Sang Abril 6, 2021, nagdesisyon ang Abinskiy District Court of the Krasnodar Territory nga guilty si Brother Aleksandr Shcherbina kag ginsentensiahan sia nga mapriso sing tatlo ka tuig. Halin sa korte, gindiretso na sia sa prisuhan. Magaapelar si Aleksandr sa desisyon sa iya kaso.

Aleksandr Shcherbina

• Natawo: 1976 (Kholmskaya, Krasnodar Territory)

• Biograpiya: Patay na ang iya mga ginikanan. Nagatrabaho sia bilang drayber sang trak. Isa man sia ka mekaniko kag isa ka finish carpenter

• Sang bata pa sia, nanamian na sia mag-basketball kag mag-soccer. Sang mga beintehon sia, nagtuon sia sing Biblia upod sa mga Saksi ni Jehova. Sa tapos niya matun-an ang katumanan sang mga tagna, nangin kumbinsido sia nga matuod gid ang ginasiling sang Biblia. Nabawtismuhan sia sang 1999

Duha na ka bes nga gin-raid sang mga awtoridad sa Krasnodar Territory ang balay ni Brother Aleksandr Shcherbina. Natabo ini sang Abril kag Disiembre 2020. Sa sini nga pagpang-raid, gin-interogar si Aleksandr kag ginkompiskar ang iya mga Biblia kag mga gadyet.

Nagsugod ang pag-hearing sa kaso ni Aleksandr sang Marso 17, 2021, sa Abinskiy District Court. Pareho sa iban nga mga kaso sang aton mga kauturan nga gin-uyatan sina nga korte, madasig man nga natapos ang pag-hearing sa kaso ni Aleksandr.

Maisog nga nagsiling si Aleksandr sa korte: “Ang matuod, gin-akusar ako bangod sa akon pagpati sa Dios kag bangod isa ako sa mga Saksi ni Jehova. Buot silingon, gin-akusar ako bangod ginhimo ko ang akon kinamatarong base sa Article 28 sang Constitution of the Russian Federation. Ang akon mga pagpati nabase sa Biblia, gani indi gid ini matawag nga extremism.”

Nagapasalamat gid kita kay Jehova para sa aton mga kauturan sa Russia nga padayon nga nangin halimbawa sang kaisog kag pagtuo. Kag kabalo kita nga pakamaayuhon gid sila ni Jehova bangod sang ila pagbatas para mahimo “ang kabubut-on sang Dios.”—Hebreo 10:36.