Sang Hulyo 13, 2021, nagdesisyon ang Voroshilovskiy District Court of Rostov-on-Don nga guilty si Sister Olga Ganusha kag ginsentensiahan sia sing duha ka tuig nga suspended sentence.

Olga Ganusha

• Natawo: 1961 (Rostov-on-Don, Rostov Region)

• Biograpiya: May isa sia ka bata nga lalaki kag nagasolo sia nga iloy. Retirado na sia subong. Nanamian sia maghimo sing mga handicraft, magpamati sa classical music, kag magbasa sing mga libro

• Sang natun-an niya ang promisa sang Biblia parte sa paglaum nga paraiso sa duta kag pagkabanhaw sang miembro sang pamilya kag mga abyan nga napatay na, nagtuon sia sing Biblia. Nabawtismuhan sia bilang isa sa mga Saksi ni Jehova sang 1995

Sang una nga mga binulan sang 2019, sekreto nga ginbutangan sang mga awtoridad sa Russia sing kamera ang apartment ni Sister Olga Ganusha. Bangod sini kuno nga ebidensia, gin-raid nila ang iya apartment sang Hunyo 2019. Ginpangtan-aw sang mga nag-raid ang iya mga notebook, mga sulat, kag mga booklet. Sang Agosto 17, 2020, pormal nga ginpasakaan sing kaso si Olga, kag nagsugod ang pag-hearing sa iya kaso sang Marso 4, 2021. Nalakip sa “krimen” nga iya ginhimo, amo ang pag-organisar kag pagpakigbahin sa miting sang iya relihion kag pagsugid sa iban sang iya pagtuo. Sa umpisa, nalakip sa sini nga kaso si Sister Lyudmila Ponomarenko kag si Sister Galina Parkova. Pero, ginpasakaan na sila sing lain nga kaso.

Sa sulod sang halos duha ka tuig nga imbestigasyon kag pag-hearing sa iya kaso, nakabulig gid kay Olga ang pagpangamuyo sing hanuot kag pagsugid kay Jehova sang tanan niya nga ginabatyag. Si Olga nagsiling: “Ginapangamuyo ko kada adlaw nga mapakabalaan ko ang ngalan sang Dios. Ginapangamuyo ko man nga kabay ang mga kauturan nga ara sa mga detention center, mga prisuhan, kag mga naka-house arrest makapanaksi kag mangin maisog. Dugang pa, ginapangamuyo ko nga mangin mabakod ang ila pagtuo kay Jehova kay sigurado nga indi gid niya kami pagpabay-an sa sining mabudlay nga sitwasyon.” Kon parte naman sa iya sitwasyon, amo ini ang iya ginsiling: “Nangabay ako kay Jehova nga dulaon niya ang akon kahadlok, nga buligan niya ako nga magsalig sa iya, kag himuon niya ako nga isa ka haligi nga salsalon kag pader nga saway, pareho sa ginhimo niya kay Jeremias. Ginatinguhaan ko nga mabatas ining pagtilaw nga daw kalayo, pareho sa tatlo ka Hebreo. Kag nagapangabay ako nga makapakita ako pirme sing dignidad, pareho sa ginhimo sang Cristo sa atubangan sang iya mga kaaway.”

Nagasalig kita nga padayon nga buligan ni Jehova si Olga kag ang iban pa nga ginahingabot bangod sa ila pagtuo paagi sa iya “tuo nga kamot sang pagkamatarong.”—Isaias 41:10.