Aktibo na sa Rwanda ang mga Saksi ni Jehova sugod pa sang 1970. Narehistro sila sang 1992, kag ginkompirmar pa gid ini sang gobierno sang 2002. Kilala gid ang mga Saksi bangod neutral sila sa pulitika kag hilway nila nga ginahimo ang mga ginapatihan sang ila relihion. Wala sila nag-entra sa pagpamintas sang natabo ang genocide sang 1994 kag ginrisgo pa gani nila ang ila kabuhi para luwason ang iban. Pero subong, may iban nga nagapakalain sa mga Saksi bangod neutral sila sa pulitika.

Ginpahalin sa eskwelahan ang iban nga estudyante bangod wala sila mag-entra sa mga seremonya sa eskwelahan nga nagapadungog sa pungsod ukon may labot sa relihion. a Dugang pa, ginapatuman sang gobierno nga ang mga maestra ukon maestro mag-attend sa mga seminar nga may nalakip nga paghanas para sa militar kag pagkanta sang national anthem. Gani, ginatos ka maestra kag maestro nga mga Saksi ang nadulaan sang obra. Sang 2010, ginpatuman naman sang gobierno sang Rwanda nga ang tanan nga empleyado mag-entra sa seremonya nga nagapanumpa sa bandera sang pungsod. Gani, madamo nga mga Saksi ni Jehova nga nagaobra sa gobierno ang nadulaan sang trabaho.

Bisan pa sa sini nga mga kabudlayan, ginapasalamatan sang mga Saksi ni Jehova sa Rwanda ang ila kahilwayan sa pagsimba. Nagalaum sila nga sa pila ka adlaw, kilalahon sang mga opisyal sang Rwanda nga bisan pa neutral sila sa pulitika indi sila makatalagam sa gobierno.