Madumduman pa ni Brother Puyda ang makalilipay nga panahon sang gamay pa sia. Kada magpauli ang ila tatay kon gab-i, ginabasahan niya sia kag ang iya pito ka utod sang Ang Akon Libro sang mga Sugilanon sa Biblia. Madumduman man niya nga nagabantala sia upod sa iya tatay nga si Grigoriy sa ila gamay nga village nga Kvitok, kag pirme niya ginakadtuan ang mga balay sang iya mga manunudlo kag mga klasmeyt. Sang nagtin-edyer sia, nagbantala si Brother Puyda sa isa ka teritoryo nga wala pa mabantalaan upod sa iya lolo sa nanay nga si Brother Pyotr Partsey. Sini nga mga tion nakita niya ang katutom kag kapisan sang iya lolo sa ministeryo.

Pirme gid makita ni Brother Puyda ang iya tatay kag lolo nga nagabasa sing Biblia kag sing base sa Biblia nga mga publikasyon. Gani nangin tulumuron niya nga sundon ang ila mga halimbawa.

Pero wala gid nagdahom si Brother Puyda, nga 41 anyos na subong, nga maagyan man niya ang ila naeksperiensiahan—maaresto kag mapriso bangod sa pag-alagad kay Jehova. Sang Mayo 30, 2018, gin-aresto si Brother Puyda sang mga agent sang Federal Security Service (FSB). Apat ka bulan sia nga ginpriso. Paggua niya, anom ka bulan pa gid sia nga gin-house arrest. Ang iya lolo nga si Brother Partsey, gin-aresto kag ginpriso sang panahon nga mga Nazi kag Soviet ang nagagahom. Dayon, ang iya tatay nga si Brother Grigoriy Puyda ginpriso man sang Soviet Union.

Si Brother Puyda nagsiling: “Si apostol Pablo nagsulat sa 2 Timoteo 3:14 nga ‘magpadayon ka sa mga butang nga imo natun-an kag nabuyok ka nga patihan, nga nakahibalo kon kay sin-o mo natun-an ini.’ May kabakod ako kay kilala ko kon sin-o ang nagtudlo sa akon sang kamatuoran. Indi ini makuha sang bisan ano nga gobierno ukon prisuhan, kag bisan ang paghingabot may katapusan. Subong, ginatuman ko ang ila gintudlo sa akon, kag ginasunod ko ang ila halimbawa. Kon magpabilin ako nga matutom, kabalo ako nga may padya ako nga mabaton.” Ginahulat ni Brother Puyda ang desisyon sang korte sa iya kaso.

Siling niya, kon mag-istorya ang iya tatay kag lolo parte sa nagakatabo sa prisuhan, wala nila ginaistorya kon daw ano kabudlay sang sitwasyon. Ang ginaistorya nila amo ang ila mga eksperiensia sa pagbantala sang maayong balita didto.

Si Grigoriy, nga 64 anyos na subong, nabawtismuhan sang 1975 pagkatapos sia mapriso sing isa ka tuig sa labor camp sang Soviet bangod nagpangindi sia nga magsoldado. Ginpagua sia sang 1977. Sang 1986, ginpriso sia liwat sing isa ka tuig bangod sa pagpanag-iya sang ginadumilian nga literatura. Ang iya tatay nga si Ivan man ang ngalan, napriso man sa labor camp halin sang 1944 asta 1950 bangod sa iya Cristianong neutralidad.

Si Grigoriy nagsiling: “Ang akon mabakod nga pagtuo nakabulig gid sa akon nga mabatas ang paghingabot. Wala gid ako sing bisan gamay lang nga pagpangduhaduha nga ginakabuhi ko ang kamatuoran kag nga si Jehova ang matuod nga Dios.”

Subong, amo man ini ang ginaatubang sang iya bata nga si Ivan. “Nadumduman ko ang paggahom sang Soviet, kag maathag nga nasulit naman liwat ang mga hitabo,” siling ni Grigoriy. “Gani, ginapangamuyo ko nga magpadayon nga matutom si Ivan kag mapakabalaan ang ngalan ni Jehova paagi sa iya pagbatas.”

Sang 1943, ang lolo ni Ivan nga si Brother Partsey, nga napatay na, ginpriso sa kampo sang Majdanek kag sang ulihi ginpriso pa gid sang mga Nazi sa Ravensbrück bangod indi sia magpirma sang dokumento nga nagapanghiwala sang iya pagtuo. Ginhilway sia sang mga soldado sang Allied sang 1945. Gin-aresto sia liwat sang 1952 kag ginsentensiahan sing kamatayon. Pero ginbawi ang sentensia sa iya kag sang 1956 ginpagua sia. Ginpriso liwat si Brother Partsey sang 1958 bangod sa iya pagtuo kag ginpagua sang 1964.

“Ang katutom ni Lolo nagpabakod gid sa akon,” siling ni Ivan. “Kon mabanhaw na sia, sugiran ko sia nga pareho sa iya, naagyan ko man ang mga pagtilaw kag ang iya halimbawa nagpalig-on sa akon nga magpadayon nga matutom kag maisog.”

“Wala sing makakuha sang akon pagtuo kag gugma sa akon Dios nga si Jehova,” siling ni Ivan. “Sulitsulit ko nga ginasilingan ang mga imbestigador: ‘Ang mahimo lang ninyo amo nga arestuhon ako kag prisuhon, pero indi ninyo mabag-o ang akon balatyagon kag panghunahuna.’”

Ano ang nakabulig sa sining aton pinalangga nga mga kauturan sa ila pag-atubang sa mga pagtilaw?

Si Ivan nagsiling: “Sa Binuhatan 14:22 mabasa naton, ‘Dapat kita magsulod sa Ginharian sang Dios paagi sa madamo nga kabudlayan.’ Maagyan gid sang tanan nga Cristiano ang pagtilaw. Indi man buot silingon nga mapriso gid ang tanan. Pero mahimo nga magbalatian sila ukon mapatyan sang pinalangga. Kon insakto ang aton panimuot kag malapit kita kay Jehova, makabatas kita. Ara gid pirme si Jehova nga nagasuporta sa iya katawhan.”

Ang iya tatay nga si Grigoriy nagsiling: “Pabakura ang imo relasyon kay Jehova. Mangin matuod nga abyan niya. Importante gid nga kumbinsido ka nga ara sa aton ang kamatuoran, para handa kita nga himuon ang bisan ano nga sakripisyo sa pag-alagad kay Jehova. Pakamaayuhon gid niya ang imo mga panikasog.”

Makapalig-on gid ang pagbasa sang mga eksperiensia parte sa pagsuporta ni Jehova sa aton mga kauturan nga ginhingabot bangod sa ila pagtuo. Ginapangamuyo naton nga ang aton mga kauturan sa Russia magpabilin nga maisog kag mapabakod sang promisa ni Jehova: “Indi ka magkahadlok . . . Mangin daku gid ang imo padya.”—Genesis 15:1.