Sang Mayo 25, 2022, safe nga nag-abot sa Denmark si Dennis Christensen. Isa ka adlaw antes sina, ginpagua sia sa isa ka prisuhan sa Russia kag gin-deport dayon. Napriso sia sing lima ka tuig sa sarisari nga mga prisuhan.

“Nalipay gid ako nga nakagua na ako sa prisuhan kag makaupod ko na ang akon pinalangga nga asawa nga si Irina,” siling ni Dennis. “Ang pagsuporta kag pagpalig-on sang mga kauturan sa bilog nga kalibutan isa ka regalo halin kay Jehova. Padayon ako nga nagapangamuyo para sa akon maisog nga mga kauturan nga ginahingabot kag ginapriso bangod sa ila pagtuo.”

Ginapalig-on sang mga abyan kag mga pamilya paagi sa Biblia sanday Dennis kag Irina kag ginahatagan man sila sang ila materyal nga kinahanglanon. Sila nagsiling, “Eksayted na gid kami nga masimba si Jehova sing hilway kaupod sa amon mga kauturan sa Denmark.”

Si Dennis gin-aresto kag gin-detain sang Mayo 25, 2017, sang gin-raid sang armado kag may tabon sa guya nga mga awtoridad sang Russia ang isa ka miting sang kongregasyon sa Oryol nga iya gintambungan. Sang ulihi, ginsentensiahan sia nga guilty sang pag-organisar sang hilikuton sang isa ka relihioso nga organisasyon nga gindeklarar nga extremist kag gin-ban sang Supreme Court sang Russia sang nagligad lang nga bulan.

Pila ka beses nga nagsiling ang mga awtoridad sang Russia nga ang gin-ban sang 2017 amo lang ang legal nga mga korporasyon sang mga Saksi ni Jehova, kag suno sa ila wala ini sing epekto sa kinamatarong sa pagsimba sang indibiduwal nga mga Saksi. Pero, ang pag-detain kay Dennis amo ang umpisa sang wala untat nga pagpang-aresto kag pagpriso sa madamo nga Saksi ni Jehova sa bilog nga Russia kag Crimea.

Asta sa sini nga report, 91 ka kauturan ang ara gihapon sa prisuhan. Nagapangamuyo kita nga padayon nga suportahan ni Jehova ining mga matutom kag ‘padunggan sila.’—Salmo 4:3.