Sang Enero 31, 2022, ang Pozharskiy District Court of the Primorye Territory nagdesisyon nga guilty si Yuriy kag si Sergey. Ang kada isa sa ila ginsentensiahan sing anom ka tuig nga suspended prison.

Yuriy Belosludtsev

• Natawo: 1964 (Smidovich, Jewish Autonomous Region)

• Biograpiya: Nagdaku sia sa iya lola sa isa ka gamay nga baryo. Nag-obra sia bilang engineer sa isa ka power company. Nanamian sia mangisda kag mag-ski

  Napangasawa niya si Yelena sang 1985. Pareho sila nga nanamian gid sa mga promisa sang Dios nga dulaon ang kalautan kag pag-antos. Nagdayaw gid sila sa katumanan sang mga tagna sang Biblia. Bangod sini, nagtuon sila sa Biblia. Nabawtismuhan sia sang 1994

Sergey Sergeyev

• Natawo: 1955 (Dukhovnitskoye, Saratov Region)

• Biograpiya: Nag-obra sia sa isa ka coal mine asta nga nagretiro sia. Napangasawa niya si Nelly sang 1991. May duha sila ka bata nga babayi kag isa ka bata nga lalaki. Nanamian sila nga mag-asawa magsagod sang mga ido

  Nagtuon sila sa Biblia sang bag-o pa lang sila nakasal. Nagdayaw sila sa pagkasibu sang mga tagna sa Biblia kag sa praktikal nga mga laygay sini. Nabawtismuhan sia sang 1996

Sang Marso 17, 2019, gin-raid sang mga agent sang Federal Security Service (FSB) ang madamo nga balay sa Luchegorsk, Primorye Territory. Gin-interogar nila ang mga kauturan, ang iban naglawig sing pito ka oras. Dayon, gin-detain nila si Yuriy kag si Sergey.

Duha ka adlaw sang ulihi, ginpriso nila ining duha ka brother sa pretrial detention center kag nagtener sila didto sing sobra anom ka bulan. Sang ginpagua sila sang Septiembre 2019, gin-house arrest naman sila sing halos lima ka bulan.

Nagsiling sila nga ang pangamuyo nakabulig sa ila nga mabatas ang mga sitwasyon sa detention center. Si Sergey nagsiling nga nakabulig man sa iya ang Biblia para mangin positibo sia pirme. Sia nagsiling: “Nadumduman ko ang ginsiling ni Jesus: ‘Kon ginhingabot nila ako, hingabuton man nila kamo.’ (Juan 15:20) Sa pensar ko: ‘Baw! Ang natabo sa amon natabo man kay Jesucristo, sa iya mga disipulo, kag sa mga apostoles. Nagasalig gid si Jehova nga makapanaksi man ako diri.’ Ini nga panghunahuna kag ang mga sabat ni Jehova sa akon mga pangamuyo nagpabakod sa akon kag nakabulig ini sa akon nga mangin kalmado kag malipayon.”

Si Yuriy nagsiling nga nabudlayan sia sadto sa pagbasa sang Biblia kada adlaw. Ang isa niya ka Cristianong utod nagbulig sa iya para mag-uswag sia. Ining naandan niya nga rutina nakabulig sa iya sang ara sia sa detention center. Sia nagsiling: “Ginadumdom ko ang mga halimbawa sa Biblia kag sa aton mga publikasyon nga natun-an ko sadto. Nagpabakod ini sa akon kag nakabulig nga mangin malipayon ako pirme. Nakabulig man ini sa akon nga indi magkabalaka sing todo.”

Nagapangamuyo kita kag nagasalig nga si Jehova padayon nga mangin “dalangpan kag kusog” para sa aton mga kauturan sa Russia sa ‘tion sang ila kalisdanan.’—Salmo 46:1.