Ara sa Prisuhan Bangod sa Ila Pagtuo—Singapore

I-PLAY

Walo ka pamatan-on nga Saksi ang ginpriso sa Singapore bangod sa pagpangindi nga magsoldado bangod sa konsiensia. Apat sa ila ang ikaduha ka bes na nga ginapriso bangod amo gihapon ang ila panindugan pagkatapos sang ila una nga pagkapriso. Ining mga pamatan-on indi makapangayo sing legal nga bulig sa Singapore kay ginapatuman sang gobierno ang pilit nga pagserbisyo sa militar kag wala ginakilala sang gobierno ang kinamatarong nga magpangindi nga magsoldado.

Kon mag-18 anyos ang isa ka pamatan-on nga lalaki nga Saksi, dapat sia magpalista para mangin soldado sang Singapore. Kon magpangindi sia, prisuhon sia sing asta 12 ka bulan sa isa ka military camp. Pagkatapos sini, paguaon sia kag pasuksukon sing uniporme sang militar kag paentrahon sa training. Kon magpangindi naman sia, kasuhan sia liwat kag sentensiahan sing asta sa 18 ka bulan nga pagkapriso. Gani, ang pamatan-on nga mga lalaki nga Saksi ni Jehova nga nagapangindi nga magsoldado duha ka beses nga ginasentensiahan nga mapriso, nga nagalab-ot sa 30 ka bulan.

Wala Gintuman sang Singapore ang Sugo sang United Nations

Ang United Nations madugay na nga nagapanawagan sa mga Estado nga miembro sini nga “kilalahon nga ang pagpangindi nga magsoldado bangod sa konsiensia isa ka rasonable nga paggamit sang kinamatarong sang kahilwayan sang panghunahuna, konsiensia kag relihion nga ginakilala sang Universal Declaration of Human Rights.” Sang 1965 pa nangin miembro sini ang Singapore, pero ang Singapore wala nagaugyon sa United Nations kon parte sa sini nga isyu. Sa sulat nga napetsahan Abril 24, 2002, nga ginpadala sa UN Commission on Human Rights, ang isa ka opisyal sang gobierno sang Singapore nagsiling nga “kon ang pagpati ukon ginahimo sang isa supak [sa kinamatarong nga ipakigbato ang pungsod], dapat unahon ang kinamatarong sang estado nga proteksionan ang seguridad sang pungsod.” Maathag nga nagsulat ang opisyal, “Wala namon ginakilala nga dapat sundon sang tanan nga pungsod ang kinamatarong nga magpangindi nga magsoldado bangod sa konsiensia.”

Impormasyon Parte sa Isa nga Napriso Bangod sa Konsiensia

Chuang Xu Daniel Poh

Natawo si Chuang Xu Daniel Poh sang 2003. Ang iya nanay isa sa mga Saksi ni Jehova. Sang ulihi, nagpa-Bible study si Daniel kag ang iya duha ka manghod kag pati man ang ila tatay nga indi Saksi. Regular nga nagabinagbinag ang ila pamilya parte sa ila natun-an sa mga miting sang mga Saksi ni Jehova ukon sa ila personal nga pagtuon sang Biblia. Pirme man sila nagapangamuyo sing magkaupod kada adlaw. Mas nangin suod ang ila pamilya samtang padayon nila nga ginatun-an ang parte sa ila Dios nga si Jehova.

Samtang nagadaku si Daniel, mas nangin serioso pa gid sia sa iya relasyon kay Jehova. Ano ang nagkumbinsi sa iya nga amo ini ang kamatuoran? Nagsiling sia: “Una, nanamian gid ako sang history, gani nanamian gid ako sa katumanan sang mga tagna sa Biblia. Ang isa sa sini amo ang tagna parte sa pagkapierde sang Babilonia, nga gintagna duha ka gatos ka tuig antes ini natuman. Ginsugid sang Biblia nga magahubas ang Suba Eufrates kag kon paano sudlon sang mga soldado sang Medo-Persia ang siudad sang Babilonia kag laglagon ini. Kag amo gid sini ang natabo. Ikaduha, nakita ko kon paano ang pagsunod sa mga prinsipio sa Biblia nakabulig sa akon kag sa akon pamilya, kon ikumparar sa mga tawo nga wala nagasunod sini. Nagapasalamat gid ako nga ara ako sa kamatuoran.”

Sang naka-graduate si Daniel, ginapaabot na niya nga mapriso sia bangod nangindi sia nga magsoldado bangod sang iya mga natun-an sa Biblia. Pero, handa sia nga batunon ang alternative civilian service kon may ara. Nabalaka sia kay biyaan niya ang iya pamilya, nga nagasalig sa iya sa paghimo sang pila ka importante nga ulubrahon para sa ila. Pero gindedikar niya gihapon ang iya kabuhi kay Jehova sang 2023, wala madugay antes sia ginpatawag para mangin soldado. Sang Agosto 2023, ginpriso sia, gin-hearing sa korte sang militar, kag ginsentensiahan nga mapriso. Prisuhon si Daniel sing duha ka tuig kag tunga kag ginapaabot niya nga makaupod niya liwat ang iya mga pinalangga sa Pebrero 2026.

Time Line

Oktubre 18, 2024

May walo ka Saksi ni Jehova nga ara sa prisuhan kay nagpangindi sila nga magsoldado bangod sa konsiensia.
Abril 24, 2002

Ginkompirmar sang isa ka opisyal sang gobierno sang Singapore nga wala sini ginakilala ang pagpangindi nga magsoldado bangod sa konsiensia.
Pebrero 1995

Naggrabe ang paghingabot kag pagpangdakop sa mga banwahanon (citizen) sang Singapore nga mga Saksi ni Jehova.
Agosto 8, 1994

Ginbasura sang Mataas nga Korte sang Singapore ang pag-apelar sang mga Saksi.
Enero 12, 1972

Ginbawi sang gobierno sang Singapore ang rehistro sang mga Saksi ni Jehova.

Basi Manamian Ka Man

NEWS RELEASE

Mga Lugar Kon Diin May mga Saksi ni Jehova nga Ara sa Prisuhan Bangod sa Ila Pagtuo

Mga lugar kon diin ang mga Saksi ni Jehova ginapriso, kon kaisa sa makaluluoy nga sitwasyon, bangod sa paghimo sang mga hilikuton sang ila relihion kag sang panguna nga mga katarungan sang katawhan.

NEWS RELEASE