingabuton ang mga Saksi ni Jehova,” siling ni Ambassador Bush.

Ginkondenar man sang mga eksperto sa kahilwayan sa relihion ang pagtrato sa aton mga utod sa Russia. Sa iya komento parte sa pahayag sang EU Delegation, ang isa ka abogado, pulitiko, kag Roman Catholic theologian nga si Dr. Gudrun Kugler, nagsiling: “Nangin malain na gid ang sitwasyon sugod sang gin-ban ang mga Saksi ni Jehova sa Russia sang Abril 2017. . . . Ang tanan nga pamatbat nga guilty sa mga kaso sang mga Saksi ni Jehova ginbase sa anti-extremism law, nga para sa mga human rights organization, ‘indi klaro kag tuman kasangkad’ nga kasuguan. Basta makilala ang isa nga miembro sang mga Saksi ni Jehova kag bisan pribado nga ginahimo niya ang mga hilikuton sang iya relihion, puede na sia sentensiahan nga mapriso base sa Article 282.2. . . . Dapat untatan na ang mapintas nga paghingabot sa mga Saksi ni Jehova kag sa iban pa nga relihion sa Russia nga diutay ang miembro!”

Ang Russia kag ang tanan nga pungsod nga miembro sang OSCE “may obligasyon nga himuon ang tanan nga nagakadapat para pauntaton ang pagpang-torture, kasuhan ang mga nagahimo sini, pangitaon ang mga biktima, kag siguraduhon nga mabayaran ang mga biktima sang nagakaigo nga danyos,” siling sang EU Delegation. “Gani nagapanawagan kami sa Russian Federation nga maghimo gilayon sing epektibo kag maid-id nga imbestigasyon sa sining tanan nga report sang pag-torture para siguraduhon nga masilutan ang tanan nga responsable ukon may labot sa sini. . . . Nagapanawagan kami sa mga awtoridad nga ibasura ang tanan nga kaso batok sa mga indibiduwal nga indi makatarunganon nga ginkasuhan ukon ginpriso bangod sa paggamit sang ila kinamatarong nga maghimo sang mga hilikuton sang ila relihion. Nagapanawagan kami sa Russian Federation nga tumanon sini ang iya promisa sa atubangan sang iban nga pungsod nga respetuhon ang mga kahilwayan sa pagpahayag, pagpakig-upod, mahidaiton nga pagtinipon, relihion ukon pagpati, lakip ang mga kinamatarong sang pila lang ka tawo nga bahin sang gamay nga mga grupo, kag siguraduhon nga hatagan sila sang patas nga kahigayunan nga depensahan ang ila kaugalingon sa korte.”

Pamatian man ukon indi sang Russia ang pagkondenar sang iban nga pungsod paagi sa pagrespeto sa kahilwayan sang relihion, bal-an naton nga buligan gid ni Jehova ang aton mga kauturan sa Russia nga mangin mapinasensiahon kag padayon nga magbatas nga may kaisog asta nga mahatagan sila sing matuod nga hustisya.—Salmo 10:18.