ABRIL 8, 2024
RUSSIA

Nabatyagan Nila ang Pag-atipan ni Jehova Samtang Ara sa Pretrial Detention

I-PLAY

Sa indi madugay, ipahibalo sang Novocherkassk City Court sa Rostov Region ang desisyon sini sa kaso nanday Sister Lyubov Galitsyna, Brother Garegin Khachaturyan kag Brother Gevorg Yeritsyan. Wala pa sang ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Ila

Lyubov Galitsyna

Natawo: 1959 (Plastunovskaya, Krasnodar Territory)

Biograpiya: Nag-obra sia bilang mechanical engineer sa isa ka manufacturing facility antes sia mag-retire

Nangin interesado sia sa pagtuon sa Biblia sang nabal-an niya ang paglaum nga kabuhi nga wala na sing balatian kag kamatayon. Nabawtismuhan sia bilang isa ka Saksi ni Jehova sang 1995

Nabalo sia sang 2015

Ang Iya Ginsiling

Paano mo nabatyagan ang bulig ni Jehova sang ara ka sa pretrial detention center sing isa ka tuig kag apat ka bulan?

Mabudlay gid sang ara ako sa prisuhan kay upod ko ang mga naga-drugs, mga kawatan, kag iban pa nga mga kriminal. Makapa-stress gid ini nga sitwasyon. Nagapangamuyo ako kay Jehova, kon kaisa sa bilog nga gab-i, kag ginapangabay ko sia nga buligan niya ako nga mabal-an kon ano ang himuon ko sa sini nga sitwasyon. Sobra 25 ka sarisari nga tawo ang nakaupod ko sa akon selda. Sa bulig ni Jehova, nangin maayo ang akon relasyon sa ila tanan. Paagi sa sini man nga sitwasyon, ginbuligan ako ni Jehova nga mabal-an kon ano nga kinaiya ang dapat ko pauswagon. Nagapasalamat ako sa sini nga kahigayunan nga nangin mas maayo ako nga Cristiano.

Garegin Khachaturyan

Natawo: 1967 (Azerbaijan)

Biograpiya: Nag-obra sia bilang panday. Nagsaylo sia sa Russia sang 1995 pagkatapos sia mag-istar sa Poland kag Germany

Nagdayaw sia sa pagkasibu sang Biblia kag sa benepisyo sa pagsunod sa mga prinsipio sini. Nabawtismuhan sia sang 1994

Napangasawa niya si Kseniya sang 2008. May isa sila ka bata nga lalaki

Ang Ginsiling sang Iya Asawa nga si Kseniya a

Ano ang nakabulig sa imo kag sa imo bana nga makabatas?

Amo sini ang ginsulat ni Garegin: “Nagapasalamat gid ako sa bulig ni Jehova. Ang mga sulat nga nabaton ko halin sa mga abyan sa kongregasyon nagpalig-on gid sa akon sa espirituwal. Nabal-an ko man nga ginaatipan ka nila, gani nabuligan ako sini nga mangin kalmado. Mas nangin suod pa gid ako kay Jehova subong.” Nagaugyon ako kay Garegin. Mas nangin suod pa gid kami kay Jehova, kag mas nakita namon kon paano niya kami ginabuligan kada adlaw.

Nagasalig kita nga bisan pa ginahalitan kita sang mga nagahingabot sa aton, si Jehova padayon gid nga magapakamaayo sa matutom niya nga mga alagad kag may himuon gid sia para “mangin maayo ang resulta sini.”—Genesis 50:20.

Time Line

Agosto 11, 2022

Ginsugdan ang kaso kanday Lyubov, Garegin, kag Gevorg. Gin-raid ang ila mga balay. Ginbutang sa temporary detention center si Garegin kag Gevorg
Agosto 12, 2022

Ginsaylo si Garegin kag Gevorg sa pretrial detention center
Agosto 16, 2022

Ginbutang si Lyubov sa isa ka temporary detention center
Agosto 17, 2022

Ginsaylo si Lyubov sa pretrial detention center
Septiembre 20, 2023

Ginsugdan ang hearing
Disiembre 25, 2023

Ginpagua si Lyubov sa pretrial detention pero gin-house arrest gihapon

a b Samtang ginahanda ini nga artikulo, si Brother Khachaturyan kag Brother Yeritsyan ara sa pretrial detention. Wala sila mainterbyu.

Tan-awa Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE